ខេត្តបន្ទាយមានជ័យ ៖ អគ្គីភ័យឆាបឆេះលើខ្នងភ្នំបាក់ក្បែរវត្តភ្នំបាក់ចាប់តាំងពីវេលាម៉ោង៩ព្រឹកថ្ងៃទី១០ ខែកុម្ភៈ ឆ្នាំ២០២០ ស្ថិតក្នុងភូមិភ្នំបាក់ សង្កាត់ទឹកថ្លា ក្រុងសិរីសោភ័ណ ហើយភ្លើងឆេះអស់រយៈពេលជិត៥ម៉ោងទើបពន្លត់បាន ដោយកម្លាំងសមត្ថកិច្ចប្រើប្រាស់ធុងបាញ់ថ្នាំដាក់ទឹក…
ខេត្តបន្ទាយមានជ័យ ៖ អគ្គីភ័យឆាបឆេះលើខ្នងភ្នំបាក់ក្បែរវត្តភ្នំបាក់ចាប់តាំងពីវេលាម៉ោង៩ព្រឹកថ្ងៃទី១០ ខែកុម្ភៈ ឆ្នាំ២០២០ ស្ថិតក្នុងភូមិភ្នំបាក់ សង្កាត់ទឹកថ្លា ក្រុងសិរីសោភ័ណ ហើយភ្លើងឆេះអស់រយៈពេលជិត៥ម៉ោងទើបពន្លត់បាន ដោយកម្លាំងសមត្ថកិច្ចប្រើប្រាស់ធុងបាញ់ថ្នាំដាក់ទឹក ដើម្បីបាញ់ពន្លត់ភ្លើង ។
លោក ហ៊ឹល រ៉ាយ៉ា អភិបាលក្រុងសិរីសោភ័ណបានប្រាប់ថា នេះជាលើកទី២ហើយដែលអគ្គីភ័យឆាបឆេះលើខ្នងភ្នំ ហើយជាក់ស្តែងនៅវេលាម៉ោងកើតហេតុខាងលើមានអគ្គីភ័យបានឆាបឆេះលើខ្នងភ្នំបាក់នៅក្បែរវត្តភ្នំបាក់ ដោយមានការអន្តរាគមន៍ពីកម្លាំងនគរបាល កម្លាំងកងរាជអាវុធហត្ថ កម្លាំងយោធាតំបន់ប្រតិបត្តិការសឹករងខេត្ត និងមន្ត្រីរាជការប្រមាណជាង១០០នាក់បានជួយពន្លត់ផងដែរ។
លោកបានបញ្ជាក់ថា នៅពេលពន្លត់ភ្លើងលើខ្នងភ្នំបាក់ពិតជាជួបការលំបាក ដោយចូលព្រៃមានបន្លាច្រើនមិនអាចចូលបាន ទើបយកធុងបាញ់ថ្នាំដាក់ទឹកស្ពាយឡើងបាញ់ពន្លត់ទើបភ្លើងបានរលត់នៅវេលាម៉ោង១រសៀលថ្ងៃដដែល ហើយលោកសូមកោតសសើរចំពោះកងកម្លាំងដែលបានជួយអន្តរាគមន៍ពន្លត់ទាន់ពេលវេលា ។ ចំពោះមូលហេតុបណ្តាលឱ្យមានអគ្គិភ័យឆាបឆេះ មិនទាន់ដឹងនៅឡើយទេ។
លោក ហ៊ឹល រ៉ាយ៉ា បានបញ្ជាក់ថា អាជ្ញាធរនៅតែមានការព្រួយបារម្ភចំពោះគ្រោះអគ្គិភ័យ ព្រោះក្រុងសិរីសោភ័ណមានភ្នំក្នុងទីប្រជុំគឺទំហំធំធេងរួមមានភ្នំស្វាយ, ភ្នំដូងព្រះ, ភ្នំខ្លាកូន, ភ្នំបាក់, ភ្នំជញ្ជាំង និងភ្នំកងវ៉ា ។ កាលពីថ្ងៃទី៨ ខែកុម្ភៈ ឆ្នាំ២០២០កន្លងទៅ ត្រូវជាថ្ងៃបុណ្យមាឃបូជា ហើយនៅយប់នោះអគ្គិភ័យបានឆេះភ្នំចំនួន២កន្លែងរួមមានភ្នំបាក់ និងភ្នំកងវ៉ា គឺឆេះដោយសារមូលហេតុដុតគមហោះទើរជាប់ចុងឈើលើខ្នងភ្នំ បង្កជាអគ្គិភ័យឆាបឆេះទាំងកណ្តាលយប់ និងបង្កការភ្ញាក់ផ្អើលដល់កម្លាំងសមត្ថកិច្ចចុះជួយអន្តរាគមន៍ពន្លត់។
លោកបានបញ្ជាក់ថា នៅតែមានការព្រួយបារម្ភ ខណៈរដូវប្រាំងបានអូសបន្លាយក្លាយជាអគ្គិភ័យឆេះភ្នំទៀត ដោយរថយន្តពន្លត់អគ្គីភ័យមិនអាចឡើងភ្នំពន្លត់បានទេ គឺមានតែអាជ្ញាធររកថវិកាទិញធុងម៉ាស៊ីនបាញ់ថ្នាំជាច្រើនធុងទុកដាក់ទឹកសម្រាប់ទុកការពារនៅពេលដែលមានភ្លើងឆេះលើខ្នងភ្នំ គឺដាក់ទឹកឡើងបាញ់ពន្លត់ទើបបាន៕ (កែសម្រួលដោយ ៖ ធីតា)
ចែករំលែកព័តមាននេះ