ខេត្តបាត់ដំបង ៖ មន្ត្រីការិយាល័យព្រហ្មទណ្ឌកំរិតធ្ងន់ ហាក់មានការអល់អែកអំពីចំណាត់ការបន្តតាមផ្លូវច្បាប់ចំពោះខ្មាន់កាំភ្លើងម្នាក់ ដែលគេស្គាល់ច្បាស់ថា ជាមន្ត្រីជលផលដែលបានបាញ់គំរាមពលរដ្ឋ បន្ទាប់ពីខ្មាន់កាំភ្លើងរូបនេះ បានចូលខ្លួនស្ងាត់ៗទៅឆ្លើយសារភាពនៅចំពោះមុខសមត្ថកិច្ច និងបានបង់ប្រាក់ចំនួន៦០ម៉ឺនរៀលឱ្យទៅជនរងគ្រោះ ដែលគេអះអាងថា…
ខេត្តបាត់ដំបង ៖ មន្ត្រីការិយាល័យព្រហ្មទណ្ឌកំរិតធ្ងន់ ហាក់មានការអល់អែកអំពីចំណាត់ការបន្តតាមផ្លូវច្បាប់ចំពោះខ្មាន់កាំភ្លើងម្នាក់ ដែលគេស្គាល់ច្បាស់ថា ជាមន្ត្រីជលផលដែលបានបាញ់គំរាមពលរដ្ឋ បន្ទាប់ពីខ្មាន់កាំភ្លើងរូបនេះ បានចូលខ្លួនស្ងាត់ៗទៅឆ្លើយសារភាពនៅចំពោះមុខសមត្ថកិច្ច និងបានបង់ប្រាក់ចំនួន៦០ម៉ឺនរៀលឱ្យទៅជនរងគ្រោះ ដែលគេអះអាងថា «ជាថ្លៃសោហ៊ុយសម្រាប់ធ្វើដំណើរ ទៅជួបចរចាគ្នានៅស្នងការខេត្ត កាលពីរសៀលថ្ងៃទី២៩ មករា តែមិនមែនជាសំណងជំងឺចិត្តទេ» ។
សំណុំរឿងនេះ ត្រូវគេបង្ហើបឲ្យដឹងថា ភាគីទាំង២ទំនងអាចត្រូវបានគេបញ្ចុះបញ្ចូលឲ្យធ្វើការសម្របសម្រូលបញ្ចប់រឿងស្ងាត់ៗ ត្រឹមស្នងការខេត្ត ជាថ្នូរនឹងទឹកប្រាក់ចំនួន៦០ម៉ឺនរៀលដែលជនរងគ្រោះអះអាងថា «ជាទឹកប្រាក់ដែលជនបង្កឲ្យខ្ញុំគ្រាន់តែសម្រាប់ធ្វើដំណើរមកជួបចរចាគ្នានៅស្នងការខេត្តតែប៉ុណ្ណោះ តែមិនមែនជាទឹកប្រាក់បង់សំណងជំងឺចិត្តទេ»។ ជនរងគ្រោះ គឺលោក ឆូយ វ៉ាត បានបញ្ជាក់ប្រាប់កោះសន្តិភាព នៅព្រឹកថ្ងៃទី៣០ មករា ថា គាត់បានជួបចរចាគ្នា ជាមួយជនសង្ស័យឈ្មោះខៀវ នី ដែលជាមន្ត្រីជលផល កាលពីរសៀលថ្ងៃទី២៩ មករា នៅការិយាល័យព្រហ្មទណ្ឌកំរិតធ្ងន់។
លោកឆូយ វ៉ាត បាននិយាយថា «ការជួបនោះ មានអ្នកអន្តរាគមន៍ច្រើនពេក ហាក់ដូចជាដាក់សម្ពាធមកលើរូបគាត់ ដែលធ្វើឲ្យគាត់មិនអាចទាមទារសំណងឱ្យបានសមរម្យ ។ ជាពិសេស ខាងបក្សពួកមន្ត្រីជលផលតែម្ដង ។ ទីបំផុត គាត់ទទូលបានប្រាក់ត្រឹមតែ៦០ម៉ឺនរៀលប៉ុណ្ណោះ ដែលគេឲ្យគ្រាន់ជាសោហ៊ុយសម្រាប់ថ្លៃធ្វើដំណើរមកស្នងការខេត្ត ហើយសូមឱ្យគាត់មានការយោគយល់…។
ជាមួយនឹងថ្លៃធ្វើដំណើរ៦០ម៉ឺនរៀល ដើម្បីបញ្ចប់បញ្ហាជាមួយជនរងគ្រោះ គេមិនដឹងថា តើសំណុំរឿងលោកជលផល ឈ្មោះខៀវ នី ដែលប្រើកាំភ្លើងបាញ់គំរាមពលរដ្ឋនេះ ត្រូវបានមន្ត្រីការិយាល័យព្រហ្មទណ្ឌកំរិតធ្ងន់ មានចំណាត់ការបញ្ជូនបន្តទៅកាន់តុលាការដែរ ឬបែបណានោះទេ ។ ព្រោះមានប្រភពព័ត៌មានខ្សឹបខ្សៀវខ្លះៗបានបង្ហើបឲ្យដឹងថា មានបក្សពួករបស់មន្ត្រីជលផលជាច្រើនបានទូរស័ព្ទខ្វាត់ខ្វែងសម្បើមណាស់ និងខ្លះទៀតអមដំណើរឈ្មោះខៀវ នី នេះ ដោយផ្ទាល់មកកាន់ស្នងការខេត្ត ដើម្បីអន្តរាគមន៍ សុំឱ្យសមត្ថកិច្ចជួយបញ្ចប់សំណុំរឿងនេះ ដោយមិនចាំបាច់បញ្ជូនបន្តទៅតុលាការ ក្នុងនោះក៏មានមេជលផលខេត្តផងដែរ ។
ជុំវិញព័ត៌មានមិនប្រក្រតីលើសំណុំរឿងមន្ត្រីជលផលបាញ់គំរាមពលរដ្ឋខាងលើនេះ លោកឧត្តមសេនីយ៍ត្រី ជេត វណ្ណនី ស្នងការខេត្ត ហាក់មិនបានបំភ្លឺជាក់លាក់អំពីចំណាត់ការបន្តតាមផ្លូវច្បាប់បែបណា ចំពោះជនសង្ស័យឈ្មោះ ខៀវ នី ជាមន្ត្រីជលផលនេះទេ ។ ប៉ុន្តែលោកស្នងការរងបានជម្រុញឲ្យសួរនាំទៅមន្ត្រីក្រោមឱវាទ ដែលកាន់សំណុំរឿងនេះ នៅការិយាល័យព្រហ្មទណ្ឌកំរិតធ្ងន់ទៅវិញ។ លោកសន លុច នាយរងការិយាល័យព្រហ្មទណ្ឌកំរិតធ្ងន់ ដែលទទូលចាត់ការលើសំណុំរឿងនេះ ក៏លោកមិនបានផ្ដល់ព័ត៌មានជាក់លាក់ដែរ អំពីករណីនេះ នៅពេលថ្លែងប្រាប់កោះសន្តិភាពតាមទូរស័ព្ទ នៅព្រឹថ្ងៃទី៣០ មករា ។ លោកសន លុច គ្រាន់តែបានបញ្ជាក់ថា ជនរងគ្រោះពិតជាបានទទូលយកប្រាក់ចំនួន៦០ម៉ឺនរៀលពីភាគីបង្កមែន ដោយសារតែមានការស្នើសុំពីភាគីមន្ត្រីជលផលឲ្យមានការអធ្យាស្រ័យយោគយល់ និងដើម្បីបញ្ចប់បញ្ហា ។
ប៉ុន្តែចំពោះចំណាត់បន្តលើសំណុំរឿងព្រហ្មទណ្ឌ ពាក់ព័ន្ធនឹងតុលាការវិញ លោកនាយរងការិយាល័យជំនាញរូបនេះបានប្រាប់ថា «ខ្ញុំមិនទាន់ដឹងថា ត្រូវមានចំណាត់ការបែបណាទេ ព្រោះកំពុងរង់ចាំគោលការណ៍របស់ថ្នាក់លើ..» ។ បានន័យថា លោកសន លុច នៅតែគ្មានភាពប្រាកដប្រជាក្នុងការបញ្ជូនសំណុំរឿងបន្តទៅតុលាការ តែយ៉ាងណា លោកបានជម្រុញឲ្យកោះសន្តិភាពសួរត្រឡប់ទៅលោកស្នងការរង ជេត វណ្ណនី វិញអំពីនីតិវិធីបន្តនោះ ចំពោះរូបលោករង់ចាំតែបទបញ្ជាតែប៉ុណ្ណោះ។
សូមរំលឹកថា មន្ត្រីជលផលឈ្មោះខៀវ នី ត្រូវបានពលរដ្ឋឈ្មោះឆូយ វ៉ាត ភេទប្រុស អាយុ៥៦ឆ្នាំ និងគួរកន២នាក់ទៀត ប្ដឹងចោទប្រកាន់ថា បានប្រើប្រាសកាំភ្លើងខ្លី បាញ់គំរាមពួកគាត់ចំនួន៣គ្រាប់ កាលពីយប់ថ្ងៃទី៣មករា ពេលកំពុងធ្វើដំណើរតាមកាណូតសណ្ដោង ដល់ត្រង់ចំណុចឡូត៏នេសាទលេខ២ ស្ថិតក្នុងភូមិព្រែកទាល់ ឃុំកោះជីវាំង ស្រុកឯកភ្នំ ។ ជនរងគ្រោះបាននិយាយថា ជនសង្ស័យឈ្មោះខៀវ នី រួមនិងបក្សពួក៣នាក់ទៀត បានជិះកាណូតតាមបាញ់គំរាមពួកគាត់ ដោយសង្ស័យថា ពួកគាត់មានដឹកបទល្មើសនេសាទ តែក្រោយពីត្រូតពិនិត្យមិនឃើញមានវត្ថុតាង បែរជាស្រែកជេរប្រមាថពួកគាត់យ៉ាងចាស់ដៃទាំងស្រវឹងជោកជាំ រួចបាញ់គំរាមថែម១គ្រាប់ទៀត ហើយក៏បើកកាណូតចេញបាត់ទៅ។ ជនរងគ្រោះបានបញ្ជាក់ថា តាមពិតពួកគាត់បើកកាណូតសណ្ដោងគ្នាពេលយប់ ដោយសារតែកាណូតមួយគ្មានភ្លើងបំភ្លឺ គឺមិនមែនដឹកបទល្មើសដូចការប៉ាន់ស្មានរបស់មន្ត្រីជលផលដ៏មហិមានោះទេ។
ពាក់ព័ន្ធនឹងការប្រើប្រាសអាវុធបាញ់គំរាមកំហែង ឬបាញ់បោះសេរីនេះ គេនៅចាំបានថា ជារឿយៗ សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា តែងបានដាក់ចេញនូវបទបញ្ជាយ៉ាងតឹងរឹង និង ជាញឹមញាប់ដល់មន្ត្រីអនុវត្តច្បាប់។ ជាពិសេស សមត្ថកិច្ច និងតុលាការ ត្រូវតែចាត់វិធានការតាមផ្លូវច្បាប់ ដោយគ្មានការលើកលេងឡើយ ចំពោះបុគ្គលនានា មិនថា អ្នកតូចឬអ្នកធំប៉ុនណានោះទេ ដែលប្រើប្រាស់កាំភ្លើងបាញ់គំរាមអ្នកដទៃ ឬបាញ់បោះសេរី។ ប៉ុន្តែកន្លងមក គេសង្កេតឃើញនៅក្នុងខេត្តបាត់ដំបង ករណីបាញ់គំរាមកំហែង ឬ បាញ់បោះសេរីបែបនេះ តែងកើតមានជាបន្តបន្ទាប់ ដែលបង្កឡើងដោយបុគ្គលមានអំណាច តែគេមិនដែលឃើញ សមត្ថកិច្ចឃាត់ខ្លួនចាត់ការតាមបទបញ្ជាសម្ដេច ហ៊ុន សែន ម្ដងណាទេ មានតែការឃុបឃិតគ្នាជួយបិទបាំង បិទបញ្ជប់សំណុំរឿងស្ងាត់ៗ ក្រោយពីបង់សំណងបន្តិច
បន្តួចដល់ភាគីរងគ្រោះ។
ជាក់ស្ដែង ដំណាក់កាលចុងក្រោយនេះ គេកំពុងរង់ចាំមើលសំណុំរឿងព្រហ្មទណ្ឌ ដែលបង្កដោយមន្ត្រីជលផលឈ្មោះ ខៀវ នី ដែលដកកាំភ្លើងខ្លីបាញ់៣គ្រាប់ គំរាមពលរដ្ឋចំនួន៣នាក់ នៅកណ្ដាលបឹងទន្លេសាបទាំងកណ្ដាលអធ្រាត្រខាងលើនេះថា តើសមត្ថកិច្ចនឹងចាត់វិធានការបន្តបែបណា ក្រោយពីបង់ប្រាក់ចំនួន៦០ម៉ឺនរៀលដល់ជនរងគ្រោះ សម្រាប់ជាសោហ៊ុយធ្វើដំណើរ និងជាថ្នូរដើម្បីបញ្ចប់រឿងត្រឹមស្នងការ
ខេត្ត ? ឬបទបញ្ជារបស់ប្រមុខរាជរដ្ឋាភិបាល នៅតែសាបរលាបដូចទឹកទន្លេដដែល ?
ចែករំលែកព័តមាននេះ