ទឹកខ្ពុរមាត់មានប្រយោជន៍ ប្រសិនបើអ្នកត្រូវការវាដើម្បីដោះស្រាយបញ្ហាជាក់លាក់មួយ ។ ប៉ុន្តែប្រសិនបើអ្នកប្រើវា ហើយបណ្តាលឱ្យមានបញ្ហា ផ្សេងៗទៀតដូចជាការឈឺចាប់ ស្ងួតមាត់ឬការកើនឡើងសម្ពាធឈាមដែលរំខានដល់ជីវិតរបស់អ្នក អ្នកប្រហែលជានឹងពិចារណាឡើងវិញថាគួរតែប្រើប្រាស់វាដែរឬទេ ។
ខាងក្រោមនេះគឺជាបញ្ហា ខ្លះៗនៅពេលអ្នកប្រើប្រាស់ទឹកខ្ពុលមាត់៖
១-បង្កើនសម្ពាធឈាម
ទឹកខ្ពុរមាត់ជួយលាងសម្អាតកម្ទេចកម្ទីអាហារ កំបោរជាប់ធ្មេញ និងបាក់តេរីចេញពីមាត់របស់អ្នក និងបន្សល់ភាពស្រស់ស្រាយដល់អ្នក ។ ប៉ុន្តែការកម្ចាត់បាក់តេរីអាក្រក់ចេញពីមាត់ វាក៏ធ្វើឲ្យបាត់បង់បាក់តេរីល្អក្នុងពេលជាមួយគ្នាដែរ ។ វាជាមូលហេតុដែលការសិក្សាស្រាវជ្រាវមួយបានរកឃើញថា ការខ្ពុរមាត់ពិតជាអាចនាំឱ្យមានបញ្ហាកាន់តែធំ ដូចជាធ្វើឲ្យសម្ពាធឈាមរបស់អ្នកកើនឡើង។ យោងតាមក្រុមអ្នកស្រាវជ្រាវ ទឹកខ្ពុរមាត់ដែលមានជាតិថ្នាំសម្លាប់មេរោគបណ្តាលឲ្យការផលិតនីទ្រីតដែលមានក្នុងមាត់ធ្លាក់ចុះ ៩០ ភាគរយ ។ កម្រិតនីទ្រីតនៅក្នុងប្លាស្មាក៏មានការធ្លាក់ចុះ ២៥ ភាគរយផងដែរ ។
២-ស្ងួតមាត់
ខណៈពេលទឹកខ្ពុរមាត់មួយចំនួនមានមុខងារធ្វើឲ្យមាត់របស់អ្នកមានសំណើម ចំណែកឯទឹកខ្ពុរមាត់មួយចំនួនទៀតអាចធ្វើឲ្យមាត់អ្នកស្ងួតខ្លាំង ។ គេសង្ស័យថា ជាតិអាល់កុលដែលមានក្នុងទឹកខ្ពុរមាត់បណ្តាលឲ្យមានបញ្ហានេះ ប៉ុន្តែវាប្រហែលជាមិនពិតទាំងស្រុងនោះទេ ។ ការសិក្សាមួយបានរកឃើញថា អ្នកដែលមានបញ្ហាស្ងួតមាត់នេះគឺមិនមានភាពខុសគ្នាចំពោះការប្រើទឹកខ្ពុរមាត់មានជាតិអាល់កុល ឬគ្មាន ។ ដើម្បីចៀសវាងបញ្ហានេះ អ្នកអាចស្វែងរកមធ្យោបាយធម្មជាតិជំនួសឲ្យទឹកខ្ពុរមាត់វិញ ។
៣-មានការឈឺចាប់
ការប្រើប្រាស់ទឹកខ្ពុរមាត់មិនគួរណ្តាលឱ្យអ្នកមានការឈឺចាប់ណាមួយឡើយ ។ ទោះជាយ៉ាងណាក្តី ជាតិអេតាណុល និងធាតុផ្សំផ្សេងទៀត (ដែលមិនទាន់បានកំណត់ដោយក្រុមអ្នកស្រាវជ្រាវ) ក្នុងទឹកខ្ពុរមាត់ដែលមានជាតិអាល់កុលអាចបណ្តាលឲ្យមានបញ្ហានេះ។ ប្រសិនបើអ្នកមានរបួសភ្នាសទន់ក្នុងមាត់ អ្នកគួរតែជៀសវាងការប្រើទឹកខ្ពុរមាត់មានជាតិអាល់កុល ដែលវាអាចធ្វើឲ្យមុខរបួសរបស់អ្នកកាន់តែមានសភាពអាក្រក់ឡើង។
៤-ហានិភ័យនៃការកើតជំងឺមហារីក
ការទាក់ទងរវាងការប្រើប្រាស់ទឹកខ្ពុរមាត់ និងជំងឺមហារីកមានភាពចម្រូងចម្រាសយ៉ាងខ្លាំង ។ ខណៈពេលដែលការស្រាវជ្រាវពីមុនធ្លាប់បានរកឃើញពីការទាក់ទងនេះ ប៉ុន្តែការស្រាវជ្រាវថ្មីបន្ថែមទៀតមិនទាន់អាចបញ្ជាក់ថា ការប្រើប្រាស់ទឹកខ្ពុរមាត់អាចបង្កើនហានិភ័យនៃជំងឺមហារីកបំពង់អាហារផ្នែកខាងលើនៅឡើយទេ ៕
ចែករំលែកព័តមាននេះ