ធនាគារ កម្ពុជាសាធារណៈ ផ្ដល់ការពន្យារពេលទូទាត់សងឥណទានក្នុងអំឡុងពេលការឆ្លងរាលដាលនៃជំងឺ កូវីដ១៩

ថ្ងៃទី ០៧ ខែ មេសា ឆ្នាំ ២០២០
ម៉ោង ១៥:៥២
សហការី

ធនាគារ កម្ពុជាសាធារណៈ ត្រៀមផ្ដល់ការពន្យារពេលទូទាត់សងឥណទានដល់អតិថិជនរបស់ខ្លួនតាមរយៈការរៀបចំឥណទានឡើងវិញ និងពន្យារពេលទូទាត់សងជូនអតិថិជនជាឯកត្តបុគ្គល និងអតិថិជនជាម្ចាស់អាជីវកម្មដែលមានសិទិ្ធទទួលបានការអនុគ្រោះ ។ ក្នុងចំណោមការអនុគ្រោះដែលបានផ្ដល់ជូន គឺការផ្ដល់ការពន្យារពេលទូទាត់សងឥណទាន ការបង់តែការប្រាក់ និងការពន្យារឥណប្រតិទាន ។

គំនិតផ្ដួចផ្ដើមនាពេលថ្មីៗរបស់ធនាគារជាតិនៃកម្ពុជាក្នុងការគាំទ្រដល់វិស័យធនាគារ គឺធ្វើឡើងទាន់ពេលវេលា និងមានភាពរឹងមាំដែលប្រែក្លាយទៅជាជំនួយចាំបាច់បំផុតសម្រាប់គ្រប់វិស័យសេដ្កិច្ចកម្ពុជា ជាពិសេសសហគ្រាសខ្នាតតូច និងមធ្យម និងឯកត្តបុគ្គលដែលទទួលរងផលប៉ះពាល់ផ្នែកហិរញ្ញវត្ថុដោយសារតែការឆ្លងរាលដាលនៃជំងឺ កូវីដ១៩ ។

លោក ដាតុ ផាន យិងថុង ប្រធានធនាគារប្រចាំតំបន់នៃប្រតិបត្តិការឥណ្ឌូចិន មានប្រសាសន៍ថា «ដោយសារតែការឆ្លងរាលដាលជំងឺ កូវីដ១៩ កាន់តែខ្លាំងឡើងនៅលើសាកលលោក ធនាគារមានការព្រួយបារម្ភយ៉ាងខ្លាំងលើផលប៉ះពាល់នៃជំងឺនេះមកលើប្រទេសជាតិ ហើយសង្ឃឹមថា ការជួយសម្រួលនេះនឹងជួយសម្រាលបន្ទុកអតិថិជនរបស់ធនាគារ» ។

លោកបានមានប្រសាសន៍បន្ថែមទៀតថា «ខណៈពេលដែលការឆ្លងរាលកាន់តែខ្លាំងឡើង ធនាគារបាននឹងកំពុងបន្ដត្រៀមផ្ដល់ការពន្យារពេលទូទាត់សងឥណទាន ដើម្បីជួយសម្រាលដល់អតិថិជនទាំងអស់របស់ខ្លួនលើស្ថានភាពលំហូរសាច់ប្រាក់ និងជួយសម្រាលផលវិបាកហិរញ្ញវត្ថុនៅក្នុងរយៈពេលដ៏លំបាកដែលពោរពេញទៅដោយបញ្ហាប្រឈមយ៉ាងច្រើន» ។

ដើម្បីរក្សាសុវត្ថិភាព និងសុខភាពរបស់អតិថិជន និងបុគ្គលិករបស់ខ្លួន ធនាគារបានអនុវត្តវិធានការទប់ស្កាត់ការប្រមូលផ្ដុំ និងការគ្រប់គ្រងដោយការយកចិត្តទុកដាក់ខ្ពស់បំផុត ដោយក្នុងនោះរួមមានការអនុញ្ញាតឱ្យបុគ្គលិកដែលបានកំណត់ និងបុគ្គលិកដែលជាស្ដ្រីមានផ្ទៃពោះឱ្យបំពេញការងារនៅផ្ទះ ដោយមិនចាំបាច់មកបំពេញការងារនៅអគារធនាគារកម្ពុជា និងសាខាទាំង ៣១ នៅទូទាំងប្រទេស ។

ចំពោះការធ្វើប្រតិបត្តិការធនាគារវិញ អតិថិជនត្រូវបានលើកទឹកចិត្តឱ្យប្រើប្រាស់ប្រតិបត្តិការធនាគារតាមប្រព័ន្ធអេឡិចត្រូនិច ប្រតិបត្តិការធនាគារតាមទូរស័ព្ទចល័ត និងសេវាកម្មតាមអនឡាញផ្សេងៗ ដែលជាផ្នែកមួយនៃវិធានការរក្សាគម្លាតនៅឆ្ងាយពីគ្នា (Social Distance) ដើម្បីធានាប្រសិទ្ធភាពនៃការទប់ស្កាត់ការឆ្លងរាលដាលនៃជំងឺ កូវីដ១៩ ៕ ដោយសហការ (កែសម្រួលដោយ ៖ បុប្ផា)