រាជធានីភ្នំពេញ ៖ ជនសង្ស័យម្នាក់បានទៅសុំបុរសម្នាក់ទៀតឱ្យជួយរកការងារធ្វើ ដោយសារតែមានការអាណិតអាសូរ ទើបបុរសរងគ្រោះព្រមជួយមិនតែប៉ុណ្ណោះបាននាំទៅស្នាក់នៅបន្ទប់ជួលជាមួយគ្នាថែមទៀតផង ដើម្បីកុំឲ្យជននេះអស់ថ្លៃជួលផ្ទះ ។ ប៉ុន្តែក្រោយពីស្នាក់នៅជាមួយគ្នាបានរយៈពេលត្រឹមតែ៣ថ្ងៃប៉ុណ្ណោះ ស្រាប់តែជនសង្ស័យហ៊ានរំលោភលើទំនុកចិត្តដោយបានលួចយកម៉ូតូ១គ្រឿងរួចគេចខ្លួនបាត់ស្រមោល ។ លុះជាងកន្លះខែក្រោយមក ស្រាប់តែបុរសជាម្ចាស់ម៉ូតូប្រទះឃើញជនសង្ស័យកំពុងជិះម៉ូតូតាមផ្លូវ ក៏រាយការណ៍ជូននគរបាល ហើយភ្លាមៗនោះលោកវរសេនីយ៍ឯកជឹម សុីថា អធិការនគរបាលខណ្ឌដង្កោបានបញ្ជាកម្លាំងឲ្យជួយដេញតាមចាប់ខ្លួនបានភ្លាមៗតែម្ដង។
ហេតុការណ៍ខាងលើនេះបានកើតឡើងកាលពីវេលាម៉ោង៦ល្ងាចថ្ងៃទី១៤ ខែមីនា ឆ្នាំ២០២០ នៅត្រង់ចំណុចផ្ទះជួល ស្ថិតនៅក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ។ លុះជាងកន្លះខែក្រោយមកគឺនៅវេលាម៉ោង៤និង៣០នាទីល្ងាចថ្ងៃទី២ ខែមេសា ឆ្នាំ២០២០ ទើបម្ចាស់ម៉ូតូប្រទះឃើញជននេះកំពុងជិះម៉ូតូនៅជិតតូបលក់ទឹកត្នោតជូរ ស្ថិតនៅតាមផ្លូវ៥០ម៉ែត្រក្នុងភូមិបាគូ សង្កាត់ដង្កោ ខណ្ឌដង្កោ ក៏បានទូរស័ព្ទរាយការណ៍ជូននគរបាលឲ្យចាប់ខ្លួនចាត់ការតាមច្បាប់តែម្ដង។
តាមប្រភពពីនគរបាលបានប្រាប់ឲ្យដឹងថា ជនសង្ស័យខាងលើឈ្មោះ អឿន ស៊ីណែត ហៅ ឡេវ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅក្នុងការដ្ឋានសំណង់បុរីមួយកន្លែង ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ បានធ្វើសកម្មភាពលួចម៉ូតូ១គ្រឿងម៉ាកស៊ុយហ្សុ៊យគីនិច ពណ៌ទឹកប្រាក់ ពាក់ស្លាកលេខ ស្វាយរៀង ១E-៦៣០៦ ជាកម្មសិទ្ធិរបស់ឈ្មោះ ហ៊ីម វ៉ាន់ ភេទប្រុស អាយុ២៣ឆ្នាំ មុខរបរកម្មករលើកដាក់ និងដឹកគ្រឿងសំណង់ ស្នាក់នៅផ្ទះជួលក្នុងភូមិខ្វា សងា្កត់ដង្កោ ខណ្ឌដង្កោ រាជធានីភ្នំពេញ។
តាមប្រភពពីនគរបាលដដែលបានបន្តឲ្យដឹងទៀតថា មុនពេលកើតហេតុ កាលពីវេលាម៉ោង៥ល្ងាចថ្ងៃទី១១ ខែមីនា ឆ្នាំ២០២០ ខណៈបុរសជាម្ចាស់ម៉ូតូមួយគ្រឿងខាងលើកំពុងអង្គុយផឹកស៊ីនៅតូបលក់ទឹកត្នោតជូរ មួយកន្លែង ស្ថិតនៅក្នុងភូមិបាគូ សង្កាត់ដង្កោ ខណ្ឌដង្កោ ហើយជនសង្ស័យបានទៅជួប រួចសុំឲ្យជួយរកការងារធ្វើជាកម្មករលើកអីវ៉ាន់គ្រឿងសំណង់ជាមួយដែរ ។ ពេលនោះដោយសារតែមានការអាណិតអាសូរជាមនុស្សស្គាល់គ្នា ទើបបុរសជាម្ចាស់ម៉ូតូក៏បានយល់ព្រមជួយហើយបាននាំជននេះទៅស្នាក់នៅផ្ទះជួលជាមួយ មិនឲ្យនៅកន្លែងផ្សេងនោះឡើយ ដើម្បីកុំឱ្យជនសង្ស័យអស់លុយថ្លៃជួលផ្ទះ ប៉ុន្តែពុំទាន់បាននាំទៅធ្វើការភ្លាមនៅឡើយទេ ដោយឱ្យរង់ចាំប៉ុន្មានថ្ងៃទៀតសិន។
តាមប្រភពខាងលើបានបន្តទៀតថា លុះ៣ថ្ងៃក្រោយមក គឺនៅថ្ងៃទី១៤ ខែមីនា ឆ្នាំ២០២០ ខណៈដែលបុរសជាម្ចាស់ម៉ូតូបានទុកម៉ូតូរបស់ខ្លួននៅឃ្លាំងដាក់ម៉ូតូផ្ទះជួល រួចយកកូនសោរម៉ូតូទៅដាក់នៅក្នុងកន្ត្រកលើក្បាលដំណេក ហើយដើរទៅអង្គុយផឹកស៊ីជាមួយអ្នកជិតខាងនៅខាងមុខបន្ទប់ជួល ។ ពេលនោះជនសង្ស័យក៏បានយកកូនសោរទៅចាក់ម៉ូតូបញ្ឆេះលួចជិះគេចខ្លួនបាត់ស្រមោលតែម្ដង ។
តាមប្រភពដដែលបានបន្តទៀតថា ក្រោយមកម្ចាស់ម៉ូតូបានដាក់ពាក្យបណ្តឹងនៅប៉ុស្តិ៍នគរបាលរដ្ឋបាលដង្កោ ដើម្បីឲ្យជួយអន្តរាគមន៍ ប៉ុន្តែស្រាវជ្រាវរកមិនឃើញឡើយ លុះដល់វេលាម៉ោង៤និង៣០នាទីរសៀលថ្ងៃទី២ ខែមេសា ឆ្នាំ២០២០ ជនរងគ្រោះបានប្រទះឃើញជនសង្ស័យកំពុងជិះម៉ូតូមួយគ្រឿងម៉ាកហុងដា ធុនសេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ ព្រៃវែង ១L-៧០៣៩ ហើយជនរងគ្រោះក៏បានទូរស័ព្ទរាយការណ៍ប្រាប់គរបាលឲ្យជួយអន្តរាគមន៍ឃាត់ខ្លួនជនសង្ស័យបាន។
បន្ទាប់មក សមត្ថកិច្ចបាននាំជនសង្ស័យទៅធ្វើការឆែកឆេរបន្ទប់ជួលដែលជននេះស្នាក់នៅ និងដកហូតបានម៉ូតូមួយគ្រឿងទៀតម៉ាកហុងដាស១១០(អាសង់ប៊ិច )ពណ៌ខ្មៅ ពាក់ស្លាកលេខ ភ្នំពេញ ១BM-៨៣៥៩ រួចនាំយកជនសង្ស័យទៅធ្វើការសាកសួរនៅប៉ុស្តិ៍នគរបាលរដ្ឋបាលដង្កោដើម្បីចាត់ការតាមនីតិវិធី៕ (កែសម្រួលដោយ ៖ ធីតា)
👍
ចែករំលែកព័តមាននេះ