ប្រសិនបើអ្នកជួបនឹងបញ្ហាអាសន្នដែលតម្រូវឲ្យអ្នកចាយវាយថវិកាជាច្រើន តើអ្នកមានថវិកាសន្សំទុកគ្រប់គ្រាន់សម្រាប់វាទេ? ប្រាក់សន្សំប្រហែលជាមិនអាចធ្វើឲ្យមនុស្សមានបានទាំងស្រុងទេ ប៉ុន្តែវាជាអ្វីចាំបាច់ជាពិសេសនៅពេលដែលអ្នកជួបនឹងស្ថានការដែលមិនបានគ្រោងទុកមុន ។
ដូច្នេះប្រសិនបើអ្នកមានគម្រោងសន្សំលុយក្នុងឆ្នាំនេះ តើអ្នកគួរធ្វើយ៉ាងណាដើម្បីសន្សំឲ្យមានប្រសិទ្ធិភាពនិងងាយស្រួល?
១-មានគោលដៅច្បាស់លាស់៖
អ្នកមានឱកាសច្រើនក្នុងការផ្លាស់ប្តូរទម្លាប់ចាយវាយប្រសិនបើអ្នកសន្សំលុយ ដើម្បីគោលដៅមួយច្បាស់លាស់ ។ ឧទាហរណ៍ដូចជាសម្រាប់ការទៅវិស្សមកាលពីរសប្តាហ៍ ឬដើម្បីប្រាក់កក់ទិញផ្ទះមួយជាដើម ។
ប្រសិនបើគោលដៅរបស់អ្នកគឺជាអ្វីដែលមិនតម្រូវឲ្យអ្នកចំណាយច្រើនដូចជាកុំព្យូទ័រ ឬទូរស័ព្ទនោះ អ្នកគួរបន្តគោលដៅថ្មីៗរាល់ពេលដែលអ្នកសម្រេចវាហើយ ។
២-តាមដានការចាយវាយដែលមិនចាំបាច់៖
មិនថាអ្នកមានចំណូលប៉ុន្មានទេ អ្នកត្រូវតែដឹងច្បាស់ថាលុយរបស់អ្នកកំពុងតែត្រូវបានចាយវាយលើអ្វីមុននឹងអ្នកអាចដឹងពីវិធីសន្សំវាទុកបាន ។ ដើម្បីដឹងអ្នកគួរកត់ទុករាល់ការចាយវាយលើអ្វីដែលសំខាន់ៗដូចជាថ្លៃជួលផ្ទះ ឬអាហារប្រចាំថ្ងៃ និងអ្វីដែលមិនសំខាន់ដូចជាកាហ្វេ ឬសំបុត្រកុនជាដើម ។
បន្ទាប់មកមើលថាក្នុងចំណោមអ្វីៗដែលមិនសំខាន់ទាំងនោះ តើមានអ្វីដែលអ្នកអាចបោះបង់ចោលនិងទុកលុយសម្រាប់ការសន្សំទេ?
៣-កុំចាយលុយដែលរកឃើញ ឬទទួលបានជាអំណោយ៖
មិនថាជាប្រាក់អាំងប៉ាវ អំណោយថ្ងៃកំណើត ឬប្រាក់ខែទី១៣ទេ វិធីងាយមួយដែលជួយឲ្យអ្នកសន្សំលុយបានច្រើនគឺហាមខ្លួនឯងមិនឲ្យចាយប្រាក់ទាំងនេះ ។ ព្រោះតែវាមិនជាផ្នែកមួយនៃចំណួលប្រចាំខែរបស់អ្នកការមិនចាយវាយវាក៏មិនប៉ះពាល់អ្វីដល់ការរស់នៅប្រចាំថ្ងៃរបស់អ្នកដែរ ៕ (កែសម្រួលដោយ ៖ ធីតា)
ចែករំលែកព័តមាននេះ