សេដ្ឋីនីម្នាក់ឱ្យអ្នកដទៃខ្ចីរ៉ូបរៀបការព្រោះតែកូវីដ-១៩
កាលពីខែមីនាកន្លងមកនេះ អ្នកស្រី សារ៉ា ប្លេកឃ្លី (Sara Blakely) ដែលជាស្ថាបនិក និងនាយកប្រតិបត្តិរបស់ក្រុមហ៊ុន Spanx បានប្រកាសលើ…
កាលពីខែមីនាកន្លងមកនេះ អ្នកស្រី សារ៉ា ប្លេកឃ្លី (Sara Blakely) ដែលជាស្ថាបនិក និងនាយកប្រតិបត្តិរបស់ក្រុមហ៊ុន Spanx បានប្រកាសលើ Instagram របស់ខ្លួនថា អ្នកស្រីនឹងឲ្យរ៉ូបរៀបការរបស់អ្នកស្រីដល់នារីៗដែលត្រូវពន្យាពេលថ្ងៃរៀបអាពាហ៍ពិពាហ៍របស់ខ្លួនខ្ចី ។ ហើយវាមិនមែនជាលើកទីមួយទេដែលអ្នកស្រីបានឲ្យរ៉ូបនេះទៅអ្នកដទៃខ្ចី ។
អ្នកស្រី ប្លេកឃ្លី មានរ៉ូបរៀបការពីរដែលអ្នកស្រីបានស្លៀកកាលពីខែតុលាឆ្នាំ ២០០៨ ។ រ៉ូបមួយជារ៉ូបចាស់របស់ជីដូនរបស់អ្នកស្រី និងរ៉ូបមួយទៀតជារ៉ូបថ្មី ។ អ្នកស្រីបានប្រាប់ថាអ្នកស្រីនឹងឲ្យរ៉ូបទីពីររបស់អ្នកស្រីទៅឲ្យគេខ្ចី ។
មនុស្សដំបូងដែលបានខ្ចីរ៉ូបរបស់អ្នកស្រី គឺមិត្តជិតស្និទ្ធរបស់អ្នកស្រីដែលបានរៀបអាពាហ៍ពិពាហ៍នៅឆ្នាំ ២០១០ ។ ពេលនោះមិត្តរបស់អ្នកស្រីព្យាយាមរករ៉ូបតែជួបនឹងបញ្ហាប្រាក់ ដូច្នេះទើបអ្នកស្រីសម្រេចចិត្តចេញមុខជួយ ។
មនុស្សទីពីរដែលអ្នកស្រីឲ្យរ៉ូបដដែលខ្ចី គឺជាស្ត្រីម្នាក់ដែលអ្នកស្រីទើបតែជួបនៅឆ្នាំ ២០១៦ ។ ប្រាកដណាស់ ស្ត្រីម្នាក់នោះបានបដិសេធយ៉ាងគួរសម ប៉ុន្តែអ្នកទាំងពីរបានប្តូរអ៊ីមែលគ្នា ។ ប្រមាណមួយឆ្នាំក្រោយមក ស្ត្រីដដែលបានទាក់ទងមកកាន់អ្នកស្រី និងសួរថាតើអ្នកស្រីនៅមានចិត្តចង់ឲ្យរ៉ូបខ្ចីទេ ។
មកដល់បច្ចុប្បន្ននេះវិញ និងក្នុងកំឡុងពេលដែលសហរដ្ឋអាមេរិកកំពុងតែប្រឈមមុខនឹងការផ្ទុះនៃវីរុសកូវីដ ១៩ អ្នកស្រី ប្លេកឃ្លី មានចិត្តចង់ចែករំលែករ៉ូបរបស់អ្នកស្រីម្តងទៀត ។
អ្នកស្រីបានបកស្រាយថា «ពេលដែលកូវីដ ១៩ បានកើតឡើង ខ្ញុំបានងាកមកគិតថា តើខ្ញុំអាចប្រើវេទិកាសង្គមរបស់ខ្ញុំយ៉ាងដូចម្តេចក្នុងពេលនេះដើម្បីជួយដល់អ្នកដទៃ?»
អ្នកស្រីបានបន្តទៀតថា ហើយខ្ញុំក៏មានចិត្តចង់ចាប់ផ្តើមនិន្នាការមួយ និងបង្កជាគំនិតថ្មីមួយដល់ស្ត្រីដទៃថាពួកគេប្រហែលជាមិនធ្លាប់គិតពីការឲ្យរ៉ូបរៀបការរបស់ខ្លួនទៅឲ្យអ្នកដទៃខ្ចីទេ ហើយឥលូវនេះពួកគេនឹងធ្វើដូច្នេះ ។
នៅដើមខែមេសាកន្លងមក អ្នកស្រីទទួលបានការឆ្លើយតបពីមនុស្សចំនួន ៣១នាក់ និងស្នើសុំខ្ចីរ៉ូបរបស់អ្នកស្រី ។ អ្នកស្រីបានប្រាប់មកថាអ្នកស្រីបានទាក់ទងទៅកាន់ស្ត្រីទាំង ៣១នាក់នោះហើយ ហើយអ្នកស្រីនឹងផ្ញើរ៉ូបទៅកាន់ពួកគេពេលដែលពេលវេលាមកដល់ ៕
ចែករំលែកព័តមាននេះ