រាជធានីភ្នំពេញ ៖ ដោយសារតែបញ្ហាជំងឺកូវីដ១៩កំពុងរីករាលដាលទូទាំងពិភពលោកបានធ្វើឱ្យកម្មវិធីប្រដាល់គ្រប់ស្ថានីយទូរទស្សន៍ទាំងអស់បន្តសម្រាកចំនួន២សប្តាហ៍មកហើយ ខណៈការកំណត់ថ្ងៃវិលត្រឡប់មកវិញក៏មិនទាន់បានដឹង ។ តារាងកម្មវិធីរបស់សង្វៀនផ្សេងៗបានចេញផ្សាយថានឹងមានការប្រកួតនៅថ្ងៃចុងសប្តាហ៍វិញ ប៉ុន្តែកាលពីម្សិលម្សិញបានប្រកាសបន្តផ្អាកគ្រប់សង្វៀនទូទាំងប្រទេស ។
កីឡាករគុនខ្មែរមួយចំនួនដែលពឹងផ្អែកលើការឡើងសង្វៀនដើម្បីបានកម្រៃយកមកទ្រទ្រង់ជីវភាពរបស់ពួកគេបានបង្ហាញអារម្មណ៍សោកស្តាយនិងត្អូញត្អែរអំពីផលលំបាកសម្រាប់ការចំណាយរបស់គេ ពីព្រោះពួកគេរកចំណូលតាមរយៈគុនខ្មែរ ។ នៅពេលកម្មវិធីប្រកួតមិនមានធ្វើឱ្យការផ្គត់ផ្គង់ក្នុងគ្រួសារជួបការពិបាក ជាពិសេសកីឡាករខ្លះបានចំណាយពេលហ្វឹកហាត់និងធ្វើដំណើរមកពីតាមបណ្តាខេត្តដើម្បីត្រៀមប្រកួត ប៉ុន្តែត្រូវខកខានហើយកាន់តែលំបាកមួយកម្រិតទៀត ។
កីឡាករ គង់ ហូវ នៃក្លិបគុហារព្រហ្មជ័យ ខេត្តសៀមរាប ដែលត្រូវប្រកួតក្នុងសប្តាហ៍កន្លងទៅនៅសង្វៀន PNN ប៉ុន្តែត្រូវលុបចោលវិញបានលើកឡើងពីផលលំបាករបស់ខ្លួនថា គ្រួសារលោកកំពុងតែជួបទុក្ខលំបាកសង្ឃឹមថាបានវ៉ៃថ្ងៃអាទិត្យនេះបានលុយមកផ្គត់ផ្គង់គ្រួសារហើយសងលុយគេផងហើយឥឡូវខាងស្ថានីយទូរទស្សន៍បានរំសាយចោលទៀតតើឥឡូវនេះឱ្យលោករំពឹងអីទៅ តើលោកបានលុយពីណាទៅសងគេ !
មានកីឡាករជាច្រើនទៀតដែលពួកគេត្រូវជួបបញ្ហាទាំងនេះ ប៉ុន្តែអ្វីៗដោយសារបញ្ហាជំងឺកូវីដ១៩ ទើបខាងអគ្គនាយកកីឡា និងសហព័ន្ធប្រដាល់គុនខ្មែរ សម្រេចមិនទាន់ឱ្យមានកម្មវិធីប្រកួតដោយត្រូវរង់ចាំបញ្ហាជំងឺនេះធូរស្រាលបានច្រើនជាមុនសិន ។ សូមបញ្ជាក់ថា គ្រប់សង្វៀនគុនខ្មែរទាំងអស់ត្រូវសហព័ន្ធប្រដាល់គុនខ្មែរប្រកាសផ្អាកចាប់តាំងពីថ្ងៃទី ២៣ ខែ មីនា ឆ្នាំ២០២០ មក ខណៈការប្រកួតនៅថ្ងៃណាវិញមិនទាន់បានកំណត់នៅឡើយ ៕
ចែករំលែកព័តមាននេះ