រាជធានីភ្នំពេញ ៖ ក្នុងពិភពសិល្បៈរមែងកើតមានទំនាស់រវាងផលិតករ ឬអ្នកដឹកនាំរឿង ជាមួយតួសម្តែង ។ ទំនាស់មានច្រើនរូបភាពដូចជាអ្នកដឹកនាំរឿងមិនសប្បាយចិត្តចំពោះតួសម្តែងមិនគោរពពេលវេលា និងតារាសម្តែងខឹងផលិតករមិនបើកប្រាក់ឱ្យជាដើម ។ លោកគាំ…
រាជធានីភ្នំពេញ ៖ ក្នុងពិភពសិល្បៈរមែងកើតមានទំនាស់រវាងផលិតករ ឬអ្នកដឹកនាំរឿង ជាមួយតួសម្តែង ។ ទំនាស់មានច្រើនរូបភាពដូចជាអ្នកដឹកនាំរឿងមិនសប្បាយចិត្តចំពោះតួសម្តែងមិនគោរពពេលវេលា និងតារាសម្តែងខឹងផលិតករមិនបើកប្រាក់ឱ្យជាដើម ។
លោកគាំ ចន្ធី ចាងហ្វាងផលិតកម្មFCIកាលពីពេល ថ្មីៗកន្លងមកលើកឡើងថា «ខ្ញុំប្រឡូកការងារជាមួយតួសម្តែងជិត២០ឆ្នាំមកហើយ គឺស្គាល់រសជាតិច្រើន ។ អ្វីក៏មានដែរទាំងរូបភាពមិនល្អរបស់តួជាដើម ។ តួយ៉ាងថ្មីៗនេះខ្ញុំស្ទើរតែផ្ទុះជម្លោះជាមួយតារាសម្តែងស្រីល្បីឈ្មោះម្នាក់ដែលមិនគោរពពេលវេលា មិនទទួលខុសត្រូវទាល់តែសោះធ្វើឲ្យខ្ញុំរាងចាលធ្វើការជាមួយ ។ តារាស្រីម្នាក់នោះទៅសម្តែងមិនដែលទាន់ពេល ហើយកើតហេតុផលស្ទះផ្លូវ ជាប់រវល់នេះរវល់នោះមិនស្វាង ធ្វើឲ្យខកការងារជាក្រុម ព្រោះប្លង់ត្រូវថតអត់តួ ដូច្នេះរំសាយការងារ ។
បើនិយាយពីតម្លៃទីផ្សារវិញគឺបានខ្ពស់គ្រាន់ បើ តែចរិតមកធ្វើការវិញឡើងវិលមុខតែម្តងមិនយូរមិនឆាប់ទេនាងនោះអាចនឹងខូចឈ្មោះ» ។
លោកគាំ ចន្ធី បញ្ជាក់ ថា លោកមិនដែលកេងចំណេញលើតួទេ ឲ្យតែមានសមត្ថភាពថ្មីក៏ដោយចាស់ក៏ដោយ លោកនៅតែផ្តល់ឱកាសជូន ។
លោកហ៊ុយ យ៉ាឡេង ចាងហ្វាងផលិតកម្មមាតុចក្រដែលធ្វើការងារសិល្បៈយូរមកហើយនោះលោកថាតែងតែលេចឮពីរឿងផលិតករមួយចំនួនដោះដូរជាមួយតួស្រី តែសម្រាប់លោកផ្ទាល់មិនធ្លាប់គិតទាល់តែសោះ ។ រឿងបែបនោះធ្វើឲ្យអ្នកមិនប្រព្រឹត្តខូចឈ្មោះដែរ ។
លោកហ៊ុយ យ៉ាឡេង តែងតែជួយតួអង្គនីមួយៗ តាមរយៈការណែនាំពន្យល់របៀបសម្តែងឱ្យកាន់តែល្អឡើង ។
ចាងហ្វាយផលិតកម្មលោកហ៊ុយ យ៉ាឡេង និយាយថា «ប្រសិនបើមានបញ្ហានេះមែនខ្ញុំសោកស្តាយ ហើយផលិតករគួរតែខិតខំធ្វើបែបណាចម្រាញ់តួឲ្យបានល្អ ចេញពីទេពកោសល្យជាជាងគេល្បីផលិតករយកតួធ្វើជារបស់កំដរអារម្មណ៍» ។
អ្នកស្រីថុង សៀវទៀង ម្ចាស់ផលិតកម្មចក្កវាឡពេជ្រភាពយន្ត រមែងផ្តល់ឱកាសឲ្យតួជាច្រើនបានសម្តែង បើទោះជាតួចាស់ក៏ដោយថ្មីក៏ដោយ ព្រោះចង់ឲ្យពួកគេមានទីផ្សាររកប្រាក់ចំណូល ។ ចំពោះការលេចឮថាតួចង់ល្បីដោះដូរខ្លួនប្រាណ ឬយកប្រាក់តម្កល់ឲ្យផលិតករដើម្បីជួយខ្លួនឱ្យល្បីលេចធ្លោនោះ សម្រាប់អ្នកស្រីផ្ទាល់គ្មានគិតអគតិបែបនេះឡើយ ។ អ្នកស្រីតែងតែជួយសិល្បករឲ្យមានការងារធ្វើ ហើយពេលថតរៀបចំបាយទឹក នំចំណីអាហារជូន ។
កញ្ញាសោភា ទេពី តារាសម្តែងថ្មីឲ្យដឹងថា សម្រាប់នាង មិនគាំទ្រទស្សនៈយល់ឃើញមិនល្អចំពោះតួសម្តែងបែបនោះទេ ។ ចំពោះនាយផ្ទាល់ជាអ្នករបាំ និងយល់ថាចាប់អាជីពសិល្បៈ លំបាកណាស់ទម្រាំមានគេស្គាល់ គឺឆ្លងកាត់ការតស៊ូខ្លាំង ។ នាងនិយាយថា«មិនមែនព្រោះតែចង់ល្បីដោះដូរខ្លួនយកលុយសូកប៉ាន់ផលិតករអាចជួយឲ្យល្បីល្បាញបាននោះទេ គឺចេញពីទេពកោសល្យជាការសំខាន់» ។
លោកលាង ឧត្តម តារាសម្តែងដែលពេលនេះកំពុងមមាញឹកខ្លាំងលើកឡើងថា ពីដំបូងលោកជាអ្នកចម្រៀង ហើយប្រឡូកសិល្បៈយូរមកហើយអត់ទៅមុខសោះក៏ចង់លាឈប់ព្រោះថាមិនដឹងនៅតស៊ូបែបណាទៀត បើមិនល្បីទៅណាផង ។ លុះមានផលិតករហៅសម្តែងលោកស្រឡាញ់ការសម្តែងផងចេះតែព្យាយាមរហូតទទួលបានជោគជ័យ។
ចំពោះការងារដែលលោកបន្តថតកុនបានពីមួយរឿងទៅមួយរឿងគឺបានមកពីទេពកោសល្យមិនមែនបានមកពីយកលុយសូកប៉ាន់ទេ ។ «អ៊ីចឹង ប្អូនៗដែលស្រឡាញ់សិល្បៈ គឺតែគិតគូរពីសមត្ថភាព ការព្យាយាមអត់ធ្មត់ គោរពពេលវេលាវាអាចជួយឲ្យយើងទៅមុខបាន» ៕
ចែករំលែកព័តមាននេះ