សហរដ្ឋអាមេរិក ៖ កិច្ចដំណើរការរបស់មន្ត្រីរដ្ឋការសហព័ន្ធ អាចដើរវិញហើយប៉ុន្តែលោកដូណាល់ត្រាំ កាលពីថ្ងៃទី១២កុម្ភៈហាក់ដូចជាបង្កើនការគំរាម ពីការស្ទះថ្មីនៃរដ្ឋបាលសហព័ន្ធអាមេរិកដោយនិយាយថា លោកតូចចិត្តខ្លាំងណាស់ចំពោះកិច្ចព្រមព្រៀងមួយដែលសម្រេចបាន រវាងពួកអ្នកចរចានៃគណបក្សសាធាណរដ្ឋនិងគណបក្សប្រជាធិបតេយ្យ ដោយមានការផ្ដល់ថវិកាតែ១ភាគ៤នៃថវិកាដែលលោកទាមទារ សម្រាប់កសាងជញ្ជាំងព្រំដែនជាមួយមិុកសិុក រាំងខ្ទប់ពួកអន្តោប្រវេសន៍លួចលាក់។
ដោយពុំបញ្ជាក់ថាហេតុអី ប្រធានាធិបតីអាមេរិកឲ្យដឹងថា លោកអាចស្វែងរកតាមច្រកផ្សេងៗ ដោយពុំចាំបាច់ឆ្លងកាត់សភា មូលនិធិបន្ថែមសម្រាប់ផ្គត់ផ្គង់ ដល់ការកសាងជញ្ជាំងនោះ។ កាលពីយប់ថ្ងៃទី១១កុម្ភៈ ពួកអ្នកចរចារបស់គណបក្សទាំង២ សម្រេចបានកិច្ចព្រមព្រៀងថវិកា ជាគោលការណ៍មួយ។
កិច្ចព្រមព្រៀងនោះ ដែលគ្រោងផ្ដល់ប្រាក់តែ១,៣ពាន់លានដុល្លារ ពិសេសសម្រាប់កសាងរបាំងព្រំដែនថ្មីប្រវែងប្រមាណជា៩០គីឡូម៉ែត្រនៅព្រំដែនជាមួយមិុកសុិក ដែលតិចជាងឆ្ងាយការទាមទាររបស់លោកត្រាំ ដល់ទៅជិត៦ពាន់លានដុល្លារ។ គម្រោងច្បាប់ចេញពីកិច្ចព្រមព្រៀងនោះ នឹងដាក់ជូនព្រឹទ្ធសភាចាប់ពីយប់ថ្ងៃទី១៣កុម្ភៈទៅ។
នៅសេតវិមានលោកត្រាំនិយាយថា លោកតូចចិត្តខ្លាំងណាស់ចំពោះអ្វី ដែលពួកអ្នកប្រជាធិបតេយ្យស្នើចំពោះយើង។ តែមិនថ្វីទេខ្ញុំអាចរកប្រាក់មកបន្ថែម ហើយរឿងជញ្ជាំងព្រំដែននោះនឹងដើរទៅមុខ គឺយើងនឹងកសាងជញ្ជាំងដ៏ល្អ ធំនិងរឹងមាំមួយ៕
ចែករំលែកព័តមាននេះ