ព្រឹកនេះ នាំគ្នាធ្វើពលកម្មសម្អាតក្រុងយើង
- ភ្នំពេញ
រាជធានីភ្នំពេញ ៖ នៅព្រឹកថ្ងៃទី ០៩ ធ្នូ នេះ កម្លាំងអាជ្ញាធរខណ្ឌមានជ័យ ដឹកនាំដោយលោកឡុង ង៉ែត អភិបាលរងខណ្ឌមានជ័យ…
រាជធានីភ្នំពេញ ៖ នៅព្រឹកថ្ងៃទី ០៩ ធ្នូ នេះ កម្លាំងអាជ្ញាធរខណ្ឌមានជ័យ ដឹកនាំដោយលោកឡុង ង៉ែត អភិបាលរងខណ្ឌមានជ័យ សហការជាមួយក្រុមហ៊ុន LG, យុវជនសង្កាត់ស្ទឹងមានជ័យទី១ ស្ទឹងមានជ័យទី២ និងក្រុមហ៊ុន ស៊ិនទ្រី បានចុះដើររើសសម្រាមសម្អាតអនាម័យ តាមបណ្តោយផ្លូវលេខ២១៧ ហៅផ្លូវព្រះមុន្នីរ៉េត ស្ថិតក្នុងសង្កាត់ស្ទឹងមានជ័យ១ ព្រុំប្រទល់សង្កាត់ស្ទឹងមានជ័យ២ ខណ្ឌមានជ័យ។
ការចុះរើសសម្រាមដើម្បីបរិស្ថានអនាម័យនេះ ធ្វើឡើងចាប់ពីចំណុចគល់ស្ពានអាកាសស្ទឹងមានជ័យ រហូតដល់ចំណុចច្រមុះជ្រូកស្ទឹងមានជ័យ ដែលមានប្រវែងដីជាង២គីឡូម៉ែត្រ ។
លោកឡុង ង៉ែត អភិបាលរងខណ្ឌមានជ័យ អោយដឹងថា ការចុះរើសសំរាមនៅពេលនេះ គឺធ្វើឡើងនៅក្នុងគោលបំណងថែរក្សានូវបរិស្ថានអនាម័យនៅតាមដងផ្លូវសាធារណះអោយបានស្អាតល្អ និងមានរបៀបរៀបរយត្រឹមត្រូវ ដើម្បីធានាបាននូវសុខុមាលភាពល្អ ជូនបងប្អូនពលរដ្ឋរស់នៅតាមបណ្តោយផ្លូវមួយខ្សែនេះ ក៏ដូចជាអ្នកដំណើរដែលបានធ្វើដំណើរឆ្លងកាត់ ។
ទន្ទឹមនឹងការចុះសម្អាតអនាម័យ លោកអភិបាលរង ក៏សូមធ្វើការអំពាវនាវដល់បងប្អូនរស់នៅប្របសងខាងផ្លូវ១ខ្សែនេះ ធ្វើយ៉ាងណាមេត្តាចូលរួមថែរក្សារក្សាបរិស្ថានអនាម័យទាំងអស់គ្នា ដោយជួយរើសសម្រាមដែលមាននៅមុខផ្ទះរបស់ខ្លួន ឬសម្រាមដែលសល់ពីកាកសំណល់ប្រើប្រាស់ មេត្តាច្រកចូលក្នុងថង់ ឬធុងសម្រាមទុកមួយកន្លែងអោយបានត្រឹមត្រូវល្អ ដើម្បីបង្កើនភាពងាយស្រួលដល់រថយន្តប្រមូលសម្រាមមកទទួលយកទាន់ពេលវេលា និងមានរបៀបរៀបរយល្អក្នុងការដើរប្រមែប្រមូល ។
លោកបន្ថែម បរិស្ថានអនាម័យស្អាតល្អ គឺមិនអាចផ្តើមចេញពីអាជ្ញាធរតែមួយផ្នែកបានឡើយ គឺត្រូវការការសហការចូលរួមពីបងប្អូនពលរដ្ឋទាំងអស់គ្នា ទើបបរិស្ថានក្នុងសង្គមយើង មានភាពស្រស់បំព្រងស្អាតល្អ ជានិរន្តភាព ៕
ចែករំលែកព័តមាននេះ