រាជធានីភ្នំពេញ ៖ ដើម្បីទប់ស្កាត់ការរីករាលដាលជំងឺកូវីដ១៩ សម្តេចតេជោ ហ៊ុនសែន នាយករដ្ឋមន្ត្រីសម្រេចបិទច្រកព្រំដែនកម្ពុជា -វៀតណាមទាំងអស់ ជាបណ្តោះអាសន្ន ចាប់ពីយប់ថ្ងៃទី២០ ខែមីនា ឆ្នាំ២០២០តទៅ ។ ការសម្រេចបិទច្រកចេញចូលកម្ពុជាវៀតណាមនេះ បន្ទាប់ពីវៀតណាមសម្រេចបិទច្រកព្រំដែនខ្លួនជាមួយកម្ពុជា ដោយមិនបានជួនដំណឹងដល់ភាគីកម្ពុជានោះទេ ។ នេះ បើតាមសម្តេចតេជោ ហ៊ុន សែន ។
យោងតាមសម្លេងចេញផ្សាយតាមបណ្តាញសង្គមតេឡេក្រាម សម្តេចតេជោ ហ៊ុនសែន នាយករដ្ឋមន្ត្រីបានបញ្ជាក់ថា យ៉ាងដូច្នេះថា ៖«ខ្ញុំជម្រាបជូនថ្នាក់ដឹកនាំតាំងពីថ្នាក់លើរហូតដល់ខេត្ត និងផ្នែកពាក់ព័ន្ធថា ដោយសារខាងវៀតណាមគេបិទជាស្ថាពរក៏ថា បាន ឬជាបណ្តោះអាសន្នក៏ថាបានអំពីបញ្ហាច្រកព្រំដែនកម្ពុជា និងវៀតណាម ហើយមិនបានជូនដំណឹងមិនបានដឹងទេ ។ នេះជាការមួយដែលយើងពិបាកយល់ ប៉ុន្តែយើងយល់ពីគាត់ គឺដើម្បីការពារជំងឺកូវីដ១៩ របស់ប្រជាជនគាត់ ។ ប៉ុន្តែគាត់ត្រូវតែយល់ថា យើងមានការចាំបាច់ ដើម្បីការពារប្រជាជនយើងដែរដូចជា ករណីវានាដែលចេញពីវៀតណាមមានអ្នកផ្ទុកជំងឺកូវីដ១៩រហូតដល់៣នាក់ ឯយើងមិនទាន់បានបញ្ជូនជំងឺណាមួយទៅឲ្យគាត់ទេ» ។
សម្តេចបន្តថា សម្រាប់ប្រជាជនទាំង២ ទៅណាក៏ជាប់បម្រាប១៤ថ្ងៃដដែល អីចឹងប្រជាជនកម្ពុជាទៅវៀតណាមចូលទៅប្រទេសគាត់ក៏ត្រូវដាក់ឲ្យឯកកោ រយៈពេល១៤ថ្ងៃ ហើយប្រជាជនគាត់ (វៀតណាម)ត្រឡប់ពីកម្ពុជាទៅក៏ដាក់ឲ្យនៅឯកកោ១៤ថ្ងៃ ។ បញ្ហាបិទច្រកព្រំដែនសម្តេចបានគូសបញ្ជាក់ថា ៖«អីញ្ចឹងក្នុងរយៈពេលនឹងខ្ញុំស្នើសុំឲ្យប្រជាជនវៀតណាមចូលមកកម្ពុជាក្នុងរយៈពេលដែលវៀតណាមហាមឃាត់ ។ ខ្ញុំក៏បានពិភាក្សាជាមួយសម្តេចក្រឡាហោម ស ខេង ក្នុងនាមជា រដ្ឋមន្ត្រីក្រសួងមហាផ្ទៃដែលធ្វើទៅតាមសមត្ថកិច្ចទៅតាមច្បាប់ ដែលបានប្រគល់ គឺប្រកាសមិនឲ្យប្រជាជនវៀតណាមចូលមកកម្ពុជានោះទេ ហើយត្រូវជម្រាបជូនដំណឹងពីពេលនេះ រហូតដល់សូន្យម៉ោង១២ថ្ងៃទី២០ មីនា យើងចាប់ផ្តើមអនុវត្ត ។ ខុសគ្នាពីវៀតណាមដែលចាប់ផ្តើមអនុវត្តពីយប់មិញ (យប់ថ្ងៃទី១៩)ទាំងយើងមិនដឹងផង » ។
សម្តេចបានបន្ថែមថា មូលហេតុដែលធ្វើការបិទច្រកដែនមិនឲ្យឆ្លងកាត់នោះ ដោយសារមានការអាណិតប្រជាជនវៀតណាមនោះទេ មកដល់ស្រុកខ្មែរហើយត្រឡប់ទៅវិញត្រូវជាប់បំរាមនៅវៀតណាមដោយដាក់នៅដាច់ដោយឡែករយៈពេល១៤ថ្ងៃ ហើយបើគាត់នៅកម្ពុជា គឺគាត់រស់នៅខុសច្បាប់ ។ ក្នុងរយៈពេលប្រជាជនកម្ពុជាឆ្លងទៅវៀតណាមមានចំនួនតិចណាស់ ក៏ប៉ុន្តែនៅថ្ងៃទី១៨ មីនា តាមស្ថិតិប្រជាជនវៀតណាមឆ្លងមកកម្ពុជាប្រមាណជាង៣០០នាក់ឯណោះ ។ អីញ្ចឹងប្រជាជនវៀតណាមឆ្លងមកកម្ពុជាបាន ឯប្រជាជនកម្ពុជាឆ្លងចូលរៀតណាម គឺជាប់បំរាម ប៉ុន្តែឥឡូវប្រជាជនខ្មែរដែលចួលទៅវៀតណាមយើងបានស្នើឲ្យអាជ្ញាធ រនៅតាមព្រំដែនទាំងអស់ គឺស្នើទៅវៀតណាមថា បើប្រជាជនកម្ពុជាទៅវៀតណាមហើយបានដាក់ក្នុងបំរាម គឺសុំឲ្យវៀតណាមប្រគល់ប្រជាពលរដ្ឋខ្មែរយើងត្រឡប់មកស្រុកកំណើតវិញ ។ ព្រោះថា បើទុករយៈពេល១៤ថ្ងៃមានការពិបាក ដោយខាតការងារ ហើយអត់បាយគេទៀត ។ ដូច្នេះសុំប្រជាពលរដ្ឋខ្មែរទាំងអស់មិនឆ្លងទៅវៀតណាម ។
សម្តេចបានគូសបញ្ជាក់ថា ៖«អីញ្ចឹងស្នើទៅអាជ្ញាធរតាមច្រកព្រំដែនទាំងអស់ទាក់ទងទៅវៀត ណាម តើមានប្រជាជនខ្មែរចូលទៅវៀតណាមទេ ប្រសិនបើមានសូមបញ្ជូនឲ្យមកកម្ពុជាវិញ ហើយបន្ទាប់មកអាជ្ញាធរនៅច្រកព្រំដែនទាំងអស់ចាប់ពីម៉ោង១២យប់ ថ្ងៃទី២០ បិទច្រក់ព្រំដែន» ៕
ចែករំលែកព័តមាននេះ