រាជធានីភ្នំពេញ៖ យោងតាមរបាយការណ៍របស់ធនាគារជាតិនៃកម្ពុជា គិតត្រឹមដំណាច់ត្រីមាសទី១ឆ្នាំ ២០១៩ ទំហំឥណទានក្នុងប្រព័ន្ធធនាគារ បានកើនឡើងដល់ជាង២៧ប៊ីលានដុល្លារអាមេរិក ដែលទំហំឥណទាននេះស្មើនឹងប្រមាណ១១៤ ភាគរយនៃ GDP របស់កម្ពុជា ពោល គឺខ្ពស់ជាង ផលិតផលក្នុងស្រុកសរុបទៅទៀត ។ កំណើនខ្ពស់បែបនេះ សេដ្ឋវិទូកម្ពុជាបាននិយាយថា គឺមានទាំងផលវិជ្ជមាន និងអវិជ្ជមាន ហើយបើសិនការគ្រប់គ្រងឥណទាននេះមិនបានល្អនោះ ផលអវិជ្ជមាននឹងមានច្រើនជាងវិជ្ជមាន ។
លោក ង៉ែត ជូ ទីប្រឹក្សាសេដ្ឋកិច្ចជាន់ខ្ពស់នៃក្រុមហ៊ុន EMC បានអោយដឹងថា ការផ្ដល់ឥណទានកាន់តែច្រើនក្នុងវិស័យឯកជន វាមិនអាក្រក់ទេបើសិនជាឥណទាននោះ ត្រូវបានយកទៅប្រើប្រាស់ដើម្បីភាពរីកចម្រើន និងបង្កើនប្រាក់ចំណូល ដូចជាយកទៅបង្កើតអាជីវកម្ម បង្កើតការងារជូនពលរដ្ឋរកប្រាក់ចំណូលជាដើម ហើយអាចមានលទ្ធភាព ក្នុងការសងត្រលប់ទៅកាន់ធនាគារវិញ។ ម្យ៉ាងទៀតវាក៏នឹងជំរុញកំណើនសេដ្ឋកិច្ចកម្ពុជាយើងកាន់តែរីកចម្រើនលឿនរហ័សផងដែរ ។ ផ្ទុយទៅវិញបើសិនជាកម្ចីឥណទានច្រើនមែន តែជាកម្ចីឥណទានដែលមិនបានបង្កើនប្រាក់ចំណូល ដូចជាកម្ចីសម្រាប់បង់រំលស់ នានា គឺវាបានចូលរួមចំណែកតិចតួចក្នុងការរីកចម្រើន ពីព្រោះកម្ចីប្រភេទនេះ គឺមិនទាក់ទងនឹងការផលិតការបង្កើតដើម្បីបង្កើនផលិតភាពផលិតផលក្នុងស្រុកបន្ថែមនោះទេ ។
លោក ង៉ែត ជូ បានបន្តថា «ប្រព័ន្ធធនាគារ ក៏ត្រូវតែមានយុទ្ធសាស្ត្រគ្រប់គ្រងឥណទានឲ្យបានម៉ត់ចត់ដែរ ព្រោះការផ្ដល់ឥណទានដោយមិនបានសិក្សាពីចំណូលច្បាស់លាស់ វានឹងបង្កជាហានិភ័យនៅថ្ងៃអនាគត »។ លោកបន្តថា វាក៏ជាការព្រួយបារម្ភមួយផងដែរនូវកម្ចីឥណទានដែលមានទំហំធំជាងផលិតផលក្នុងស្រុក ដូច្នេះត្រូវទាមទារឱ្យមានការត្រួតពិនិត្យឡើងវិញ ឬត្រូវរកយន្តការមួយចំនួន ដើម្បីដាក់ចេញឲ្យមានប្រសិទ្ធភាព ធ្វើយ៉ាងណាត្រូវប្រាកដថា កំណើននៃទំហំឥណទានជាកំណើនប្រកបដោយចីរភាព និងចូលរួមដល់ការអភិវឌ្ឍសេដ្ឋកិច្ចពិតប្រាកដ ។
យោងតាមរបាយការណ៍របស់ការិយាល័យឥណទានកម្ពុជា បានបង្ហាញផងដែរថា ឥណទានដែលផ្ដល់ទៅវិស័យឯកជនភាគច្រើនគឺនៅក្នុងវិស័យសំណង់ និងអចលនទ្រព្យ ហើយធនាគារពិភពលោក ក៏បានស្នើអោយបណ្ដាញធនាគារនានាគិតគូរអោយបានម៉ត់ចត់ផងដែរ ពីការផ្ដល់ប្រាក់កម្ចីទៅក្នុងវិស័យសំណង់និងអចលនទ្រព្យនេះ ក្នុងពេលវាកំពុងមានសន្ទុះងើបឡើងខ្លាំងនាពេលបច្ចុប្បន្ននេះ ។
លោក លី សូដេត សេដ្ឋវិទូជាន់ខ្ពស់ធនាគារពិភពលោកប្រចាំកម្ពុជា បានមានប្រសាសន៍ថានៅក្នុងវិស័យនិងអចលនទ្រព្យនៅកម្ពុជាកំពុងសន្ទុះងើបឡើងខ្លាំង ដូច្នេះហើយលោកចង់អោយធនាគារទាំងអស់ គួររឹតបន្តឹងចំពោះការផ្ដល់កម្ចីឥណទានបន្ថែមទៀតក្នុងវិស័យនេះ ដើម្បីការពារហានិភ័័យដែលនឹងកើតឡើងនៅពេលអនាគត ។ លោក លី សូដេត បានបន្ថែមថា «យើងមិនហាមធនាគារផ្ដល់កម្ចីដល់វិស័យនេះទេ តែយើងសូមអោយធនាគាររឹតបន្តឹងដោយសិក្សាច្បាស់លាស់មុននឹងផ្ដល់កម្ចីទៅលើវិស័យសំណង់ ព្រោះថាវិស័យសំណង់នៅកម្ពុជានាពេលនេះ វាបានឡើងដល់ចំណុចកំពូលមួយហើយ ដូច្នេះហើយយើងមិនដឹងថាវានឹងធ្លាក់ចុះវិញនៅពេលណានោះទេ» ។
លោកជា ចាន់តូ ទេសាភិបាលធនាគារជាតិនៃកម្ពុជាកាលពីពេលថ្មីៗនេះបានឱ្យដឹងថា គិតត្រឹមដំណាច់ខែមីនា ឆ្នាំ ២០១៩ ទំហំប្រាក់បញ្ញើពីប្រជាពលរដ្ឋក្នុងវិស័យធនាគារនិងមីក្រូហិរញ្ញវត្ថុ មានចំនួន ២៣ពាន់លានដុល្លារអាមេរិក ចំណែកឥណទានឯកជនវិញមានរហូតដល់២៧ពាន់លានដុល្លារអាមេរិក ពោលគឺច្រើនជាង GDP ក្នុងស្រុករបស់កម្ពុជាទៅទៀត ដែលមានត្រឹមតែជាង២៤ពាន់លានដុល្លារអាមេរិកប៉ុណ្ណោះ ។ លោកបន្តថា វិស័យធនាគារនៅកម្ពុជាបាននិងកំពុងបន្តរីកចម្រើនទាំងទំហំនិងវិសាលភាពប្រកបដោយសុវត្ថិភាព និងបរិយាប័ន្ន ក្នុងនោះគិតត្រឹមត្រីមាសទី១ឆ្នាំ ២០១៩ ប្រាក់បញ្ញើក្នុងប្រព័ន្ធធនាគារបានកើនឡើងជិត២៣ពាន់លានដុល្លារអាមេរិក ស្មើនឹង១០៨ភាគរយនៃផលិតផលក្នុងស្រុកសរុប ។ចំណែកឥណទានក្នុងវិស័យឯកជនបានកើនឡើងជិត២៧ពាន់លានដុល្លារអាមេរិក ដែលស្មើនឹង១១៤ភាគរយនៃផលិតផលក្នុងស្រុកសរុប។
គួរបញ្ជាក់ថា យោងតាមរបាយការណ៍របស់ធនាគារជាតិនៃកម្ពុជា ធនាគារពាណិជ្ជកំពុងធ្វើប្រតិបត្តិការនៅក្នុងប្រទេសមានចំនួន៤៣, ធនាគារឯកទេសចំនួន១៤, គ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជនមាន៧, គ្រឹះស្ថានមីក្រូហិរញ្ញវត្ថុ មិនទទួលប្រាក់បញ្ញើពីអតិថិជនមាន៧៤, គ្រឹះស្ថានឥណទានជនបទមាន២៧៣, ក្រុមភតិសន្យាហិរញ្ញវត្ថុមាន១៥ ក្រុមហ៊ុនក្រេឌីតប្យូរ៉ូ ខេមបូឌាមាន១ ក្រុមហ៊ុនសវនកម្មមាន១០ និង គ្រឹះស្ថានផ្ដល់សេវាទូទាត់សងប្រាក់១៤ ៕ កែសម្រួលដោយ ៖ សុឃាក់
ចែករំលែកព័តមាននេះ