បច្ចុប្បន្ននេះ មនុស្សម្នាក់ៗមានវិធីសាស្ត្រជាច្រើនក្នុងការស្គាក់មនុស្សនិងបង្កើតទំនាក់ទំនងសម្រាប់ការងារ ឬអាជីវកម្ម។ មធ្យោបាយទាំងនោះអាចមានជាប្រព័ន្ធសង្គមដូចជា LinkedIn ឬ Facebook ជាដើម ហើយពេលខ្លះ វាអាចបង្កជាភាពស្មុគស្មាញដល់អ្នកក្នុងការវិនិយោគពេលវេលា និងកម្លាំងលើវាជាដើម។
ជាមួយគ្នានេះផងដែរ ការបង្កើតទំនាក់ទំនងមានការផ្លាស់ប្តូរយ៉ាងខ្លាំងក្នុងរយៈពេលប៉ុន្មានឆ្នាំមកនេះ ដូច្នេះក្នុងឆ្នាំ ២០២០ នេះអ្នកអាចសាកល្បងវិធីសាស្ត្រខាងក្រោមថ្មីៗក្នុងការបង្កើតទំនាក់ទំនងដែលមានន័យបាន៖
១. កុំមើលរំលងទំនាក់ទំនងរវាងមនុស្សនិងមនុស្ស
មិនថាអ្នកព្យាយាមកសាងទំនាក់ទំនងតាមប្រព័ន្ធសង្គមឬតាមអ៊ីមែលទេ អ្នកមិនត្រូវភ្លេចពីការជួបគ្នាផ្ទាល់ទេព្រោះវាជួយឲ្យភាគីម្ខាងទៀតចងចាំអ្នកបានច្បាស់ជាងការទាក់ទងតាមប្រព័ន្ធសង្គម។ ការសិក្សាមួយពី UCLA បានប្រទះឃើញថាការប្រាស្រ័យទាក់ទងដែលមានប្រសិទ្ធិភាពគឺពឹងផ្អែកទៅលើមុខសញ្ញាដែលអាចតែកើតមានឡើងពេលដែលមនុស្សទាក់ទងគ្នាផ្ទាល់ប៉ុណ្ណោះ។
២. រក្សាទំនាក់ទំនងជាមួយគ្នាឲ្យបានយូរ
ប្រសិនបើអ្នកមានគោលបំណងចង់បង្កើតទំនាក់ទំនងជាមួយមនុស្សណាម្នាក់ អ្នកគួរតែតាមគាំទ្រនិងបញ្ចេញយោបល់លើអ្វីដែលពួកគេបានចែករំលែកលើប្រព័ន្ធសង្គមជាប្រចាំជាមុនសិន។ មិនយូរប៉ុន្មាន បុគ្គលម្នាក់នោះនឹងចាប់អារម្មណ៍ឈ្មោះរបស់អ្នក ហើយអ្នកថែមទាំងមានប្រធានបទទុកនិយាយពេលដែលជួបពួកគេផ្ទាល់នៅក្រៅផងដែរ។
៣. គុណភាព ល្អជាងចំនួន
អ្នកជំនាញ និងបុគ្គលដែលជោគជ័យជាច្រើនតែងតែផ្តល់ដំបូន្មានមកថា មនុស្សមិនគួរផ្តោតលើចំនួនមនុស្សដែលពួកគេស្គាល់ទេ តែលើភាពជិតដិតនៃទំនាក់ទំនងដែលពួកគេមានទៅវិញ។ អ្នកគួរតែផ្តោតធនធាន ពេលវេលា និងកម្លាំងលើមនុស្សមួយចំនួនដែលអ្នកគិតច្បាស់ថាពួកគេអាចនឹងជួយអ្នកបាន ឬមនុស្សដែលអ្នកតែងតែគោរពកន្លងមក។ លើសពីនេះទៅទៀត អ្នកគួរតែព្យាយាមស្គាល់អ្នកដឹកនាំ ឬមនុស្សដែលមានឥទ្ធិពលពីវិស័យខុសៗគ្នា ឬមនុស្សដែលស្គាល់អ្នកមកពីវិស័យខុសៗគ្នា ៕ កែសម្រួលដោយ ៖ សុឃាក់
ចែករំលែកព័តមាននេះ