រាជធានីភ្នំពេញ ៖ក្រុមព្រះសុរិយាដែលជាក្រុមស្រាវជ្រាវភាពយន្ត និងចម្រៀងខ្មែរពីសម័យដើមនោះ បានសម្តែងការមិនពេញចិត្តចំពោះការលើកយកបទ«ព្រោះតែអូន» មកកាឡៃជាស្រីច្រៀងវិញនោះ គឺវាហាក់ដូចជាប្រាសចាកទាំងស្រុងពីតថភាពក្នុងសង្គមខ្មែរ។ ការអះអាងរបស់ក្រុមព្រះសុរិយាបានធ្វើឡើង បន្ទាប់ពីបទចម្រៀង «ព្រោះតែអូន» ដែលជាសំនៀងដើមរបស់អធិរាជសំឡេងមាសលោក…
រាជធានីភ្នំពេញ ៖ក្រុមព្រះសុរិយាដែលជាក្រុមស្រាវជ្រាវភាពយន្ត និងចម្រៀងខ្មែរពីសម័យដើមនោះ បានសម្តែងការមិនពេញចិត្តចំពោះការលើកយកបទ«ព្រោះតែអូន» មកកាឡៃជាស្រីច្រៀងវិញនោះ គឺវាហាក់ដូចជាប្រាសចាកទាំងស្រុងពីតថភាពក្នុងសង្គមខ្មែរ។ ការអះអាងរបស់ក្រុមព្រះសុរិយាបានធ្វើឡើង បន្ទាប់ពីបទចម្រៀង «ព្រោះតែអូន» ដែលជាសំនៀងដើមរបស់អធិរាជសំឡេងមាសលោក ស៊ីន ស៊ីសាមុត ត្រូវបានលើកយកមកច្រៀងឡើងវិញ(cover) ដោយតារាចម្រៀងស្រីវ័យក្មេងនាងសោភា ទេពី។ បទចម្រៀងនេះបានទទួលការពេញនិយមយ៉ាងខ្លាំងពីស្រទាប់យុវវ័យ បន្ទាប់ពីការយកមកច្រៀងឡើងវិញផងដែរពីតារាចម្រៀងកូនខ្មែរកាត់អាមេរិកាំងលោក chay chau។
ក្រុមព្រះសុរិយាហាក់មិនបានវាយប្រហារចំពោះតារាចម្រៀងណាម្នាក់ដែលយកបទចម្រៀងនេះមកបកស្រាយឡើងវិញនោះឡើយ តែផ្ទុយទៅវិញវាគ្រាន់តែជាការផ្តល់គំនិតគួរពិចារណាទៅលើខ្លឹមសារនៃបទចម្រៀងដែលមិនសមស្របទៅនឹងការបកស្រាយដោយនារីនោះឡើយ ។
បើយោងតាមអ្វីដែលក្រុមព្រះសុរិយាបានសរសេរបង្ហោះសារតាមហ្វេសប៊ុកនោះបញ្ជាក់ថា «បទ«ព្រោះតែអូន» ជាចម្រៀងមរតកមាសដែលបានចេញផ្សាយនៅចុងទសវត្សឆ្នាំ៦០ បទភ្លេងបរទេស (ចិន) , ទំនុកច្រៀង ដោយញ៉ែម ផុន ហៅកុក និងសម្រួលតន្ត្រីដោយ លោកសំ សាខន ហើយបកស្រាយយ៉ាងពីរោះជាប់បេះដូងដោយអធិរាជសំឡេងមាសស៊ីន ស៊ីសាមុត ដែលបានរៀបរាប់សរសើរ និងលើកតម្លៃនៃសម្រស់នារីប្រៀបដូចបុប្ផានៅក្នុងសួន ដែលមានកន្លង់ជាច្រើនចោមរោមប្រតិព័ទ្ធចង់ក្រេបលំអកេសរ ។
ក្នុងពេលថ្មីៗនេះ បទ ព្រោះតែអូន នេះត្រូវបានបងប្អូនខ្មែរយើងនៅបរទេសយកមកច្រៀងប្រគំឡើងវិញ តាមសំណៅដើមនៃទំនុកច្រៀង រួមទាំងបានច្នៃភ្លេងតាមបែបទំនើបកម្ម បកស្រាយដោយអ្នកចម្រៀងបុរសម្នាក់ ហើយក៏៏ទទួលបានការគាំទ្រយ៉ាងខ្លាំងក្លាក្នុងស្រទាប់យុវវ័យគ្រប់ទិសទី ។ រយៈពេលប៉ុន្មានថ្ងៃក្រោយ ពេលដែលបទចម្រៀងប្រគំថ្មី (Cover) មួយនេះ បានចេញផ្សាយ និងទទួលបានជោគជ័យពីយុវវ័យនោះ ក៏យើងឃើញមានផលិតកម្មក្នុងស្រុកយកបទចម្រៀងនោះមករៀបចំប្រគំឡើងវិញជាថ្មីដែរ តែខុសគ្នាត្រង់ថាបទនេះច្រៀងដោយអ្នកចម្រៀងស្រីទៅវិញ ហើយដាក់ចំណងជើងថា «ព្រោះតែបង»។
បទព្រោះតែបង ដែលគេដឹងថាជាបទចម្រៀងច្នៃពីបទ «ព្រោះតែអូន» របស់លោកស៊ីន ស៊ីសាមុត ត្រូវបានអ្នកប្រគំឡើងវិញយកខ្លឹមសារទាំងស្រុងមកច្រៀងឡើងវិញស្ទើរតែ៩០ភាគរយ ដោយគ្រាន់តែកែពាក្យថា អូន ទៅជាបង , ស្រី ទៅ ប្រុស តែប៉ុណ្ណោះ ឯពាក្យដទៃទៀតនៅរក្សាដដែល »។
បើតាមក្រុមព្រះសុរិយាថា «យើងពិតជាពិបាកយល់ណាស់ត្រង់ចំណុចនេះ ដែលអ្នកយកមកផលិតនោះពុំបានពិនិត្យមើលខ្លឹមសារ ឬយ៉ាងណា? ឃ្លាទី១ នៃបទនេះអ្នកចម្រៀងស្រីបានច្រៀងសរសើរសម្រស់របស់បុរសភេទ ប្រៀបដូចជាបុប្ផាក្នុងសួន តើអត្ថន័យនេះត្រូវនឹងតថាភាពពិតនៃសង្គមខ្មែរទេ ? ហើយការសរសើរបែបនេះខុសប្រាសចាកពីពាក្យព្រេងបុរាណប្រពៃណីនៃជាតិយើងទេ ? តាំងពីបុរាណាចារ្យមកការប្រដូចពាក្យ បុប្ផា សម្ដៅតែលើនារីទេ។ ពិតណាស់! យើងក៏បានឃើញមានមហាជនជាច្រើនបានជជែកចំអក ហើយសួរថា អ្នកធ្វើនេះធ្វើដើម្បីអ្វី ? ហើយមានបានពិនិត្យមើលខ្លឹមសារទេ ?
ឬមួយចេះតែធ្វើៗដោយគ្មានគិត ហើយអ្នកចម្រៀងចេះតែច្រៀងដោយគ្មានយ។ យ៉ាងណាត្រង់ចំណុចនេះ យើងខ្ញុំពុំមានចេតនាវាយប្រហារទៅលើអស់លោកអ្នកនាងឡើយ គ្រាន់តែផ្តល់ជាសុភវិនិច្ឆ័យមួយដែលគួរពិចារណាឡើងវិញ ។ យើងខ្ញុំពិតជាអរគុណណាស់ចំពោះការយកបទចម្រៀងពីដើមៗមកប្រគំឡើងវិញដើម្បីអោយយុវវ័យបានស្គាល់ តែសូមមេត្តាពិនិត្យ និងកែតម្រូវនូវចំណុចមួយចំនួនដែលអាចប៉ះពាល់ និងអ្វីដែលយើងធ្លាប់មានក្នុងជីវភាពប្រជាជនយើងតាំងពីដើមរៀងមក»៕ (កែសម្រួលដោយ ៖ បុប្ផា) (ប្រភពវីដេអូ ៖ Mulansph & FunRemix2)
ចែករំលែកព័តមាននេះ