ខេត្តមណ្ឌលគិរី ៖ ក្បាលជ្រូក មាន់ស្ងោរ ស្រា.ស និងផ្លែឈើជាច្រើនមុខ ត្រូវបានអាជ្ញាធរ សហការជាមួយមន្ទីរអប់រំខេត្ត យកទៅដាក់សែនព្រេនថ្វាយដល់អ្នកតាម្ចាស់ទឹកម្ចាស់ដី នៅបរិវេណវិទ្យាល័យហ៊ុនសែន…
ខេត្តមណ្ឌលគិរី ៖ ក្បាលជ្រូក មាន់ស្ងោរ ស្រា.ស និងផ្លែឈើជាច្រើនមុខ ត្រូវបានអាជ្ញាធរ សហការជាមួយមន្ទីរអប់រំខេត្ត យកទៅដាក់សែនព្រេនថ្វាយដល់អ្នកតាម្ចាស់ទឹកម្ចាស់ដី នៅបរិវេណវិទ្យាល័យហ៊ុនសែន កែវ សីមា ក្រោយសិស្សនារីចំនួន២៤នាក់បានសន្លប់បន្តបន្ទាប់ នាចុងខែមករានេះ ។
លោក ប៊ុត សំអ៊ែល មេឃុំស្រែខ្ទុម ស្រុកកែវសីមា បានឲ្យដឹងនៅរសៀលថ្ងៃទី២៨ មករា ថា មិនមានអ្វីធំដុំនោះទេ យើងគ្រាន់តែសែនព្រេនតាមទម្លាប់ អបិយជំនឿបន្តិបបន្តួចប៉ុណ្ណោះ សាលានេះទើបសង់រួច ហើយកន្លងមកក៏ធ្លាប់និមន្តព្រះសង្ឃសូត្រមន្ត ។ ដោយសារតែមានករណីសិស្សសន្លប់ដល់ទៅពីរដង ត្រឹមរយៈពេលខ្លី ទើបគេរកគ្រូទាយព្រោះតំបន់នេះដំបូងឡើយជាព្រៃសុទ្ធសាធ ។
ចំណែកសិស្សចេះតែមានកំណើនពីមួយឆ្នាំទៅមួយឆ្នាំ ទើបអាជ្ញាធរសម្រេចកាប់រានដីព្រៃនៅចំណុចជិត អធិការនគរបាលស្រុកកែវសីមា សង់ជាវិទ្យាល័យចំនួនពីរអគារ សម្រាប់សិក្សានុសិស្សបន្តការរៀនសូត្រ ដោយមិនចាំបាច់ទៅរៀននៅទីរួមខេត្តមណ្ឌលគិរីមានចម្ងាយរហូតជាង៦០គីឡូម៉ែត្រ ។ ក្រោយលោកមេឃុំជួបជាមួយគ្រូទាយ គ្រូបានប្រាប់ឲ្យរៀបចំសង់ខ្ទម សែនសំណែនឲ្យអ្នកតាម្ចាស់ទឹកម្ចាស់ដី ដើម្បីសុំសុខសប្បាយ។
ជុំវិញបញ្ហាខាងលើនេះ ប្រធានមន្ទីរពេទ្យបង្អែកខេត្តមណ្ឌលគិរី លោក ទុយ ស្រស់ ឲ្យដឹងថា មូលហេតុដែលបណ្ដាលឲ្យសិស្សសាលាដួលសន្លប់នៅស្រុកកែវសីមា បណ្ដាលមកពីមូលហេតុចំនួន៣ ទី១-ពាក់ព័ន្ធទៅនិងអាកាសធាតុក្ដៅខ្លាំង បណ្ដលឲ្យកង្វះខ្យល់ដកដង្ហើម ទី២-ទាក់ទងនិងការរៀនសូត្ររបស់កូនសិស្សទាំងអស់នេះ ដោយប្រឹងរៀនជ្រុលម៉ោង និងទី៣-បណ្ដាលមកពីអារម្មណ៍ភិតភ័យពេលឃើញសិស្សដូចគ្នាដួលសន្លប់ជាបន្តបន្ទាប់។
លោក ទុយ ស្រស់បន្តទៀតថា ការខំប្រឹងរៀនជ្រុលម៉ោង ព្រមទាំងការហូបចំណីអាហារមិនទៀងពេល បណ្ដាលឲ្យសិស្សសាលាទាំងនេះអស់កម្លាំង រួមផ្សំនិងអារម្មណ៍ភ័យខ្លាចផង បណ្ដាលខ្វះជាតិស្ក ទើបសិស្សទាំងនោះសន្លប់បែបនេះ ។ បច្ចុប្បន្នសិស្សទាំងនេះ មានសុខភាពប្រសើរឡើងវិញហើយមិនមានបញ្ហាសុខភាពធ្ងន់ធ្ងរនោះទេ ក្រុមការងារកំពុងធ្វើការស្រាវជ្រាវបន្ថែមទៀតចំពោះករណីសិស្សដួលសន្លប់នេះ។
ក្នុងចំណោម ស្រុក ៤ -ក្រុង១នៅខេត្តមណ្ឌលគិរី សម្រាប់ស្រុកផ្សេងៗពុំមានករណីសិស្សដួលសន្លប់នោះទេ មានតែនៅស្រុកកែវសីមា បានកើតឡើងចំនួន២លើកមកហើយក្នុងខែមករាដើមឆ្នាំ២០២០នេះ ដែលករណីទី១កើតឡើង នៅថ្ងៃទី២៣ ខែមករា សិស្សបានដួលសម្លប់ចំនួន ១០នាក់ធ្ងន់២នាក់ ហើយនៅថ្ងៃទី២៧ខែមករា ឆ្នាំ២០២០ ជាករណីទី២ មានសិស្សស្រីដួលសន្លប់ចំនួន១៤នាក់ សភាពធ្ងន់ធ្ងរ៣នាក់ សរុបទាំងពីរលើកនេះ មានសិស្សវិទ្យាល័យសិស្សសាលាវិទ្យាល័យហ៊ុន សែន កែវសីមា ដួលសន្លប់ចំនួនដល់២៤នាក់ហើយ ។
ចែករំលែកព័តមាននេះ