រាជធានីភ្នំពេញ ៖ ខណៈពេលដែលពលករខ្មែរបានសម្រុកមកពីប្រទេសថៃយ៉ាងច្រើន ហើយគ្មានការពិនិត្យសុខភាពនោះ ដើម្បីទប់ស្កាត់ការរីករាលដាលជំងឺកូវីដ១៩ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ទទួលស្គាល់ថា អាជ្ញាធរខ្មែរគ្មានលទ្ធភាពឃុំពលករខ្មែរ១៤ថ្ងៃទេ ។ សម្ដេចបញ្ជាក់ថា បើសិននៅភូមិណាមួយ រកឃើញពលករឆ្លងកូវីដ-១៩ ចំនួន២ ឬ៣នាក់ អាជ្ញាធរអាចនឹងបិទភូមិនោះចោល ដោយមិនឲ្យមានការចេញ-ចូល។
ថ្លែងក្នុងពិធីជួបសំណេះសំណាលជាមួយមន្ត្រីនគរបាលអន្តោប្រវេសន៍នៅអាកាសយានដ្ឋានអន្តរជាតិភ្នំពេញ នាថ្ងៃទី២៤ ខែមីនា ឆ្នាំ២០២០ សម្ដេច ស ខេង បានថ្លែងថា រយៈពេលប៉ុន្មានថ្ងៃនេះ មានពលករខ្មែរចូលមកកម្ពុជា ជាង១៥០០០ពាន់នាក់។ សម្ដេចបានលើកឡើងថា ថៃបិទការងារមួយចំនួន ដូចជា ការដ្ឋាន ខារ៉ាអូខេ សណ្ឋាគារ ភោនីយដ្ឋាន ហាងកាត់សក់ជាដើម ទើបធ្វើឲ្យពលរកខ្មែរមិនមានការងារធ្វើ ទើបពួកគេសម្រុកមកស្រុកកំណើតវិញ។
សម្ដេចបានបញ្ជាក់ថា៖ «ដល់ចឹងប្រជាជនយើង ពលករខ្មែរយើង ដែលធ្វើការនៅថៃ ដល់លឺគេថាបិទចឹងទៅ ហើយប្រជាជនថៃ ពលករថៃ ធ្វើការនៅថៃមានអារម្មណ៍ចឹង យើងក៏មានអារម្មណ៍ចឹងដែរ តាមគ្នាចឹងទៅ ដូច្នេះរត់សម្រុកមក រឿងអីពីមុនមកគាត់មិនមក។ ចឹងបញ្ហារបស់យើងហានីភ័យនៅត្រង់ហ្នឹង នៅត្រង់ថា នៅពេលគាត់មកសម្រុកទៅ យើងនិយាយតាមការជាក់ស្ដែង អត់មានលទ្ធភាពត្រួតពិនិត្យអស់ទេ។
ហើយយើងក៏អត់មានលទ្ធភាព ដើម្បីនឹងឃុំពួកគាត់១៤ថ្ងៃដែរ។ វាត្រួតពិនិត្យចឹងទៅ ហើយធ្វើបញ្ជី មុខសញ្ញានឹងនៅកន្លែងណាខ្លះ ស្រុក ភូមិ ខេត្តនៅណា ដើម្បីខេត្តសាមីខ្លួន ធ្វើការគ្រប់គ្រងបន្ដ»។
ជាមួយគ្នានោះដែរ សម្ដេចក៏សង្កត់ធ្ងន់ថា បើសិននៅភូមិណាមួយ មានពលករខ្មែរឆ្លង កូវីដ-១៩ ចាប់ពី២ទៅ៣នាក់ ភូមិនោះអាចនឹងបិទរយៈមួយពេលសិន ដើម្បីមានវិធានការដោះស្រាយបន្ដ ជាពិសេសធ្វើយ៉ាងណាកុំឲ្យរីករាលដាលទៅភូមិដទៃទៀត ដូច្នេះភាគីពាក់ព័ន្ធត្រូវត្រៀមជានិច្ច កុំឲ្យពលរដ្ឋមានការភ័យខ្លាចឲ្យសោះ។
សម្ដេចក្រឡាហោម ស ខេង បញ្ជាក់យ៉ាងដូច្នេះ៖ «បើសិនមានកន្លែងណាមួយកើតឡើង (កូវីដ-១៩) គឺថា ឃុំមួយផ្ទះហ្នឹង ឬថា ឃុំមួយកំណាត់ភូមិហ្នឹង ឧទាហរណ៍ថា ភូមិដាច់ដោយឡែកពីគ្នា ៤ទៅ៥ផ្ទះ អ៊ីចឹងទៅ។ យើងអាចឃុំកន្លែងហ្នឹង កុំឲ្យគាត់ចេញទៅណា ហើយបើថា ភូមិហ្នឹងជាប់គ្នា ហើយមានច្រើននាក់ ២ទៅ៣នាក់ អ៊ីចឹងទៅ គឺថា ឃុំទាំងភូមិហ្នឹងតែម្តង ប៉ុន្មានភូមិហ្នឹង»។
ឆ្លៀតឱកាសនោះដែរ រដ្ឋមន្ដ្រីមហាផ្ទៃលើកឡើងថា ចំពោះបញ្ហាបិទព្រលាននៅកម្ពុជា រាជរដ្ឋាភិបាលគ្មានគោលការណ៍បិទឡើយ ដោយដំណើរការធម្មតា ។ រដ្ឋមន្ដ្រីមហាផ្ទៃថា បើសិនបណ្ដាប្រទេសនានា គេបិទជើងហោះមកកម្ពុជា ស្នើនឹងកម្ពុជាជើងបិទហោះហើរដែរ។
រដ្ឋមន្ដ្រីមហាផ្ទៃអះអាងថា «វិធានការបិទព្រលានយន្ដយើងអត់មានទេ។ ហើយបិទព្រំដែន យើងបានជជែងជាមួយថៃ និងវៀតណាមដែរ បានស្រុះគ្នាចឹង ដំណើរការចឹង រីឯព្រលានយន្ដហោះនៅដដែលទេ ទាំង៣ គឺទាំងភ្នំពេញ កំពង់សោម និងសៀមរាប។ ប៉ុន្ដែបើសិនណាគេបិទ ប្រទេសគេមិនឲ្យយន្ដហោះមក ដូចតែយើងបិទដូចគ្នាទេ ហើយយើងបន្ដតាមដានថែមទៀត»។
គួរឮកថា គិតត្រឹមវេលាម៉ោង១០យប់ ថ្ងៃទី២៣ ខែមីនា ឆ្នាំ២០២០ ក្រសួងសយខាភិបាលកម្ពុជាបានរកឃើញអ្នកឆ្លងជំងឺ កូវីដ-១៩ ចំនួន៨៧ករណី ខណៈក្រសួងសុខាភិបាល និងភាគីពាក់ព័ន្ធមួយចំនួនទៀត កំពុងបន្តស្វែងរក និងធ្វើតេស្តលើអ្នកពាក់ព័ន្ធផ្សេងទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ