ពាក្យ​មួយ​ម៉ាត់​ដែល​ជួយ​ឲ្យ​លោក Steve Jobs ជោគជ័យ


មនុស្ស​ជា​ច្រើន​ស្គាល់​លោក ស្ទី​វ ចបស៍ (Steve Jobs) ជា​ស្ថាបនិក​របស់​ក្រុមហ៊ុន Apple តែ​លោក​ក៏​ជា​ស្ថាបនិក​របស់​ក្រុមហ៊ុន NeXT និង​បាន​ដឹកនាំ​ឲ្យ​ក្រុមហ៊ុន Pixar ក្លាយជា​ក្រុមហ៊ុន​ដ៏​ជោគជ័យ​ក្នុង​វិស័យ​ភាពយន្ត​ដែរ ។

អ្នក​ប្រហែលជា​គិត​ថា ដើម្បី​សម្រេច​បានការ​ជោគជ័យ​ទាំងនេះ លោក ចបស៍ ត្រូវ​តែ​ធ្វើ​កិច្ចការ​ខុស​ៗ​គ្នា​ជា​ច្រើន​ក្នុង​ពេល​តែ​មួយ ប៉ុន្តែ​ការ​ពិត​ជាក់ស្តែង លោក​មិនមែន​ជា​មនុស្ស​ដូច្នេះ​ទេ ។ ផ្ទុយ​មក​វិញ លោក​ជា​មនុស្ស​ដែល​ពូកែ​ផ្តោត​ស្មារតី និង​កម្លាំង​លើ​កិច្ចការ​មួយ​ៗ​ទៅ​វិញ ។

ក្នុង​ស​ន្និ​សិ​ទ Apple Worldwide Developers ក្នុង​ឆ្នាំ ១៩៩៧ លោក​បាន​ចែករំលែក​ទស្សនៈ​ដ៏​មាន​តម្លៃ​មួយ​ថា «​មនុស្ស​គិត​ថា​ការ​យកចិត្តទុកដាក់​លើ​ការងារ​មាន​ន័យ​ថា​ពួក​គេ​ត្រូវ​តែ​ទទួលយក​ការងារ​ដែល​អ្នក​ត្រូវ​តែ​យកចិត្តទុកដាក់​លើ ប៉ុន្តែ​វា​មិន​មាន​ន័យ​ដូច្នេះ​ទេ ។ វា​មាន​ន័យ​ថា​អ្នក​ត្រូវ​បដិសេធ​នឹង​គំនិតល្អ​ៗ​ជា​ច្រើន ។ អ្នក​ត្រូវ​តែ​ជ្រើសរើស​ឲ្យ​បាន​ប្រុង​ប្រយ័ត្ន ។ ខ្ញុំ​ពិតជា​មាន​មោទនភាព​នឹង​អ្វី​ដែល​ពួក​យើង​មិន​បាន​ជ្រើសរើស​ធ្វើ​ណាស់​» ។

ប្រាកដ​ណាស់ វា​មិន​មាន​ន័យ​ថា​អ្នក​ត្រូវ​តែ​បដិសេធ​នឹង​ការងារ​គ្រប់ពេលវេលា​ទេ តែ​អ្នក​ត្រូវ​ដឹង​ថា​ការងារ​ណា​ជា​ការងារ​ដែល​អ្នក​មិន​ត្រូវធ្វើ ។ ខាងក្រោម​គឺជា​ឧទាហរណ៍​មួយ​ចំនួន​នៃ​ការងារ​ដែល​អ្នក​មិន​គួរ​ធ្វើ​ដោយ​ខ្លួនឯង​៖

១. ធ្វើ​អ្វី​គ្រប់យ៉ាង​ដោយ​ខ្លួនឯង​៖
ពាក្យ​ថា ប្រសិនបើ​អ្នក​ចង់​សម្រេច​បានការ​ងារ​ល្អ អ្នក​ត្រូវ​តែ​ធ្វើ​អ្វី​គ្រប់យ៉ាង​ដោយ​ខ្លួនឯង​តែងតែ​ធ្វើ​ឲ្យ​មនុស្ស​ជា​ច្រើន​ដើរ​ផ្លូវខុស ។ មនុស្ស​គ្រប់​គ្នា​មាន​ពេល​តែ ២៤​ម៉ោង​ប៉ុណ្ណោះ​ក្នុង​មួយ​ថ្ងៃ ហើយ​បើ​អ្នក​ចង់​សម្រេច​បានការ​ងារ​ច្រើន អ្នក​ត្រូវ​តែ​មាន​សមត្ថភាព​ខ្ពស់​ក្នុង​ការ​បែងចែក​ការងារ​ដោយ​មាន​ប្រសិទ្ធិ​ភាព ។សម្រាប់​លោក ចបស៍ វា​មាន​ន័យ​ថា​លោក​ត្រូវ​តែ​រក​មនុស្ស​ដែល​មាន​សមត្ថភាព​ខ្ពស់​ឲ្យ​នៅ​ជុំវិញ​ខ្លួន​លោក ហើយ​ឈាន​ជើង​ថយក្រោយ​ដើម្បី​ឲ្យ​ពួក​គេ​បំពេញការងារ​តាម​ជំនាញ​រៀង​ៗ​ខ្លួន ។

២. ភាព​ស្មុគស្មាញ​ដែល​មិន​ចាំបាច់​៖
ភាព​សាមញ្ញ គឺ​ពិតជា​សំខាន់​ណាស់ ហើយ​វា​ជា​ផ្នែក​មួយ​ដ៏​មាន​តម្លៃ​នៃ​ការងារ​របស់​លោក ចបស៍ ។ លោក​ចបស៍​គិត​ថា ភាព​ស្មុគស្មាញ​ជា​មុខសញ្ញា​បង្ហាញ​ថា​មនុស្ស​ម្នាក់​មិន​ចំណាយពេល​គ្រប់គ្រាន់​ក្នុង​ការ​ពិចារណា​ឲ្យ​បាន​ដិត​ដល់ និង​ធ្វើ​ឲ្យ​គំនិត​ដែល​ស្មុគស្មាញ​ក្លាយជា​គំនិត​ដែល​ងាយស្រួល និង​ល្អ ។

៣. ឱកាស​ដែល​មិន​ស័​ក្កិ​សម​នឹង​ខ្លួនឯង​៖
ឱកាស​មាន​រូបរាង​ជា​ច្រើន និង​ប្រភេទ​ជា​ច្រើន ហើយ​មនុស្ស​ងាយ​នឹង​ធ្លាក់​ក្នុង​អន្ទាក់​នៃ​ការ​ជ្រើសរើស​ផ្លូវ​ដើរ​ខុសពេល​ដែល​មើលឃើញ​មាន​ជម្រើស​ច្រើន ។ ការ​យល់​ស្រប​នឹង​ឱកាស​ទាំងនេះ​នឹង​ធ្វើ​ឲ្យ​អ្នក​រវល់​គ្មាន​ពេល​ដកដង្ហើម ប៉ុន្តែ​វា​មិន​ធ្វើ​ឲ្យ​អ្នក​សប្បាយ​រីករាយ ឬ​ក្លាយជា​មនុស្ស​ជោគជ័យ​ឡើយ ៕ កែសម្រួល​ដោយ ៖ សុ​ឃា​ក់

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ