ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា មន្ត្រីពេទ្យសត្វ បានឃាត់រទេះសណ្តោង១គ្រឿងដែលបន្លំបង្កប់ដឹកសាច់ និងគ្រឿងក្នុងជ្រូកទម្ងន់៣០០គីឡូក្រាម ដោយគ្មានច្បាប់ កាលពីពេលថ្មីៗនេះនៅតាមបណ្តោយផ្លូវជាតិ៥ ស្ថិតក្នុងភូមិក្បាលស្ពាន សង្កាត់-ក្រុងប៉ោយប៉ែត។
លោក ហ៊ុយ តូច ប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យបានប្រាប់ថា ដើម្បីពង្រឹងផលិតកម្ម និងបសុព្យាបាលក្នុងស្រុក និងការពារជំងឺឆ្លងពីប្រទេសជិតខាង មន្ត្រីជំនាញបានធ្វើស្រាវជ្រាវ និងកំណត់មុខសញ្ញា ហើយបានរកឃើញរទេះសណ្តោង១គ្រឿង និងអ្នកអូសឈ្មោះ ខាង រដ្ឋា ភេទប្រុស អាយុ៤០ឆ្នាំ ដែលបង្កប់ក្រោមទំនិញមានសាច់ និងគ្រឿងក្នុងជ្រូកចំនួន៦កេស ដោយក្នុង១កេសស្មើនឹង៥០គីឡូក្រាម សរុបទាំងអស់ទម្ងន់៣០០គីឡូក្រាម។
លោកបានបញ្ជាក់ថា ក្រោយពេលឃាត់រទេះសណ្តោងដឹកសាច់ និងគ្រឿងក្នុងជ្រូក ទម្ងន់៣០០គីឡូក្រាម ដែលឈ្មួញលួចបង្កប់នាំចូលពីប្រទេសថៃដោយគ្មានច្បាប់ និងដឹកគ្មានលក្ខណៈបច្ចេកទេស ដែលខូចគុណភាពនោះ ត្រូវយកទៅកាយយកចេញ និងយកទៅដុតកម្ទេចចោលនៅចំណុចសង្កាត់កំពង់ស្វាយ ក្រុងសិរីសោភ័ណ ហើយ។
លោក ហ៊ុយ តូច បានបញ្ជាក់ថា ចំពោះកម្មករអូសរទេះដឹកសាច់ និងគ្រឿងក្នុងជ្រូកខុសច្បាប់នេះវិញ ត្រូវបានឱ្យធ្វើកិច្ចសន្យាណែនាំ ហើយឱ្យត្រឡប់ទៅផ្ទះវិញ ហើយមន្ត្រីជំនាញកំពុងធ្វើស្រាវជ្រាវរកចាប់ខ្លួនម្ចាស់ទំនិញ ដើម្បីចាត់ការតាមច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ