រាជធានីភ្នំពេញ ៖ ក្នុងពេលវិស័យសំណង់នៅក្នុងប្រទេសកម្ពុជាបាននឹងកំពុងមានការអភិវឌ្ឍន៍ទៅមុខជាលំដាប់ ដោយមានទាំងវិនិយោគិនខ្មែរនិងបរទេសនោះវិនិយោគយ៉ាងសស្រាក់សស្រាំ ក៏បានធ្វើឲ្យលេចចេញនូវបញ្ហាមួយពាក់ព័ន្ធនឹងវិស័យមួយនេះ។ ជាក់ស្តែងបញ្ហាចម្បងនោះ គឺបញ្ហាកង្វះនូវកំលាំងពលកម្ម ជាពិសេសកំលាំងពលកម្មជំនាញដែលធ្វើអោយវិនិយោគិនត្រូវយកកំលាំងពលកម្មពីក្រៅប្រទេសមកបំពេញការងារ ។
ដោយឡែកវិនិយោគិនចិនដែលជាអ្នកដាក់ទុនធំ ឬនាំមុខបណ្តាវិនិយោគិនបរទេសក្នុងវិស័យសំណង់កម្ពុជា ក៏បាននាំយកនូវកំលាំងពលកម្មជំនាញពីប្រទេសរបស់ខ្លួនមកបំពេញតម្រូវការច្រើនដែរ ដែលជាហេតុធ្វើអោយពួកគេត្រូវចំណាយខ្ពស់ទៅលើកំលាំងជំនាញទាំងនោះ ។ ដោយសារតែកត្តាទាំងនេះ វិនិយោគិនចិនមួយចំនួនបានបញ្ជូននិស្សិតខ្មែរទៅសិក្សានៅប្រទេសចិន លើជំនាញវិស្វករសំណង់ ដើម្បីយកបទពិសោធន៍និងជំនាញក៏ដូចជាបច្ចេកទេសសាងសង់ពីប្រទេសចិន មកអភិវឌ្ឍន៍ប្រទេសកម្ពុជា ជាក់ស្ដែងម្ចាស់គម្រោងTCC ដែលវិនិយោគនៅកម្ពុជាទឹកប្រាក់រាប់រយលានដុល្លារនោះ បានបញ្ជូននិស្សិតខ្មែរទៅសិក្សានៅប្រទេសចិនប្រមាណជិត២០នាក់ លើជំនាញសំណង់ ។
លោក Chen Tai An ម្ចាស់គម្រោងមជ្ឈមណ្ឌលពាណិជ្ជកម្ម TCC បានអោយដឹងថា តាមការសង្កេតជាក់ស្ដែងកំលាំងពលកម្មជំនាញក្នុងវិស័យសំណង់នៅកម្ពុជា ហាក់មិនទាន់ឆ្លើយតបនឹងគម្រោងសាងសង់សំណង់នៅក្នុងប្រទេសកម្ពុជានៅឡើយទេ ជាក់ស្ដែង ក្នុងការដ្ឋានសំណង់របស់លោក កំលាំងជំនាញភាគច្រើនជាជនជាតិចិន ដែលត្រូវយកពីប្រទេសចិនមកបំពេញតម្រូវការក្នុងការសាងសង់ ។ នេះក៏ដោយសារតែកម្ពុជាមិនទាន់មានធនធានគ្រប់គ្រាន់ក្នុងការផ្ដល់ជូនអ្នកសាសង់ទើបត្រូវយកពីបរទេសមកធ្វើការ ។
លោកបានបន្តថា ក្នុងនាមជាអ្នកអភិវឌ្ឍន៍ សំណង់នៅក្នុងប្រទេសកម្ពុជាមួយរូប លោកចង់អោយការងារជំនាញ ក៏ដូចជាកំលាំងពលកម្មជំនាញនានា ជាជនជាតិខ្មែរ ទើបលោកបានសម្រេចផ្ដល់អាហារូបករណ៍ដល់និស្សិតកម្ពុជាទៅសិក្សានៅប្រទេសចិន ក្នុងជំនាញវិស័យសំណង់ ដើម្បីអោយនិស្សិតទាំងនោះ អាចយកចំណេះដឹងក៏ដូចជាជំនាញ មកបណ្ដុះបណ្ដាលបន្តដល់កម្មករក្នុងស្រុក និងដើម្បីអភិវឌ្ឍន៍វិស័យសំណង់ដោយកាត់បន្ថយនូវការនាំចូលកំលាំងពលកម្មជំនាញពីបរទេស ។ លោកបានបន្ថែមថា សម្រាប់ការដ្ឋានសំណង់ មជ្ឈមណ្ឌល TCC មានកម្មករសំណង់ជាជនជាតិចិនប្រមាណ២០ភាគរយទៅហើយ នៃកម្មករសំណង់សរុបក្នុងការដ្ឋាន តែលោកជឿជាក់ថា ក្នុងរយៈពេលប៉ុន្មានខាងមុខទៀតនេះ កម្ពុជានឹងកំលាំងពលកម្មជំនាញ គ្រប់គ្រាន់សម្រាប់ផ្ដល់ជូនទៅអ្នកអភិវឌ្ឍន៍សំណង់ក្នុងប្រទេសកម្ពុជា ។
បើតាមមន្ត្រីជាន់ខ្ពស់នៃក្រសួងការងារនិងបណ្ដុះបណ្ដាលវិជ្ជាជីវៈ បានលើកឡើងកន្លងមកថា ពិតណាស់កម្ពុជា ពិតនៅខ្វះខាតកំលាំងពលកម្មជំនាញ ក្នុងវិស័យសំណង់នេះមែន ដោយសារតែនិស្សិតកម្ពុជាមួយចំនួនធំចាប់យកជំនាញដែលធ្វើការក្នុងការិយាល័យ ក្នុងបន្ទប់ម៉ាស៊ីនត្រជាក់ និងមិនសូវចាប់យកជំនាញបច្ចេកទេសដែលធ្វើការនៅក្រោមកំដៅថ្ងៃប៉ុន្មាននោះទេ ។
លោក ហ៊ីង ស៊ីដេត អគ្គនាយកនៃអគ្គនាយកដ្ឋានអប់រំបណ្ដុះបណ្ដាលបច្ចេកទេសនិងវិជ្ជាជីវៈ (TVET) នៃក្រសួងការងារ និងបណ្ដុះបណ្ដាលវិជ្ជាជីវៈ ក៏បានអំពាវនាវ ដល់និស្សិតកម្ពុជាងាកមកចាប់យកជំនាញបច្ចេកទេសជាពិសេសជំនាញក្នុងវិស័យសំណង់ ដែលកំពុងមានទីផ្សារខ្លាំងនៅកម្ពុជា ក្នុងពេលដែលវិស័យសំណង់កំពុងមានសន្ទុះងើបខ្លាំង នៅពេលបច្ចុប្បន្ននេះ ។
លោកឡៅ ទិព្វសីហា អ្នកនាំពាក្យក្រសួងរៀបចំដែនដីនគរូបនីយកម្មនិងសំណង់បានមានអោយដឹងថា វិស័យសំណង់ក្នុងប្រទេសកម្ពុជា បានផ្ដល់ការងារជាច្រើនដល់ប្រជាជនកម្ពុជា ជាក់ស្ដែងបច្ចុប្បន្ននេះវិស័យសំណង់បានផ្ដល់ការងារប្រមាណ ១៨ម៉ឺនទៅ២០ម៉ឺននាក់/ថ្ងៃ និងមានកំណើនបន្តទៀតនៅពេលខាងមុខនេះ ក្នុងពេលវិស័យនេះនៅតែទទួលបានការវិនិយោគ ពីបរទេស និងក្នុងស្រុក ។
តាមរបាយការណ៍របស់ក្រសួងរៀបចំដែនដីនគរូបនីយកម្មនិងសំណង់ ក្នុងឆ្នាំ ២០១៩កន្លងទៅក្នុងវិស័យសំណង់ទទួលបានទុនវិននិយោគសរុបប្រមាណជាង៩,៣ពាន់លានដុល្លារអាមេរិក ក្នុងនោះរាជធានីភ្នំពេញ និងខេត្តព្រះសីហនុទទួលបានកំណើននៃវិស័យសំណង់ច្រើនជាងគេ ក្នុងចំណោមរាជធានីខេត្តទូទាំងប្រទេស ៕ កែសម្រួលដោយ ៖ សុឃាក់
ចែករំលែកព័តមាននេះ