រាជធានីភ្នំពេញ ៖ តារាហ្វេសប៊ុកដែលល្បីល្បាញតាមការការសិចស៊ី នាង ថៃ ស្រីនាង បានសន្យានឹងបញ្ឈប់ការ Live វីដេអូបែបសិចស៊ីសម្រាប់ការលក់សម្លៀកបំពាក់របស់ខ្លួនតាមរយៈសង្គមហ្វេសប៊ុកបន្តទៀតហើយ ក្រោយពេលដែលនាងត្រូវបានសមត្ថកិច្ចចាប់ខ្លួនមកធ្វើការអបរំណែនាំ។
ថៃ ស្រីនាង ត្រូវបានសមត្ថកិច្ចចាប់បញ្ជូនយកមកអប់រំ និងណែនាំ ក្រោយពេលដែលនាងបានបង្ហោះនូវខ្លឹមសារតាមបណ្តញសង្គមហ្វេសប៊ុកក្នុងន័យបញ្ចោចបញ្ចាចដាក់ថ្នាក់ដឹកនាំ បន្ទាប់ពីប្រមុខដឹកនាំសម្តេចតេជោ បានបញ្ជាឲ្យបិទរាល់សកម្មភាព និងរូបភាពអ្នកដែលLive លក់ផលិតផលផ្សេងៗដែលមានភាពសិចស៊ីតាមបណ្តាញសង្គមហ្វេសប៊ុក។
បើយោងតាមវីដេអូដែលត្រូវបានបង្ហោះតាមហ្វេសប៊ុករបស់ស្នងការដ្ឋានគរបាលរាជធានីភ្នំពេញ តារាហ្វេសប៊ុក ថៃ ស្រីនាង បានអះអាងថា នាងសូមទោសជាសាធារណៈដល់មហាជនទាំង ឡាយ ដែលកន្លងមក នាងបានធ្វើការ Live លក់សម្លៀកបំពាក់ឈុតខោទ្រនាប់ និងរ៉ូបរាត្រី ដែលសិចស៊ីហួសហេតុ ប្រាស់ចាកពីប្រពៃណី និងទំនៀមទម្លាប់ខ្មែរ ធ្វើឲ្យប៉ះពាល់ដល់តម្លៃស្ត្រីខ្មែរ ។ នាងសង្ឃឹមថា ប្រជាពលរដ្ឋ ស្ថាប័នពាក់ព័ន្ធ និងប្រមុខដឹកនាំ នឹងអភ័យទោសរាល់កំហុសដែលនាងបានធ្វើ ហើយនាងសន្យានឹងឈប់ផុសរូបដែលមានលក្ខណៈសិចស៊ីបែបនេះទៀតហើយ ខណៈពេលដែលនាងបានស្នើឲ្យបងប្អូននៅក្នុងបណ្តាញសង្គមហ្វេសប៊ុកទាំងអស់កុំយកគំរូតាមរូបនាង។
គួររំលឹកថា ថៃ ស្រីនាង គឺជាតារាហ្វេសប៊ុកដ៏ល្បីល្បាញមួយរូបតាមរយៈការ Live វីដេអូបង្ហាញភាពសិចស៊ីយ៉ាងត្រេកត្រអាល ក្នុងពេលដែលផ្សព្វផ្សាយលក់សម្លៀកបំពាក់ខោក្នុង និងរ៉ូបរាត្រីរបស់នារីៗ ក្នុងពេលដែលការ Live វីដេអូលក់ម្តងៗ គឺមានអ្នកចូលមើលច្រើនផងដែរ។
យ៉ាងណា ទន្ទឹមនឹងភាពល្បីល្បាញនេះ ថៃ ស្រីនាង ក៏ទទួលបានការរិះគន់យ៉ាងចាស់ដៃផងដែរ ពីមហាជនមួយចំនួនទៅលើភាពសិចស៊ីហួសហេតុរបស់នាង ប៉ុន្តែនាងហាក់មិនមានការចាប់អារម្មណ៍ និងធ្វើការផ្លាស់ប្តូរសកម្មភាពមួយនេះឡើយ ដោយលេសថា នាងលក់ផលិតផលសម្លៀកបំពាក់សិចស៊ី គឺត្រូវតែស្លៀកបែបនេះ ឲ្យអតិថិជនរបស់នាងបានឃើញដោយផ្ទាល់។
ជាការកត់សម្គាល់ ថៃ ស្រីនាង គឺជាករណីទី១ ដែលត្រូវបានចាប់ខ្លួនយកមកអប់រំ ឆ្លើយតបតាមអនុសាសន៍របស់ប្រមុខដឹកនាំ ក្នុងពេលដែលនៅមានអ្នកលក់ និងតារាមួយចំនួនទៀតដែលតែងតែ Live លក់ផលិតផលនានា ដែលមានលក្ខណៈសិចស៊ីស្រដៀងគ្នានេះផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ