រាជធានីភ្នំពេញ ៖ អភិបាលខេត្តព្រះសីហនុលោក គួច ចំរើន ព្រមានចាត់វិធានការចំពោះអ្នកនៅពីក្រោយខ្នង ដែលអនុញ្ញាត ឬអន្តរាគមន៍ឲ្យសាងសង់សំណង់រំលោភអូរប្រឡាយ ។ លោកគួច…
រាជធានីភ្នំពេញ ៖ អភិបាលខេត្តព្រះសីហនុលោក គួច ចំរើន ព្រមានចាត់វិធានការចំពោះអ្នកនៅពីក្រោយខ្នង ដែលអនុញ្ញាត ឬអន្តរាគមន៍ឲ្យសាងសង់សំណង់រំលោភអូរប្រឡាយ ។ លោកគួច ចំរើនបានលើកឡើងយ៉ាងដូច្នេះថា៖ « ជាការពិតពួកគាត់ គឺកំពុងរំលោភលើអូរប្រឡាយ ប៉ុន្ដែពួកគាត់ គឺជាប្រជាជនយើង យើងក៏ត្រូវតែដោះស្រាយជូនពួកគាត់ដែរ សម្រាប់គ្រួសារដែលគ្មានផ្ទះសម្បែងពិតប្រាកដ» ។
នៅក្នុងពិធីប្រកាសដាក់ឱ្យដំណើរការរចនាសម្ព័ន្ធថ្មី រដ្ឋបាលក្រុងព្រះសីហនុ នាព្រឹកថ្ងៃទី១១ ខែកុម្ភៈនេះ លោក គួច ចំរើន អភិបាលនៃគណៈអភិបាលខេត្តព្រះសីហនុបានលើកឡើងពីបញ្ហាការងារស្ដា និងរៀបចំអូរប្រឡាយ ដែលក្នុងនោះក៏ចាំបាច់ត្រូវធ្វើការរុះរើចំពោះសំណង់ទាំងឡាយណាដែលបានរំលោភលើអូរប្រឡាយ ។ ចំពោះបញ្ហានេះ លោកអភិបាលបានគូសបញ្ជាក់ថា ៖«មិនមែនខ្ញុំមិនដឹងទេ ខ្ញុំដឹង យើងកំពុងប្រឹងប្រែងសិក្សារកទីតាំង ដីសង្គមកិច្ច រកទីតាំងសមរម្យ ពេលរៀបចំរួចនឹងនាំពួកគាត់ទៅមើល» ។
ជាមួយគ្នានោះដែរ លោកអភិបាលខេត្តក៏បានព្រមានផងដែរ ចំពោះអ្នកឆ្លៀតឱកាសបង្កើតបញ្ហា រំលោភលើអូរប្រឡាយនេះ អ្នកដែលនាំបង្កបញ្ហាទាំងនោះនឹងត្រូវប្រឈមចំពោះមុខច្បាប់ ដោយគ្មានការលើកលែងជាមួយគ្នានេះ លោកបានក្រើនរំលឹកដល់មន្ដ្រីគ្រប់រូបកុំពាក់ព័ន្ធគ្រប់បញ្ហា គឺកុំពាក់ព័ន្ធ កុំនៅក្រោយខ្នងកុំអន្ដរាគមន៍ ។
លោកបានក្រើនរំលឹកដល់ មេឃុំ/ចៅសង្កាត់ ត្រូវខិតខំក្នុងការបម្រើ និងផ្ដល់សេវាសាធារណៈដល់ប្រជាពលរដ្ឋអោយបានលឿនធ្វើអោយត្រូវ និងមានតម្លាភាព ។ នៅពេលដែលធ្វើការល្អផ្ដល់សេវាជូនប្រជាពលរដ្ឋ បានលឿន ត្រឹមត្រូវ និងមានតម្លាភាព ប្រជាពលរដ្ឋប្រាក ដជាគោរពស្រឡាញ់ និងគាំទ្រជាក់ជាមិនខាន ៕ កែសម្រួលដោយ ៖ សុឃាក់
ចែករំលែកព័តមាននេះ