រាជធានីភ្នំពេញ ៖ ជារឿងមួយនឹកស្មានមិនដល់ទៀតហើយ ដែលតារាលេចធ្លោក្នុងសិល្បៈផ្នែកនារីម្នាក់ទៀត គឺអ្នកនាងឡោម លក្ខិណា ទើបតែទទួលបានកូនប្រុសម្នាក់ ក្រោយចងស្នេហ៍ជាមួយតារាប្រុសម្នាក់នោះ ស្រាប់តែខាងប្រុស គឺលោកប៉ា ពិសិដ្ឋ ក៏ជាអតីតតារាសម្តែងម្នាក់ដែរ បានជួបគ្រោះថ្នាក់ចរាចរណ៍រហូតដល់បាត់បង់ជីវិត។ ដំណឹងនេះ ទើបបែកធ្លាយព្រឹកមិញ ស្របពេលហេតុការណ៍កើតឡើងកាលពីម្សិលមិញថ្ងៃទី១៦ ខែមករា ឆ្នាំ២០២០។
យោងតាមការបង្ហោះរបស់អ្នកនាង ឡោម លក្ខិណា បានសរសេរថា «យើងខ្ញុំជាក្រុមគ្រួសារនៃសព លោក PISETH PA ដែលបានទទួលមរណភាពនៅថ្ងៃសុក្រ ទី១៦ ខែមករា ឆ្នាំ២០២០ ដោយគ្រោះថា្នក់ចារាចរណ៍។ សូមជំរាបជូនដំណឹងដល់ញាតិមិត្តជិតឆ្ងាយនៃសព ដែលយើងខ្ញុំមិនបានទៅអញ្ជើញដោយផ្ទាល់ឱ្យបានជ្រាបថា យើងខ្ញុំរៀបចំពិធីបុណ្យសព ស្ថិតនៅវត្តក្រាំងធ្នុង ជិតបុរីឈូកវ៉ា ៣ អាស្រ័យហេតុនេះ សូមគោរពអញ្ជើញញាតិមិត្តជិតឆ្ងាយមេត្តាចូលរួមដោយមេត្រីភាព។
តាមការបង្ហោះរបស់អ្នកនាង ឡោម លក្ខិណា បានសរសេរបន្តថា«សូមបងទៅកាន់ទីស្ងប់សុខរឿង កូនបងកុំបារម្ភ អូននឹងមើលថែកូនឱ្យល្អ បងដាច់ចិត្តណាស់ ហ៊ានទៅចោលអូនគ្មានផ្តាំផ្ញើរអីអូនមួយម៉ាត់»។
ក្រោយពេលដំណឹងនេះបែកធ្លាយតាមរយៈការបង្ហោះរបស់អ្នកនាង ឡោម លក្ខិណា រួចហើយ សិល្បករស្លុតចិត្តគ្រប់គ្នា ពេលទទួលដំណឹងអកុសលមួយនេះ ហើយម្នាក់ៗលើកទឹកចិត្តឱ្យ ឡោម លក្ខិណា រឹងមាំ ទប់ស្មារតី និងតស៊ូក្នុងជីវិត មើលថែទាំកូនប្រុសរបស់ប្តីឱ្យល្អ។
គួររំលឹកថា លោកប៉ា ពិសិដ្ឋ ក៏ជាអតីតតារាសម្តែងម្នាក់ដែរ កាលពីច្រើនឆ្នាំមុន លោកបានធ្លាប់ថតចម្រៀងកាយវិការខារ៉ាអូខេ ឱ្យផលិតកម្មរៃមាស តោមាស និងបុប្ឋា។ គ្រានោះហើយដែលលោកជំពប់ស្នេហ៍លើ ឡោម លក្ខិណា រហូតបង្កើតចំណងស្នេហ៍ពេញចិត្តស្រឡាញ់គ្នា មានកូនជាចំណងដៃ មិនទាន់រៀបការនៅឡើយ។ (កែសម្រួលដោយ ៖ បុប្ផា)
ចែករំលែកព័តមាននេះ