រាជធានីភ្នំពេញ ៖ ក្រសួងការងារនិងបណ្តុះបណ្តាលវិជ្ជាជីវៈ នឹងធ្វើវិសោធនកម្មច្បាប់ស្តីពីការងារពាក់ព័ន្ធនឹងការធ្វើការងារលើសពី១វេន ដើម្បីបង្កើនភាពទាក់ទាញឧស្សាហកម្មទំនើប ។ ក្រសួងកាងារនិងបណ្តុះបណ្តាលវិជ្ជាជីវៈបានឲ្យដឹងថា នឹងរៀបចំធ្វើសិក្ខាសាលាពិគ្រោះយោបល់ត្រីភាគីស្តីពីការធ្វើវិសោធនកម្មច្បាប់ស្តីពីការងារនៅថ្ងៃទី១៦ ខែមករា ឆ្នាំ២០២០ នៅសណ្ឋាគារសាន់វេ ដោយមានជំនួយបច្ចេកទេសពីអង្គការអន្តរជាតិខាងការងារ(ILO) ។
សិក្ខាសាលាពិគ្រោះយោបល់នេះ មានការចូលរួមពីតំណាងភាគីសហជីពចំនួន១៨រូប តំណាងភាគីនិយោជកចំនួន១៧រូប និងដៃគូរបស់ក្រសួងចំនួន១១រូប ។ សិក្ខាសាលារៀបចំឡើងក្នុងគោលបំណងដើម្បីពិភាក្សាអំពី ការកែសម្រួលបទប្បញ្ញត្តិពាក់ព័ន្ធនឹងវេនការងាររបស់រោងចក្រ សហគ្រាស គ្រឹះស្ថាន ដែលមានដំណើរការលើសពី១វេនជាប្រចាំ ។
ការកែសម្រួលនេះ គឺដើម្បីបង្កើនភាពទាក់ទាញឧស្សាហកម្មទំនើបដូចជា រោងចក្រផលិតបរិក្ខារអគ្គិសនី គ្រឿងអេឡិចត្រូនិក និងការកែច្នៃម្ហូបអាហារជាដើម និងបង្កើនការងារជូនប្រជាពលរដ្ឋ ។ ដោយឡែក រោងចក្រ សហគ្រាស គ្រឹះស្ថាន ដែលធ្វើការ លើសពី១វេនម្តងម្កាល គឺនៅបន្តអនុវត្តបទប្បញ្ញត្តិដែលមានជាធរមាន ។
សិក្ខាសាលាក៏នឹងពិភាក្សាពីការពង្រីកវិសាលភាពសេវាកម្មរបស់ក្រុមប្រឹក្សាអាជ្ញាកណ្តាលក្នុងការដោះស្រាយវិវាទបុគ្គល ដើម្បីពង្រឹងប្រសិទ្ធភាពនៃយន្តការដោះស្រាយវិវាទការងារ និងឆ្លើយតបនឹងតម្រូវការរបស់ភាគីវិវាទ ព្រមទាំងកាន់តែធានាបាននូវសុខដុមរមនាក្នុងទំនាក់ទំនងវិជ្ជាជីវៈ។ ការលុបការឈប់នៅថ្ងៃបន្ទាប់សម្រាប់ថ្ងៃឈប់សម្រាកបុណ្យចំថ្ងៃអាទិត្យ ដើម្បីឆ្លើយតបទៅនឹងការវិវឌ្ឍផ្នែកសង្គម-សេដ្ឋកិច្ចកម្ពុជា សំដៅលើកកម្ពស់ផលិតភាពការងារ និងពង្រឹងភាពប្រកួតប្រជែងសេដ្ឋកិច្ចកម្ពុជាទាំងក្នុងតំបន់ និងសកលលោក ។
សិក្ខាសាលាពិគ្រោះយោបល់លើកទី១នេះ នឹងផ្ដល់ឱកាសដល់ភាគីពាក់ព័ន្ធ ក្នុងការពិនិត្យនិងពិភាក្សាផ្តល់ធាតុចូលនានា សំដៅការពារផលប្រយោជន៍បងប្អូនកម្មករនិយោជិត និងនិយោជក ។ ក្រសួងនឹងបន្តសហការជាមួយដៃគូពាក់ព័ន្ធ ជាពិសេសអង្គការ ILO រៀបចំសិក្ខាសាលាពិគ្រោះយោបល់ និងកិច្ចប្រជុំពិគ្រោះយោបល់ជាលក្ខណៈត្រីភាគីបន្តទៀត ដើម្បីបន្តប្រមូលធាតុចូលពីគ្រប់ភាគីពាក់ព័ន្ធ ។
លោក អុិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានឲ្យដឹងនៅថ្ងៃទី១៥ ខែមករា ទាក់ទិននឹងការធ្វើវិសោធនកម្មច្បាប់ស្តីពីការងារថា ការធ្វើបែបនេះក៏ជាកត្តាមួយក្នុងការចូលរួមដោះស្រាយជូនកម្មករឲ្យស្របនឹងបណ្តាប្រទេសនានា ព្រោះថានៅកម្ពុជា មានថ្ងៃឈប់សម្រាកច្រើន ហើយកម្ពុជា គឺជាប្រទេសមានព្រះមហាក្សត្រសោយរាជ្យ ។ ការឈប់សម្រាកនេះ ត្រូវបានគេសាទរក្នុងនោះមាននិស្សិត លោកគ្រូអ្នកគ្រូ និងមន្ត្រីរាជការ ។ផ្ទូយទៅវិញ ប្រសិនបើមានការឈប់សម្រាកច្រើនពេក ធ្វើឲ្យអ្នកវិនិយោគនឹងមិនធ្វើការវិនិយោគផងដែរ ។
លោករដ្ឋមន្ត្រីបន្ថែម ការកាត់បន្ថយថវិកាវេនយប់នោះគឺជាបំណងល្អ ប៉ុន្តែអ្នកដែលចង់បានប្រជាប្រិយភាព បានធ្វើការបកស្រាយខុស។រឿងនេះជារឿងធម្មតាទេ សម្រាប់ប្រទេសកាន់របបប្រជាធិបតេយ្យនិងទីផ្សារសេរី យើងនឹងព្យាយាមបកស្រាយដើម្បីឲ្យគេបានយល់ ។ នេះជាទិដ្ឋភាពរួមដែលខ្ញុំចង់លើកដើម្បីដោះស្រាយការងារ និងធ្វើការសម្រួលកិច្ចការងារថ្មីរបស់ក្រសួងការងារនិងបណ្តុះបណ្តាលវិជ្ជាជីវៈ ៕
ចែករំលែកព័តមាននេះ