រាជធានីភ្នំពេញ ៖ បុរសម្នាក់បើករថយន្តមួយគ្រឿងមកឈប់រង់ចាំសង្សារសង្ស័យក្នុងស្ថានភាពស្រវឹងជោក ហើយទំនងជាដាក់លេខរថយន្តច្រឡំជាន់ហ្គាទើបជ្រុលទៅបុករះរ៉ឺម៉កម៉ូតូកង់បីចំនួន៤គ្រឿង និងរថយន្តមួយគ្រឿងទៀតចតនៅតាមចិញ្ចើមផ្លូវ បណ្តាលអោយរងការខូចខាត ប៉ុន្តែសំណាងល្អមិនមាននរណាម្នាក់រងរបួសនោះទេ ។ ហេតុការណ៍ខាងលើនេះបានកើតឡើងកាលពីវេលាម៉ោង៥និង១៥នាទីទៀបភ្លឺថ្ងៃទី១០ ខែមករា…
រាជធានីភ្នំពេញ ៖ បុរសម្នាក់បើករថយន្តមួយគ្រឿងមកឈប់រង់ចាំសង្សារសង្ស័យក្នុងស្ថានភាពស្រវឹងជោក ហើយទំនងជាដាក់លេខរថយន្តច្រឡំជាន់ហ្គាទើបជ្រុលទៅបុករះរ៉ឺម៉កម៉ូតូកង់បីចំនួន៤គ្រឿង និងរថយន្តមួយគ្រឿងទៀតចតនៅតាមចិញ្ចើមផ្លូវ បណ្តាលអោយរងការខូចខាត ប៉ុន្តែសំណាងល្អមិនមាននរណាម្នាក់រងរបួសនោះទេ ។
ហេតុការណ៍ខាងលើនេះបានកើតឡើងកាលពីវេលាម៉ោង៥និង១៥នាទីទៀបភ្លឺថ្ងៃទី១០ ខែមករា ឆ្នាំ២០២០ នៅចំណុចក្បែរនឹងផ្សាររាត្រី តាមបណ្តោយផ្លូវ១០ ស្ថិតក្នុងសង្កាត់វត្តភ្នំ ខណ្ឌដូនពេញ ។
តាមប្រភពព័ត៌មានពីជុំវិញកន្លែងកើតហេតុបានអោយដឹងថា មុនពេលកើតហេតុ គេឃើញបុរសម្នាក់មិនស្គាល់អត្តសញ្ញាណនោះទេបានបើករថយន្តមួយគ្រឿងម៉ាកឡិចស៊ីស 400H ពណ៌ស ពាក់ស្លាកលេខ ភ្នំពេញ ២AC-៩០៤៨ បើកបរតាមបណ្តោយផ្លូវព្រះស៊ីសុវត្ថិមកឈប់រង់ចាំសង្សារនៅកែងផ្លូវ១០២ ទាំងស្ថានភាពស្រវឹងផងដែរ ។
តាមប្រភពដដែលបានបន្តថា ខណៈពេលកំពុងតែឈប់រថយន្តនោះ ស្រាប់តែអ្នកបើកបរបានដាក់លេខហើយច្រឡំជាន់ហ្គាក៏ជ្រុលទៅបុករះរ៉ឺម៉កម៉ូតូកង់បីដែលចតនៅតាមចិញ្ចើមផ្លូវ បណ្តាលឱ្យរ៉ឺម៉កម៉ូតូកង់បីក្រឡាប់ចំនួន២គ្រឿង និងរងការខូចខាតចំនួន២គ្រឿង ។
តាមប្រភពដដែលបានបន្តទៀតថា បន្ទាប់មករថយន្តបង្កបានបន្តទៅបុកខឿនចិញ្ចើមផ្ទះប្រជាពលរដ្ឋ រួចហើយរថយន្តបង្កមិនទាន់អស់ល្បឿននោះទេក៏រ៉ីយ៉ែថយក្រោយមកទៅបុក រថយន្តមួយគ្រឿងទៀតម៉ាកព្រូស ពណ៌ប្រផេះ ពាក់ស្លាកលេខ ភ្នំពេញ ២AN-០៩២៣ យ៉ាងពេញទំហឹង បណ្តាលឱ្យរងការខូចខាតទ្វារមុខផ្នែកខាងឆ្វេង និងធ្លាក់កាងខាងក្រោយ ។ ចំណែកឯរថយន្តបង្កម៉ាកឡិចស៊ីស400Hវិញរងការខូចខាតខ្ទេចអស់មួយកំណាត់ខាងមុខទៅមុខលែងរួច ហើយក្នុងហេតុការណ៍គ្រោះថ្នាក់ខាងលើនេះមិនបង្កអោយមានអ្នកណាម្នាក់រងរបួសនោះទេ ។
ក្រោយពេលកើតហេតុ រថយន្តបង្កនិងអ្នកបើកបររួមជាមួយនឹងរ៉ឺម៉កម៉ូតូកង់បីរងគ្រោះ ព្រមទាំងរថយន្តព្រូស ត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោកដើម្បីដោះស្រាយគ្នានៅពេលក្រោយជាបន្តទៀត ៕ (កែសម្រួលដោយ ៖ ធីតា)
ចែករំលែកព័តមាននេះ