រាជធានីភ្នំពេញ ៖ មន្ត្រីជាន់ខ្ពស់រដ្ឋលេខាធិការដ្ឋានអាកាសចរស៊ីវិលបានអះអាងថា រាជរដ្ឋាភិបាលត្រូវការទឹកប្រាក់៤០លានដុល្លារដើម្បីស្តារ និងសាងសង់ព្រលានយន្តហោះខេត្តស្ទឹងត្រែងឡើងវិញ ខណៈរាជរដ្ឋាភិបាលបាននិងកំពុងស្វះស្វែងរកក្រុមហ៊ុនឯកជន ដើម្បីចាប់ផ្តើមវិនិយោគព្រលានយន្តហោះនេះ ។ អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក…
រាជធានីភ្នំពេញ ៖ មន្ត្រីជាន់ខ្ពស់រដ្ឋលេខាធិការដ្ឋានអាកាសចរស៊ីវិលបានអះអាងថា រាជរដ្ឋាភិបាលត្រូវការទឹកប្រាក់៤០លានដុល្លារដើម្បីស្តារ និងសាងសង់ព្រលានយន្តហោះខេត្តស្ទឹងត្រែងឡើងវិញ ខណៈរាជរដ្ឋាភិបាលបាននិងកំពុងស្វះស្វែងរកក្រុមហ៊ុនឯកជន ដើម្បីចាប់ផ្តើមវិនិយោគព្រលានយន្តហោះនេះ ។
អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក ស៊ិន ចាន់សិរីវុត្ថា បានថ្លែង តាមទូរស័ព្ទនាព្រឹកថ្ងៃទី៩ ឧសភា កន្លងមកថា រដ្ឋលេខាធិការដ្ឋានអាកាសចរស៊ីវិលបាននិងកំពុងស្វះស្វែងរកដៃគូវិនិយោគពីវិស័យឯកជន តាមរយៈមធ្យោបាយ២គឺ ទី១ ធ្វើឡើងតាមរយៈក្រសួងសេដ្ឋកិច្ច និងហិរញ្ញវត្ថុ ដើម្បីទាញយកគម្រោងនេះពីគោលនយោបាយខ្សែក្រវាត់១ ផ្លូវ១ របស់ចិន ។ គម្រោងនេះបានដាក់ទៅកាន់ក្រសួងសេដ្ឋកិច្ច និងហិរញ្ញវត្ថុរួចហើយ និងទី២ តាមរយៈធនាគារអភិវឌ្ឍន៍អាស៊ី ដើម្បីឲ្យធនាគារនេះជួយស្វែងរកដៃគូវិនិយោគពីវិស័យឯកជន ។
លោកបន្តថា ៖« ការវិនិយោគសាងសង់ព្រលាននេះឡើងវិញ ត្រូវការទឹកប្រាក់ប្រមាណ៤០លានដុល្លារ ដែលមានទំហំទឹកប្រាក់ច្រើន ហើយអ្នកវិនិយោគត្រូវចំណាយពេលវេលាច្រើន ដើម្បីទាញយកផលចំណេញត្រឡប់មកវិញ » ។ លោកបន្តថា ៖« ទំហំទឹកប្រាក់នេះអាចប្រើប្រាស់បានសម្រាប់ពង្រីកព្រលាន ដែលអាចចុះចតអាកាសចរណ៍ក្នុងស្រុកប៉ុណ្ណោះ » ។
លោក ស៊ិន ចាន់សិរីវុត្ថា បានបន្ថែមថា បច្ចុប្បន្ន ព្រលានយន្តហោះខេត្តស្ទឹងត្រែង ស្ថិតក្រោមការគ្រប់គ្រងដោយអាជ្ញាធរខេត្ត ហើយជំនាន់លោក ឡូយ សុផាត ជាអភិបាលខេត្ត លោកបានទុកដីខ្លះសម្រាប់ពង្រីកព្រលាននេះ ប៉ុន្តែរហូតមកទល់ពេលនេះ យើងមិនដឹងថា មានការប្រែប្រួលយ៉ាងណានៅឡើយទេ ។
ព្រលានយន្តហោះខេត្តស្ទឹងត្រែង ជាព្រលានមួយដែលមានការរក្សាទុកបានល្អប្រសើរជាងគេ បើធៀបនឹងបណ្តាព្រលានយន្តហោះនៅតាមបណ្តាខេត្តនៃទឹកដីភូមិភាគឦសាននានា ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានថ្លែងថា ប្រសិនជាមានព្រលានយន្តហោះខេត្តស្ទឹងត្រែង លោកស្រីជឿថា ខេត្តនៅតាមបណ្តាភូមិភាគឦសាន នឹងមានការរីកចម្រើនលឿន ជាពិសេសភ្ញៀវទេសចរនឹងទៅទស្សនាកាន់តែច្រើន ព្រោះពួកគេចំណាយពេលតិចក្នុងការធ្វើដំណើរ ។
លោកស្រីបន្តថា ៖« ទោះបីការធ្វើដំណើរតាមផ្លូវគោកមានភាពងាយស្រួលក្តី ក៏ការធ្វើដំណើរត្រូវចំណាយពេលយូរ ។ ហេតុនេះ ប្រសិនជាមានព្រលានយន្តហោះ នឹងធ្វើឲ្យភ្ញៀវទេសចរមិនចាំបាច់ចំណាយពេលច្រើន » ។
លោកស្រីបន្ថែមថា ៖« ខេត្តស្ទឹងត្រែងក៏ជាខេត្តងាយស្រួលក្នុងការតភ្ជាប់ទៅបណ្តាខេត្តនៅភូមិភាគឦសានដទៃទៀត ដូចជា ក្រចេះ រតនគិរី និងខេត្តមណ្ឌលគិរី » ។
អ្នកវិនិយោគរមណីយដ្ឋាន Mekong Birdនៅក្នុងខេត្តស្ទឹងត្រែង លោក ថោង អូន បាននិយាយថា លោកជឿជាក់ថា ប្រសិនជាមានព្រលានយន្តហោះនៅក្នុងខេត្តស្ទឹងត្រែងសាងសង់និងដំណើរការឡើងវិញ ព្រលានយន្តហោះនេះនឹងទទួលបានជោគជ័យ ដោយសារភ្ញៀវទេសចរជាតិ-អន្តរជាតិនានាងាយស្រួលធ្វើដំណើរមកកម្សាន្ត ដោយមិនចាំបាច់ចំណាយពេលច្រើនក្នុងការធ្វើដំណើរ ។ លោក
បន្តថា ព្រលានយន្តហោះនេះ ក៏អាចតភ្ជាប់ជាមួយព្រលានយន្តហោះក្នុងតំបន់ ដូចជា ព្រលានយន្តហោះនៅប្រទេសឡាវ និង
ថៃ ជាដើម ។
លោកបន្តថា ៖« ការមកដល់របស់ភ្ញៀវទេសចរនៅមានកម្រិតនាភូមិភាគឦសាន ដោយសារកង្វះហេដ្ឋារចនាសម្ព័ន្ធ ។ ហេតុនេះ បើសិនជាមានព្រលាននេះ ខ្ញុំជឿថា នឹងមានភ្ញៀវធ្វើដំណើរមកកម្សាន្តច្រើន » ៕
ចែករំលែកព័តមាននេះ