មានការជជែកគ្នាជាច្រើនលើប្រធានបទទាក់ទងទៅនឹងការធ្វើការនៅពេលព្រឹក ។ ខណៈដែលមានមនុស្សមួយចំនួនគិតថាពេលព្រឹកជាពេលដែលពួកគេអាចសម្រេចបានកិច្ចការតិចជាងគេ មនុស្សមួយចំនួនទៀតបានបញ្ជាក់ថាពួកគេអាចធ្វើការបានដោយមានប្រសិទ្ធិភាពជាងគេនៅពេលព្រឹកទៅវិញ ។ ជាក់ស្តែងមនុស្សម្នាក់ៗមានទម្លាប់ធ្វើការខុសៗគ្នា ប៉ុន្តែប្រសិនបើអ្នកចង់បង្កើនប្រសិទ្ធិភាពការងាររបស់អ្នកនៅពេលព្រឹក អ្នកគួរតែធ្វើកិច្ចការពីរនេះជារៀងរាល់យប់ ។
១. ត្រៀមខ្លួនចូលដំណេក
អ្នកមិនអាចក្រោកពីដំណេកពីព្រឹកព្រលឹមទេប្រសិនបើអ្នកមិនចូលដំណេក ឬចូលដំណេកយប់ពេក ។ ហើយវាជាបញ្ហាមួយដែលមនុស្សជាច្រើនកំពុងជួបប្រទះ ការចូលដំណេក និងការមិនចូលដំណេកបានគ្រប់គ្រាន់ ។វិធីមួយដែលអាចដោះស្រាយបញ្ហានេះបាន គឺការមានទម្លាប់ចូលដំណេកឲ្យបានល្អដោយមានការកំណត់ពេលវេលាឲ្យបានច្បាស់លាស់ ។ ដូច្នេះរាល់ពេលនោះមកដល់ អ្នកត្រូវតែគោរពតាមពេលវេលា និងបញ្ឈប់រាល់សកម្មភាពដែលអ្នកធ្វើនិងចូលដំណេកភ្លាម ។ គោលដៅ គឺដើម្បីធ្វើឲ្យរាងកាយរបស់អ្នកទម្លាប់ជាមួយនឹងពេលវេលាដែលធ្វើឲ្យវាត្រៀមខ្លួនសម្រាប់ចូលដំណេកដោយធម្មជាតិ ។
២. បំភ្លេចកិច្ចការក្នុងខួរក្បាល
មនុស្សមួយចំនួនអាចលង់លក់ភ្លាមៗបន្ទាប់ពីឡើងសម្រាកលើគ្រែគេង ខណៈដែលមនុស្សម្នាក់ទៀតត្រូវចាំដល់ ៣០នាទីទៅ ១ម៉ោងទើបអាចលង់លក់ដូចអ្នកដទៃបាន ។ ជាទូទៅមនុស្សដែលមិនអាចលង់លក់ភ្លាមៗជួបនឹងបញ្ហាពីរ គឺអ្នកមានកិច្ចការច្រើនពេកក្នុងមួយថ្ងៃ ឬអ្នកមិនអាចសម្រាកខួរក្បាលបាន ។ បញ្ហាទីពីរ គឺជាលទ្ធផលនៃការគិតពីអ្វីដែលអ្នកមិនបានសម្រេច ឬអ្វីដែលអ្នកត្រូវធ្វើក្នុងថ្ងៃស្អែក ។
ប្រសិនបើអ្នកឧស្សាហ៍គេងគិតពីកិច្ចការ វាប្រហែលជាមកពីខួរក្បាលរបស់អ្នកមិនចង់បំភ្លេចវាចោលដូច្នេះអ្នកអាចអនុវត្តវិធីសាស្ត្រងាយមួយ ។ អ្នកគួរតែទុកសៀវភៅកត់ត្រាមួយជិតគ្រែគេងសម្រាប់កត់ត្រារាល់កិច្ចការដែលអ្នកគិតឃើញនៅពេលយប់ ។
អ្នកមិនគួរប្រើទូរស័ព្ទរបស់អ្នកដើម្បីកត់ត្រាពីវាទេ ព្រោះវាអាចបង្កជាការរំខានអារម្មណ៍ដល់អ្នក ឬធ្វើឲ្យអ្នកងាកទៅប្រើប្រព័ន្ធសង្គមជាដើម ។ ការកត់ត្រានេះជួយបញ្ឈប់អ្នកពីការព្រួយថាអ្នកនឹងភ្លេចធ្វើកិច្ចការនៅថ្ងៃស្អែក ហើយអ្នកនឹងអាចស្ងប់អារម្មណ៍ជាងមុនពេលដែលដឹងថាខ្លួនដឹងច្បាស់ពីកិច្ចការសំខាន់ៗដែលត្រូវបំពេញ ៕ កែសម្រួលដោយ ៖ សុឃាក់
ចែករំលែកព័តមាននេះ