លោកមហាសេដ្ឋី ប៊ីល ហ្គេតស៍ (Bill Gates) គឺជាបុរសដែលមានទ្រព្យសម្បត្តិច្រើនជាងគេលើលោកដែលទ្រព្យសម្បត្តិសរុបរបស់លោកមានប្រមាណ ១០៨.៨ប៊ីលានដុល្លារ ។ ហើយលោកបាននិយាយថា ទ្រព្យសម្បត្តិរបស់លោកនេះ គឺមិនយុត្តិធម៌សម្រាប់អ្នកដទៃទេ ។
លោកបានសរសេរក្នុងអត្ថបទមួយថា «មនុស្សមួយចំនួនតូចទទួលបានឱកាសល្អៗ ខ្ញុំទទួលបានរង្វាន់យ៉ាងច្រើនសម្រាប់ការងារដែលខ្ញុំបានធ្វើកន្លងមក ខណៈដែលអ្នកដទៃដែលខិតខំធ្វើការដូចខ្ញុំដែរកំពុងតែជួបការលំបាកក្នុងការរស់នៅប្រចាំថ្ងៃ» ។
ដើម្បីដោះស្រាយបញ្ហានេះ លោក ហ្គេតស៍ បាននិយាយថា រដ្ឋាភិបាលគួរតែបង្កើនពន្ធសម្រាប់អ្នកមានទ្រព្យសម្បត្តិស្តុកស្តម្ភ ជាពិសេសគឺពន្ធលើចំណូលពីការវិនិយោគលើភាគហ៊ុន ។ មិនមានអ្នកមានណាម្នាក់ដែលកសាងទ្រព្យសម្បត្តិរបស់ខ្លួនដោយអាស្រ័យតែលើប្រាក់ខែទេ ។ លោកមហាសេដ្ឋី ម៉ាក ឃ្យូបេន (Mark Cuban) ក៏គាំទ្រគំនិតនេះដែរ និងបានផ្តល់យោបល់មកថា ស្ថាបនិក និងម្ចាស់ក្រុមហ៊ុនគួរតែចែករំលែកភាគហ៊ុនក្នុងក្រុមហ៊ុនឲ្យទៅបុគ្គលិកដើម្បីធ្វើឲ្យពួកគេក្លាយជាវិនិយោគិនដែរ ។
លោកបានបន្តទៀតថាវាជាអ្វីដែលលោកបានធ្វើក្នុងក្រុមហ៊ុន Broadcast.com របស់លោកដែលលោកបានបង្កើតឡើងនិងលក់ឲ្យទៅ Yahoo ក្នុងឆ្នាំ ១៩៩៩ ក្នុងតម្លៃ ៦ប៊ីលានដុល្លារ ។ លោកបានអះអាងថាបុគ្គលិក ៣០០នាក់ក្នុងចំណោម ៣៣០នាក់ដែលធ្វើការឲ្យ Broadcast.com បានក្លាយទៅជាសេដ្ឋីបន្ទាប់ពីការលក់ ។
ជាមួយគ្នានេះដែរលោក ហ្គេតស៍ បានជំរុញឲ្យមានការបង្កើនពន្ធលើអចលនទ្រព្យ និងបាននិយាយថាវានឹងមិនប៉ះពាល់ដល់អ្នកមានទេ ។ លើសពីនេះទៅទៀតលោកបានបន្តថា ប្រព័ន្ធដែលអ្នកមានអាចផ្ទេរទ្រព្យឲ្យទៅកូនៗ គឺមិនល្អសម្រាប់មនុស្សគ្រប់គ្នាឡើយ ព្រោះមនុស្សជំនាន់ក្រោយនឹងមិនមានចិត្តចង់ខិតខំធ្វើការនិងចូលរួមក្នុងការអភិវឌ្ឍន៍សេដ្ឋកិច្ចទេ ។ វាជាមូលហេតុមួយដែលធ្វើឲ្យលោកបង្កើត The Giving Pledge ជាមួយនឹងលោកមហាសេដ្ឋី Warren Buffett ដែលបានប្តេជ្ញាថានឹងបរិច្ចាគទ្រព្យភាគច្រើនរបស់ពួកគេឲ្យទៅសប្បុរសធម៌ ៕ កែសម្រួលដោយ ៖ សុឃាក់
ចែករំលែកព័តមាននេះ