រាជធានីភ្នំពេញ ៖ ក្រុមអតីតសមាជិកគណបក្សសង្គ្រោះជាតិ បានស្នើសុំទៅអគ្គនាយកដ្ឋាន ពន្ធគារ ដើម្បីសុំចូលជួបលោក មាជ សុវណ្ណារ៉ា លោកអ៊ុំ សំអាន និងអ្នក១០រូបផ្សេងទៀតនៅថ្ងៃទី៣១ ខែមិនា ឆ្នាំ២០១៨ ខាងមុខនេះ ។
យោងតាមពាក្យស្នើសុំចូលជួបសួរសុខទុក្ខរបស់លោកអ៊ូ ច័ន្ទរ័ត្ន អតីតសមាជិកសភាគណបក្សសង្គ្រោះជាតិ ដាក់ជូនអគ្គនាយកដ្ឋានពន្ធនាគារហើយ ត្រូវបានអគ្គនាយកដ្ឋានពន្ធនាគារទទួលនៅថ្ងៃទី២០ ខែមិនា ឆ្នាំ២០១៨ ដែលមានកម្មវត្ថុសុំអនុញ្ញាតចូលរួមសួរសុខទុក្ខ លោក មាជ សុវណ្ណារ៉ា លោកអ៊ុំ សំអាន និង១០នាក់ផ្សេងទៀតនៅថ្ងៃទី៣១ មិនាវេលាម៉ោង៨និង៣០នាទី ។ អ្នកដែលចួលរួមមានលោក អ៊ូ ច័ន្ទរត្ន លោក ម៉ៅ មុន្នីវណ្ណ លោកកង គឹមហាក់ លោកជីវ កក្តា និងលោក សៀវ សុត ។
បើតាមមន្ត្រីអតីតគណបក្សសង្គ្រោះជាតិបានឲ្យដឹងថា សំណើរសុំចូលជួបសួរសុខទុក្ខ ខាងលើត្រូវបានខាងពន្ធនាគារទទួលរួចហើយ ប៉ុន្តែមិនទាន់មានការឆ្លើយតបយ៉ាងណានោះទេ មកដល់ថ្ងៃនេះ ។
សូមជម្រាបថា ការស្នើសុំចូលជួបសួរសុខទុក្ខនេះ ស្របពេលដែលសម្តេចតេជោ ហ៊ុន សែន នាយករដ្ឋមន្ត្រីនៅថ្ងៃទី២១ មិនា បានប្រកាសជាថ្មីម្តងទៀតថា មិនមានការលើកលែងទោសដល់អតីតប្រធានគណបក្សសង្គ្រោះជាតិ និងសកម្មជនគណបក្សនេះនោះទេ ៕
ចែករំលែកព័តមាននេះ