ខេត្តតាកែវ ៖ ក្មេងស្រីជាសិស្សម្នាក់បានបាត់បង់ជីវិតភ្លាមៗនៅនឹងកន្លែង ហើយក្មេងស្រីជាសិស្សម្នាក់ទៀតបានរងរបួសយ៉ាងធ្ងន់ធ្ងរ ក្នុងហេតុការណ៍គ្រោះថ្នាក់ចរាចរណ៍រវាងរថយន្តមួយគ្រឿងបុកជាមួយម៉ូតូមួយគ្រឿង ។ ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៣និង៥៥នាទីរសៀលថ្ងៃទី១០ មីនា ឆ្នាំ២០២០ ស្ថិតនៅលើផ្លូវលេខ១៣២…
ខេត្តតាកែវ ៖ ក្មេងស្រីជាសិស្សម្នាក់បានបាត់បង់ជីវិតភ្លាមៗនៅនឹងកន្លែង ហើយក្មេងស្រីជាសិស្សម្នាក់ទៀតបានរងរបួសយ៉ាងធ្ងន់ធ្ងរ ក្នុងហេតុការណ៍គ្រោះថ្នាក់ចរាចរណ៍រវាងរថយន្តមួយគ្រឿងបុកជាមួយម៉ូតូមួយគ្រឿង ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៣និង៥៥នាទីរសៀលថ្ងៃទី១០ មីនា ឆ្នាំ២០២០ ស្ថិតនៅលើផ្លូវលេខ១៣២ ចន្លោះគីឡូម៉ែត្រលេខ១១-១២ ក្នុងភូមិព្រៃតាឡី ឃុំត្រពាំងធំខាងជើង ស្រុកត្រាំកក់ ខេត្តតាកែវ ។
តាមប្រភពពីនគរបាលចរាចរស្រុកត្រាំកក់បានអោយដឹងថា ម៉ូតូមួយគ្រឿងខាងលើម៉ាកស៊ុយហ្សុ៊យគីនិច ធុនC110 ពណ៌ស ពាក់ផ្លាកលេខ ភ្នំពេញ 1FJ -4528 បើកបរដោយឈ្មោះ ស៊ុន ស្រីនី ភេទស្រី អាយុ១៥ឆ្នាំ ជាសិស្ស បានបាត់បង់ជីវិត និងអ្នករួមដំណើរម្នាក់ទៀតឈ្មោះ ឌន លីលី ភេទស្រី អាយុ១៤ឆ្នាំ ជាសិស្ស បានរងរបួសធ្ងន់ ។ ជនរងគ្រោះទាំង២នាក់រស់នៅភូមិត្រពាំងទឹក ឃុំជាងទង ស្រុកត្រាំកក់ ខេត្តតាកែវ ។ ចំណែកភាគីខាងរថយន្តមួយគ្រឿងម៉ាកហ៊ីយ៉ាន់ដាយ ប្រភេទបែនដឹកដី ពណ៌ស គ្មានផ្លាកលេខ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ ។
តាមប្រភពដដែលបានឱ្យដឹងថា មុនពេលកើតហេតុ ម៉ូតូបើកបរក្នុងល្បឿនលឿនក្នុងទិសដៅស្របទិសគ្នាជាមួយរថយន្តបែនដឹកដីដែលបើកបរមកពីទិសខាងលិច លុះពេលមកដល់ចំណុចកើតហេតុខាងលើ រថយន្តក៏បានបត់ឆ្វេងចូលចាក់ដី ស្រាប់តែម៉ូតូមកបុកចំពីក្រោយយ៉ាងពេញមួយទំហឹងលាន់ដូចរន្ទះ បណ្តាលឱ្យអ្នកបើកបរម៉ូតូបាត់បង់ជីវិត រីឯអ្នករួមដំណើររងរបួសធ្ងន់ ចំណែកអ្នកបើកបររថយន្តបានរត់គេចខ្លួនបាត់ ។
តាមប្រភពពីសាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេឃើញក្មេងស្រីដែលជាសិស្សសាលាទាំង២នាក់ជិះម៉ូតូមួយគ្រឿងធ្វើដំណើរមកពីទិសខាងកើតទៅ លិច ក្នុងល្បឿនយ៉ាងលឿន លុះមកដល់ចំណុចកើតហេតុ ដោយសារល្បឿនលឿនពេក ក៏ជ្រុលទៅបុករថយន្តដឹកដីពីខាងក្រោយយ៉ាងពេញមួយទំហឹងតែម្តង ។
បន្ទាប់ពីកើតហេតុ ជនរងគ្រោះដែលរងរបួសធ្ងន់ត្រូវបានដឹកយកទៅសង្គ្រោះនៅមន្ទីរពេទ្យបង្អែកក្រុងដូនកែវ ចំណែកជនរងគ្រោះដែលបាត់បង់ជីវិតត្រូវក្រុមគ្រួសារដឹកយកទៅធ្វើបុណ្យតាមប្រពៃណី។
ក្រោយពេលកើតហេតុ រថយន្ត និងម៉ូតូ ត្រូវបានសមត្ថកិច្ចចុះធ្វើការវាស់វែងរួចកសាងសំណុំរឿងយកមករក្សាទុកនៅអធិការដ្ឋាននគរបាលស្រុកត្រាំកក់ រង់ចាំធ្វើការដោះស្រាយគ្នានៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ