ខេត្តកំពង់ឆ្នាំង ៖ ដោយមានការយកចិត្តទុកដាក់ពីមន្ត្រីយោធា ដូចជាក្រោមការដឹកនាំ របស់មេបញ្ជាការតំបន់អភិវឌ្ឃន៍អភិវឌ្ឍន៍យុទ្ធភូមិភាគពិសេស ក្នុងការបង្កបង្កើនផល និង ចិញ្ចឹមសត្វផងនោះ នៅព្រឹកថ្ងៃទី ២៦ខែមករា ឆ្នាំ២០២០ អង្គភាពតំបន់យោធភូមិភាគពិសេសចំណុចព្រៃខៀវ បានសម្រេចប្រមូលផលស្វាយកែវរមៀត ដើម្បីលក់ឲ្យឈ្មួញប្រមាណជាង២០តោន សរុបទាំងមុន និងក្រោយ ។
លោកវរសេនីយ៍ឯក ជុំ ណារិន មេបញ្ជាកាតំបន់អភិវឌ្ឍន៍យោធភូមិភាគពិសេសខេត្ត បានឲ្យដឹងថា ដោយទទួលបានការណែនាំពីលោកឧត្តមសេនីយ៍ឯក ពូ សាប៊ុតឌី មេបញ្ជាការរងកងទព័ជើងគោក និងជាមេបញ្ជាការយោធភូមិភាគពិសេស និងឧត្តមសេនីយ៍ទោ ប៉ូ វណ្ណៈ មេបញ្ជាការងយោធភូមិពិសេស និងជានាយសេនាធិការផងនោះ កន្លងមក អង្គភាពបានខិតខំបង្កបង្កើនផល ដូចជាដាំដំណាំ រួមផ្សំមានស្វាយ ចេក ដូង និងដាំបន្លែបង្ការ។
ក្រៅពីនោះ អង្គភាពបានខិតខំចិញ្ជឹមសត្វមាន ៖ គោ ជ្រូក មាន់ ទា ពពែ និងចិញ្ចឹមត្រីជាដើម ដើម្បីផ្គត់ផ្គង់ដល់អង្គភាព ដោយមិនចាំបាច់ទិញនៅទីផ្សារឡើយ ។ ជាមួយគ្នានេះក្រៅពីផ្គត់ផ្គង់ដល់អង្គភាព ទិន្នផលដែលទទួលបានមួយចំនួននៅបានលក់ចេញទៅកាន់ទីផ្សារ ដើម្បីយកប្រាក់ផ្គត់ផ្គង់ដល់អ្គភាព ។
ជាក់ស្ដែងនៅថ្ងៃនេះ តំបន់អភិវឌ្ឍន៍យុទ្ធភូមិភាគពិសេស ចំណុចព្រៃខៀវ បានសម្រេចប្រមូលផលផ្លែស្វាយកែវរមៀតលក់ទៅឱ្យឈ្មួញ ដែលនាំចេញទៅក្រៅប្រទេសទៀតផង។
លោកបានបញ្ជាក់ថា ថ្ងៃនេះជាលើកទី២ហើយ ក្នុងដើមរដូវប្រមូលផលនេះ ដោយកាលមុន បេះបានជាង៤តោន និងលើកនេះ ប្រមាណជាង១៦តោនទៀត សរុបមុនក្រោយក្នុងការប្រមូលផលដើមរដូវនេះបានជាង២០តោន ។ ប៉ុន្តែលោកក៏សោកស្តាយផងដែរ ដោយសារឆ្នាំនេះ តម្លៃផ្លែស្វាយថោកជាងឆ្នាំទៅ គួបផ្សំឆ្នាំនេះ ជួបគ្រោះរាំងស្ងួតផងនោះ ធ្វើឱយផ្លែស្វាយមិនសូវធំល្អ ។ ប៉ុន្តែផ្លែស្វាយនៅប្រមូលផលជាបន្តបន្ទាប់ទៀត ហេតុនេះហើយ លោកក៏សូមអំពាវនាវដល់អាជីវករណាដែលហ៊ានតម្លៃថ្លៃជាងនេះ សូមមកទាក់ទង ដល់អង្គភាពរបស់លោក ដើម្បីជួយទិញផ្លែស្វាយកែវរមៀត ក៏ដួចជាជួយគាំទ្រដល់អង្គភាពផងដែរ។
ដោយឡែកអាជីវករឈ្មោះ ភឿន ស៊ី ដែលមានទីលំនៅខេត្តប៉ៃលិន បានឲ្យដឹងថា គាត់បានមកទិញស្វាយនៅក្នុងអង្គភាពតំបន់អភិវឌ្ឍន៍យោធភូមិភាគពិសេសលើកនេះ គឺជាឆ្នាំទី ២ហើយ ។ ប៉ុន្តែឆ្នាំនេះ ស្វាយមានតម្លៃថោកបន្តិចដោយក្នុងមួយគីឡូក្រាមបានតែ៧០០រៀលប៉ុណ្ណោះ ។ ឆ្នាំនេះស្វាយសំបូរ គាត់ទើបតែប្រមូលទិញដើមរដូវបាន២លើក គឺបានជាង២០តោនទៅហើយ ប៉ុន្តែស្វាយនៅអង្គភាពនេះ នៅមានច្រើនចំការនៅឡើយ អាចមកប្រមូលទិញជាង២ខែទៀតមិនទាន់អស់ផង ហើយស្វាយដែលគាត់ទិញ គឺយកទៅលក់នៅផ្សារថៃជាប់ព្រំដែនខេត្តប៉ៃលិន ៕ (កែសម្រួលដោយ ៖ បុប្ផា)
ចែករំលែកព័តមាននេះ