រាជធានីភ្នំពេញ ៖ តំណាងកម្មករនិយោជិត សហជីព និយោជក សមាគមនិយោជក ក្រសួង-ស្ថាប័នពាក់ព័ន្ធ អង្គការជាតិ-អន្តរជាតិ តំណាងអង្គទូត និងដៃគូអភិវឌ្ឍន៍នានា…
រាជធានីភ្នំពេញ ៖ តំណាងកម្មករនិយោជិត សហជីព និយោជក សមាគមនិយោជក ក្រសួង-ស្ថាប័នពាក់ព័ន្ធ អង្គការជាតិ-អន្តរជាតិ តំណាងអង្គទូត និងដៃគូអភិវឌ្ឍន៍នានា ព្រមទាំងអ្នកជំនាញរបស់អង្គការអន្តរជាតិខាងការងារ (ILO) បានមកជួបជុំគ្នាពិនិត្យ និងពិភាក្សាផ្តល់យោបល់ជាធាតុចូលប្រកបដោយគុណប្រយោជន៍លើការធ្វើវិសោធន កម្មច្បាប់ស្តីពីការងារ ។
លោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានថ្លែងបើកសិក្ខាសាលាពិគ្រោះយោបល់ត្រីភាគីស្តីពីការធ្វើវិសោធនកម្មច្បាប់ស្តីពីការងារនៅសណ្ឋាគារសាន់វេ នាព្រឹកថ្ងៃទី១៦ ខែមករានេះថា ការធ្វើវិសោនធកម្មច្បាប់នេះស្របតាមវិធានការកែទម្រង់មុតស្រួចរបស់សម្តេចតេជោនាយករដ្ឋមន្ត្រី ក្រសួងការងារ និងបណ្តុះបណ្តាលវិជ្ជាជីវៈ បានបង្កើតក្រុមការងារសិក្សាលទ្ធភាពក្នុងការធ្វើវិសោធនកម្មច្បាប់ស្តីពីការងារឱ្យស្របតាមបរិបទសេដ្ឋកិច្ច និងសង្គម ។
លោកបន្តថា បន្ទាប់ពីបានបញ្ចប់ការសិក្សាជាបឋមលើភាពចាំបាច់ និងអត្ថប្រយោជន៍នៃការធ្វើវិសោធនកម្មច្បាប់ស្តីពីការងារក្រសួងបានបានសហការជាមួយអ្នកជំនាញរបស់អង្គការ ILO រៀបចំសិក្ខាសាលាពិគ្រោះយោបល់ត្រីភាគីលើកទី១ ដើម្បីពិភាក្សាអំពីលទ្ធភាពលើ ១-ការកែសម្រួលបទប្បញ្ញត្តិពាក់ព័ន្ធនឹងវេនការងាររបស់រោងចក្រ សហគ្រាស គ្រឹះស្ថាន ដែ មានដំណើរការលើសពី១វេនជាប្រចាំ ។ ដូចបានបញ្ជាក់ក្នុងសេចក្តីជូនដំណឹងស្តីពីសិក្ខាសាលាពិគ្រោះយោបល់ត្រីភាគីស្តីពីការធ្វើវិសោធនកម្មច្បាប់ស្តីពីការងារចុះថ្ងៃទី១៣ ខែមករា ឆ្នាំ២០២០ របស់ក្រសួង ការកែសម្រួលនេះមានគោលបំណង ៖(១) បង្កើនភាពទាក់ទាញឧស្សាហកម្មទំនើបដូចជា រោងចក្រផលិតបរិក្ខារអគ្គិសនី, គ្រឿងអេឡិចត្រូនិច និងការកែច្នៃម្ហូបអាហារជាដើម និង (២) បង្កើនការងារជូនប្រជាពលរដ្ឋទៅតាមជម្រើស និងតម្រូវការជាក់ស្តែងរបស់ពួកគេ ដើម្បីទទួលបានប្រាក់ចំណូលកាន់តែប្រសើរឡើង ។
ត្រង់ចំណុចនេះ ឯកឧត្តមបានបញ្ជាក់ ផងដែរថា រោងចក្រ សហគ្រាស គ្រឹះស្ថាន ដែលធ្វើការលើសពី ១វេន ម្តងម្កាល គឺត្រូវបន្តអនុវត្តបទប្បញ្ញត្តិដែលមានជាធរមាន ។ លុបការឈប់នៅថ្ងៃបន្ទាប់សម្រាប់ថ្ងៃឈប់សម្រាកបុណ្យចំថ្ងៃអាទិត្យ ដូចដែលអនុវត្តចំពោះមន្ត្រីរាជការសាធារណទូទៅ និងការអនុវត្តនៅ ក្នុងបណ្តាប្រទេសមួយចំនួនក្នុងតំបន់ ។ ការកែសម្រួលនេះ គឺដើម្បីឆ្លើយតបទៅនឹងការវិវឌ្ឍផ្នែកសង្គម-សេដ្ឋកិច្ចកម្ពុជាសំដៅលើកកម្ពស់ផលិតភាពការងារ និងពង្រឹងភាពប្រកួតប្រជែងសេដ្ឋកិច្ចកម្ពុជាទាំងក្នុងតំបន់ និងសកលលោក ។
ក្រសួងនឹងពិនិត្យឱ្យបានគ្រប់ជ្រុងជ្រោយ និងធានាថាផលប្រយោជន៍របស់កម្មករនិយោជិតគ្រប់រូបមិនត្រូវបានកាត់បន្ថយ ។ លោកបន្តថា ការធ្វើវិសោធនកម្មច្បាប់នេះក៏ជាការពង្រីកវិសាលភាពសេវាកម្មរបស់ក្រុមប្រឹក្សាអាជ្ញាកណ្តាលក្នុងការដោះស្រាយវិវាទការងារបុគ្គលដូចការដោះស្រាយវិវាទការងាររួ មដែរ ដោយមូលហេតុថា ក្រុមប្រឹក្សាអាជ្ញាកណ្តាល គឺជាស្ថាប័នដោះស្រាយវិវាទការងារក្រៅប្រព័ន្ធតុលាការដែលទទួលបានការទុកចិត្តពីគ្រប់ភាគី ។
លោកបន្ថែមថា ចំណុចអាទិភាព ដែលក្រុមការងារបានសិក្សា និងរៀបចំដាក់ជូនអង្គសិក្ខាសាលាពិនិត្យនិងពិភាក្សារួមគ្នា ដើម្បីទទួលបានការឯកភាពគ្នាក្នុងការដាក់ចេញនូវដំណោះស្រាយកាន់តែល្អប្រសើរក្នុងការលើកកម្ពស់សិទ្ធិការងារ និងរក្សាបាននូវភាពប្រកួតប្រជែងរបស់កម្ពុជា ។ ជាមួយគ្នានោះដែរលោករដ្ឋមន្ត្រីបានលើកទឹកចិត្ត និងជំរុញឱ្យគ្រប់ភាគីធ្វើការពិភាក្សាឱ្យបានផុសផុលប្រកបដោយវិជ្ជាជីវៈក្នុងស្មារតីទទួលខុសត្រូវរួម ដើម្បីធានាបានភាពសុខដុមរមនាក្នុងទំនាក់ទំនងវិជ្ជាជីវៈ ។
ទន្ទឹមគ្នានេះដែរ ក្រសួងការងារ និងបណ្តុះបណ្តាលវិជ្ជាជីវៈបានត្រៀមខ្លួនរួចជាស្រេចក្នុងការបន្តកិច្ចសហការជាមួយដៃគូសង្គម និងភាគីពាក់ព័ន្ធ ដើម្បីរួមចំណែកជាមួយរាជរដ្ឋាភិបាលក្នុងការសម្រេចឱ្យបាននូវចក្ខុវិស័យកម្ពុជាឆ្នាំ២០៣០ ដែលជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់ ៕ កែសម្រួលដោយ ៖ សុឃាក់
ចែករំលែកព័តមាននេះ