ផ្លូវដើរជាសហគ្រិនមិនមែនជាផ្លូវងាយ និងរលូនល្អសម្រាប់អ្នកដើរទេ ។ ប៉ុន្តែជាក់ស្តែងការទទួលស្គាល់ឧបសគ្គទាំងនេះ និងការត្រៀមខ្លួនទុកជាមុនសម្រាប់ពួកវា គឺជាកត្តាល្អដែលអាចជួយឲ្យសហគ្រិនចៀសវាង ឬអាចរកដំណោះស្រាយបានដោយមានប្រសិទ្ធិភាពពេលដែលជួបវានៅថ្ងៃមុខ ។ ខាងក្រោមនេះជាឧបសគ្គទូទៅដែលធ្វើឲ្យសហគ្រិនជាច្រើនបរាជ័យ៖
១. គុណភាពផលិតផលរបស់អ្នកអាចនឹងទាបជាងការរំពឹងទុក៖
មិនថាអ្នកចំណាយពេលរៀបចំគម្រោងការប៉ុនណាទេ បញ្ហាទាក់ទិននឹងគុណភាពនៅតែអាចកើតមានឡើងដែលប៉ះពាល់ដល់អាជីវកម្មរបស់អ្នកដដែល ។ ដោយហេតុដូចនេះ សហគ្រិនគួរតែត្រៀមខ្លួនសម្រាប់រាល់ស្ថានការ និងរក្សាទំនាក់ទំនងជាមួយនឹងមនុស្សសំខាន់ៗក្នុងអាជីវកម្មរបស់អ្នក ។
២. មនុស្សសំខាន់ជាងគេក្នុងអាជីវកម្មរបស់អ្នកមិនអាចនាំយកលទ្ធផលដែលអ្នកចង់បាន៖ទំនាក់ទំនងរវាងមនុស្សនិងមនុស្សមិនគង់វង្សទេ ជាពិសេសក្នុងអាជីវកម្មដែលតែងតែជួបប្រទះនឹងស្ត្រេស ឬបញ្ហា ។ ដោយហេតុដូចនេះទើបក្រុមហ៊ុន ឬអាជីវកម្មជាច្រើនបរាជ័យព្រោះតែពួកគេមិនអាចរក្សាទំនាក់ទំនងជាមួយដៃគូសំខាន់ៗបាន ។
៣. មូលធនអស់មុនពេលប្រាក់ចំណូលអាចជួបបំពេញការចាយវាយ៖
ជាទូទៅ អាជីវកម្មតែងតែចាប់ផ្តើមជឿជាក់ និងសម្រេចចិត្តពង្រីក ឬបង្កើនការចាយវាយពេលដែលមើលឃើញកំណើននៃការលក់ ឬប្រជាប្រិយភាពរបស់ផលិតផលខ្លួន ។ ដំណោះស្រាយសម្រាប់បញ្ហានេះគឺអាជីវករមិនគួរឈប់ខិតខំរកលុយដើម្បីបំពេញទេមិនថាជាការសុំខ្ចីពីបងប្អូនឬមិត្តភក្តិ ឬសុំការវិនិយោគពីអ្នកដទៃឡើយ ។
៤. អតិថិជន ឬដៃគូប្រកួតប្រជែងអ្នកបានផ្លាស់ប្តូរ៖
ពិភពលោកបច្ចុប្បន្នេះមិនចេះនៅស្ងៀមទេហើយថាតែងតែផ្លាស់ប្តូរស្ទើរតែគ្រប់នាទី ។ មានករណីខ្លះដៃគូប្រកួតប្រជែងរបស់អ្នកអាចមើលឃើញគំនិតរបស់អ្នកនិងចេញសកម្មភាពមុនអ្នកដែលធ្វើឲ្យពួកគេដណ្តើមយកភាពជោគជ័យអស់ជាដើម ឬក្រុមអតិថិជនដែលតែងតែគាំទ្រផលិតផលរបស់អ្នកបានផ្លាស់ប្តូរទៅគាំទ្រជម្រើសដទៃក៏តែងតែកើតមានឡើងដែរ ។ អាជីវករដែលវៃឆ្លាតជាមនុស្សដែលមិនរងចាំឲ្យទីផ្សារផ្លាស់ប្តូរដោយខ្លួនឯងទេ ប៉ុន្តែពួកគេជាមនុស្សដែលគិតឃើញការផ្លាស់ប្តូរ ត្រៀមផែនការច្បាស់លាស់ និងអាចឆ្លើយតបបានដោយមានប្រសិទ្ធិភាព ៕ កែសម្រួលដោយ ៖ សុឃាក់
ចែករំលែកព័តមាននេះ