សមត្ថភាពក្នុងការធ្វើការសម្រេចចិត្តដ៏មានប្រសិទ្ធិភាព គឺពិតជាសំខាន់ណាស់សម្រាប់អាជីវករដែលជួបនូវជម្រើសជាច្រើនជារៀងរាល់ថ្ងៃ ។ លើសពីនេះទៅទៀត ជម្រើសមានកាន់តែច្រើនខណៈដែលបច្ចេកវិទ្យា និងទីផ្សារបន្តផ្លាស់ប្តូរស្ទើរតែគ្រប់វិនាទី ។
ដូច្នេះការរៀនពីការធ្វើការសម្រេចចិត្តអាចជួយឲ្យអ្នកធ្វើការកាន់តែមានប្រសិទ្ធិភាពឡើង ខណៈដែលជួយអ្នកកាត់បន្ថយស្ត្រេសនិងជំរុញដល់អារម្មណ៍ពេញចិត្តនឹងអាជីវកម្ម និងជីវិតរបស់អ្នកផងដែរ ។ ខាងក្រោមនេះ គឺជាយុទ្ធសាស្ត្រមួយចំនួនដែលនាយកប្រតិបត្តិរបស់ក្រុមហ៊ុន JotForm អនុវត្តដើម្បីធ្វើការសម្រេចចិត្តបានល្អ៖
១. ជ្រើសអ្វីដែលល្អគ្រប់គ្រាន់
ការមានជម្រើសច្រើនពេកមានតែអាចធ្វើឲ្យមនុស្សមិនសប្បាយចិត្តទៅវិញទេ ដូចជាពេលដែលអ្នកមានជម្រើសភាពយន្តច្រើនត្រូវមើលតែមិនមានពេលគ្រប់គ្រាន់ ឬថវិកាគ្រប់គ្រាន់ជាដើម ។ ក្នុងករណីនេះ អ្នកគួរតែជ្រើសយកជម្រើសដែលល្អគ្រប់គ្រាន់សម្រាប់អ្នកច្រើនជាងជម្រើសដែលល្អជាងគេ ។
២. ផ្តល់តម្លៃលើល្បឿន
លោក ជេហ្វ បេសូស (Jeff Bezos) ដែលជានាយកប្រតិបត្តិរបស់ក្រុមហ៊ុន Amazon បានសរសេរសំបុត្រមួយផ្ញើទៅឲ្យម្ចាស់ភាគហ៊ុនដទៃនៅឆ្នាំ ២០១៦ ថា «ការសម្រេចចិត្តភាគច្រើនគួរតែត្រូវបានសម្រេចឡើងដោយយោងទៅលើ ៧០% នៃព័ត៌មានដែលអ្នកចង់បាន ។ ប្រសិនបើរង់ចាំរហូតដល់ ៩០% នោះ ក្នុងករណីភាគច្រើន គឺអ្នកយឺតពេកហើយ» ។
៣. ព្យាយាមនឹកពីស្ថានការដែលអាក្រក់បំផុតដែលអាចនឹងកើតឡើងទស្សនៈរបស់អ្នកប្រាជ្ញក្រិចធ្លាប់ជំរុញឲ្យមនុស្សព្យាយាមស្រមើលស្រម៉ៃពីបញ្ហាធំៗដែលមនុស្សអាចនឹងជួបប្រទះមុនពេលវាកើតមានឡើង បន្ទាប់មកព្យាយាមជៀសវាងវាពេលដែលធ្វើការសម្រេចចិត្ត ។
៤. ថ្លឹងថ្លែងជម្រើសរបស់អ្នក
ក្នុងអាជីវកម្ម ជម្រើសភាគច្រើនមិនមានទម្ងន់ ឬតម្លៃដូចគ្នាទេ ដូច្នេះនៅពេលដែលអ្នកជួបនឹងការសម្រេចចិត្តដែលពិបាក អ្នកគួរតែសួរខ្លួនឯងសាជាថ្មីថាតើជម្រើសទាំងពីរពិតជាមានតម្លៃ និងអាចផ្តល់ជាអត្ថប្រយោជន៍ដល់អ្នកស្មើគ្នាពិតមែនឬ?បើចម្លើយគឺទេ នោះអ្នកគួរតែជ្រើសមួយដែលជួយឲ្យអ្នកសម្រេចគោលដៅអ្នកច្រើនជាងគេ ៕
ចែករំលែកព័តមាននេះ