ពិតជាសោកស្តាយការបាត់បង់អ្នកចម្រៀងមានឈ្មោះល្បីនាទសវត្ស៥០ និង៦០
- ភ្នំពេញ
រាជធានីភ្នំពេញ ៖ ម្ចាស់បទ «រាត្រីដែលបានជួបភក្ត្រ» ដែលជាស្នាព្រហស្ថដ៏ល្បីល្បាញរបស់សម្តេចតា លោកស្រី កែវ សេដ្ឋា បានទទួលមរណភាពហើយ នៅថ្ងៃទី២៤…
រាជធានីភ្នំពេញ ៖ ម្ចាស់បទ «រាត្រីដែលបានជួបភក្ត្រ» ដែលជាស្នាព្រហស្ថដ៏ល្បីល្បាញរបស់សម្តេចតា លោកស្រី កែវ សេដ្ឋា បានទទួលមរណភាពហើយ នៅថ្ងៃទី២៤ ខែមីនា ឆ្នាំ២០២០នេះ ក្នុងជន្មាយុ៨៤ឆ្នាំ នៅគេហដ្ឋានលោកស្រីក្នុងរាជធានីភ្នំពេញ បន្ទាប់ពីលោកស្រីបានជំនះនូវជំងឺប្រចាំកាយដូចជា ទឹកនោមផ្អែម, រលាកទងសួត,និងលើសឈាមជាដើម។
បើយោងតាមសេចក្តីប្រកាសជូនដំណឹងពីក្រុមព្រះសុរិយាបានឲ្យដឹងថា លោកស្រី កែវ សេដ្ឋា សិល្បការិនីរៀមច្បងដែលមានឈ្មោះល្បីល្បាញនាទសវត្ស៥០និង៦០ បានទទួលមរណភាពនៅព្រឹកថ្ងៃទី២៤ ខែមីនា ឆ្នាំ២០២០នេះ ក្នុងជន្មាយុ៨៤ឆ្នាំ ដោយជរាពាធ នៅគេហដ្ឋានកូនស្រីលោកស្រីនារាជធានីភ្នំពេញ។
បើតាមក្រុមព្រះសុរិយាបានឱ្យដឹងថា ការបាត់បង់លោកស្រី កែវ សេដ្ឋា នាពេលនេះប្រៀបដូចបាត់បង់នូវធនធានដ៏កម្រ ដែលលោកស្រីបានកសាងស្នាដៃ និងតស៊ូគ្រប់យ៉ាង ដើម្បីសិល្បៈជាតិយើងតាំងពីលោកស្រីដឹងក្តី រហូតដល់ថ្ងៃលាចាកលោកនេះ។
ចម្រៀងជាច្រើនបទរបស់លោកស្រីនៅតែមានជីវិតដល់សព្វថ្ងៃក្នុងក្រអៅបេះដូងរបស់មហាជនខ្មែរដូចជាបទ រាត្រីដែលបានជួបភក្ត្រ , បទ ទ្រូងអនាថា , បទ ទីវាលសត្វយំ , បទ សង្ឃឹមជានិច្ច , បទ សារិកា , បទ ទឹកភ្នែកសូយ៉ា ជាដើម។ ក្រៅពីជាអ្នកចម្រៀងដ៏ល្បី នៃជំនាន់ទី១ នៃការកកើតវិស័យចម្រៀងខ្មែរ លោកស្រីជាសិល្បការិនីល្ខោនបាសាក់ យីកេ និងរបាំប្រពៃណីផងដែរ។
គួររំលឹកថា លោកស្រី កែវ សេដ្ឋា កើតនៅថ្ងៃទី១ ខែមករា ឆ្នាំ១៩៣៦ នៅទីក្រុងភ្នំពេញ។ លោកស្រី គឺជាអ្នកចម្រៀងនារីរបស់កម្ពុជាមុនគេបង្អស់ តាំងពីទស្សវត្សរ៍៥០មកម្ល៉េះ ពោលគឺមុនអ្នកស្រី រស់ សេរីសុទ្ធា, ប៉ែន រ៉ន, ឈុនវណ្ណា និងអ្នកស្រី ម៉ៅសារ៉េត ទៅទៀត ។
គួររំលឹកទៀតថា រយៈពេលជិត៣០ឆ្នាំមកនេះ គេមិនបានលឺសំឡេងរបស់លោកស្រីទាល់តែសោះ ដោយសារគ្រប់គ្នាយល់ថា ប្រហែលជាបាត់បង់ជីវិតទៅហើយ ក្នុងរបរខ្មែរក្រហម។ តែយ៉ាងណា លោកស្រីមិនដូចអ្វីដែលគ្រប់គ្នាយល់ឃើញនោះឡើយ ពោលគឺលោកស្រីនៅមានជីវិត និងសម្ងំព្យាបាលជំងឺធ្ងន់ធ្ងរដោយភាពខ្វះខាត ខណៈវ័យកាន់តែជរា៕ (កែសម្រួលដោយ ៖ បុប្ផា)
ចែករំលែកព័តមាននេះ