ប្រទេសអេត្យូពី ះ ជាលើកទី២កាលពីថ្ងៃទី១០មីនាយន្តហោះធុនប៊ូអីុង737MAX8១គ្រឿងទៀត បានធ្លាក់តែប៉ុន្មាននាទីប៉ុណ្ណោះក្រោយការហោះចេញ បែបនេះនាំឲ្យមានការលើកពីបណ្ដាបញ្ហាចំពោះយន្តហោះធុននោះ របស់ក្រុមហ៊ុនប៊ូអីុងអាមេរិក។ប្រធានអគ្គនាយករបស់ក្រុមហ៊ុនអាកាសចរណ៍ETHIOPIAN AIRLINESប្រកាសថា យន្តហោះ១គ្រឿងរបស់ក្រុមហ៊ុនលោក ដែលធានាការហោះហើររវាងទីក្រុងអាឌីសអាបេបានិងទីក្រុងណៃរ៉ូប៊ីកេនយ៉ា បានធ្លាក់នាថ្ងៃទី១០មីនា ដោយសម្លាប់មនុស្សទាំង១៥៧នាក់ជិះក្នុងនោះ ។ ក្នុងចំណោមជនរងគ្រោះទាំងនេះមានជនជាតិបារាំង៧នាក់និងបុគ្គលិកអ.ស.ប១៩នាក់ ព្រមទាំងជនបរទេសច្រើននាក់ទៀត។
ប្រធានអគ្គនាយករូបនោះលោកTEWOLDE GEBREMARIAM បញ្ជាក់ថា អ្នកបើកយន្តហោះនោះដែលធានាជើងហោះហើរET 302 បានប្រាប់ក្រោយការហោះចេញ ពីការលំបាកនានា ហើយស្នើហោះបកក្រោយវិញ។ តែយន្តហោះបានធ្លាក់នៅជិតទីក្រុងBISHOFTU ចម្ងាយ៦២គីឡូម៉ែត្រភាគអាគ្នេយ៍រដ្ឋធានីអេត្យូពីក្រុងអាឌីសអាបេបា។ យន្តហោះនោះបានហោះចេញនាវេលាម៉ោង៨និង៣៨នាទីម៉ោងក្នុងស្រុក ហើយក្នុងចំណោមអ្នកដំណើរ១៤៩នាក់និងសមាជិកក្រុមយានិក៨នាក់ពុំមាននរណាម្នាក់នៅរស់រានមានជីវិតឡើយ។ បណ្ដាសារព័ត៌មានបានផ្សាយរូបភាពនានានៃកន្លែងយន្តហោះធ្លាក់ បង្ហាញពីរណ្ដៅធំមួយព្រមទាំងបំណែកនៅសល់តូចៗ។ យន្តហោះក្រោយការធ្លាក់បានផ្ទុះបែកខ្ទេចអស់ ដោយបំណែកភាគច្រើនមានភ្លើងឆេះរោល។
ប្រធានអគ្គនាយកក្រុមហ៊ុនETHIOPIAN AIRLINESបន្តថា ក្រៅពីជនជាតិបារាំង៧នាក់ក្នុងយន្តហោះក៏មានជនជាតិកេនយ៉ា៣២នាក់ កាណាដា១៨នាក់ អីុតាលី៨នាក់ អាមេរិក៨នាក់ ចិន៨នាក់ អង់គ្លេស៧នាក់ អេហ្សុីប៦នាក់ ហូឡង់៥នាក់ ឥណ្ឌា៤នាក់ ស្លូវ៉ាគី៤នាក់ អូឌ្រីស៣នាក់ ស៊ុយអែត៣នាក់ រុស្សុី៣នាក់ ម៉ារ៉ុក២នាក់ អេស្ប៉ាញ២នាក់ ប៉ូឡូញ២នាក់ អីុស្រាអែល២នាក់និងបែលហ្សុិុកម្នាក់។ សរុបជនរងគ្រោះមានសញ្ញាតិខុសគ្នាដល់ទៅ៣៣សញ្ញាតិ។
ក្នុងសេចក្ដីប្រកាសមួយនាទីក្រុងហ្សឺណែវ នាយកនៃអង្គការអន្តោប្រវេសន៍អន្តរជាតិOIM លោកANTONIO VITORINO គូសបញ្ជាក់ថា បើតាមសេចក្ដីរាយការណ៍ដំបូងនានាថា សមាជិក១៩នាក់ នៃអង្គការ៥ជាសាខាអ.ស.បបានត្រូវស្លាប់ ក្នុងគ្រោះថ្នាក់ធ្លាក់យន្តហោះនោះ។ លោកគូសបញ្ជាក់ថា សោកនាដកម្មនោះប៉ះពាល់ខ្លាំងបំផុតដល់គ្រួសារទាំងមូលនៃអ.ស.ប។ បណ្ដាទង់របស់អ.ស.បត្រូវបង្ហូតត្រឹមពាក់កណ្ដាលដង ជាការចូលរួមសម្ដែងការកាន់ទុក្ខ។ យន្តហោះដែលធ្លាក់ជាយន្តហោះប្រភេទតែមួយដូចយន្តហោះរបស់ក្រុមហ៊ុនអាកាសចរណ៍ឥណ្ឌូណេសីុ LION AIR ដែលធ្លាក់ក្នុងកាលៈទេសៈដូចគ្នាទៀតគឺប៉ុន្មាននាទីក្រោយការហោះចេញ៕
ចែករំលែកព័តមាននេះ