ខេត្តកណ្ដាល ៖ យ៉ាងហោចណាស់បុរស២នាក់បានរងរបួសធ្ងន់ កៀបជាប់ក្នុងកាប៊ីនរថយន្ត ក្នុង ហេតុការណ៍គ្រោះថ្នាក់ចរាចរណ៍រវាងរថយន្តកាមរីឆ្លាមមួយគ្រឿង បើកទៅបុកពេញទំហឹងពីមុខ រួចខ្ទាតទៅបុកពាក់កណ្ដាលរថយន្តកុងតឺន័រមួយគ្រឿងទៀត បណ្ដាលឲ្យរថយន្តឆ្លាមរួញជាប់កាប៊ីនមុខខ្ទេចផ្នែកខាងមុខស្ទើរទាំងស្រុង ។…
ខេត្តកណ្ដាល ៖ យ៉ាងហោចណាស់បុរស២នាក់បានរងរបួសធ្ងន់ កៀបជាប់ក្នុងកាប៊ីនរថយន្ត ក្នុង ហេតុការណ៍គ្រោះថ្នាក់ចរាចរណ៍រវាងរថយន្តកាមរីឆ្លាមមួយគ្រឿង បើកទៅបុកពេញទំហឹងពីមុខ រួចខ្ទាតទៅបុកពាក់កណ្ដាលរថយន្តកុងតឺន័រមួយគ្រឿងទៀត បណ្ដាលឲ្យរថយន្តឆ្លាមរួញជាប់កាប៊ីនមុខខ្ទេចផ្នែកខាងមុខស្ទើរទាំងស្រុង ។
ចំណែកឯរថយន្តកុងតឺន័របានផ្ទុះកង់ក្រោយខាងឆ្វេងចំនួន៣ និងដាច់កង់ចេញពីរថយន្តអស់១ខ្ទាតនៅក្បែរកន្លែងកើតហេតុ ចំណែកទូកុងតឺន័រផ្ទុកខ្លាញ់ត្រីរលំធ្លាក់ទៅចំកន្លែងលក់ទឹកអំពៅហូរហៀរខ្លាញ់ត្រីពេញផ្លូវ ភ្លាមៗនោះប្រជាពលរដ្ឋនាំគ្នាជួយគាស់យកបុរសម្នាក់ចេញមកខាងក្រៅ ចំណែកម្នាក់ទៀតនៅកៀបជាប់ក្នុងកាប៊ីនរថយន្តបង្កការភ្ញាក់ផ្អើលយ៉ាងខ្លាំង ។ ហេតុការណ៍គ្រោះថ្នាក់ចរាចរណ៍ដ៏សាហាវនេះបានកើតមានឡើង កាលពីវេលាម៉ោង០២និង៤០នាទីទាបភ្លឺ ឈានចូលថ្ងៃទី៤ ខែមករា ឆ្នាំ២០១៩នេះ នៅលើកំណាត់ផ្លូវជាតិលេខ១ ត្រង់ចំណុចមុខផ្សារគគីរ ឃុំគគីរ ស្រុកកៀនស្វាយ ខេត្តកណ្តាល ។
អ្នកបើកបររថយន្តដែលកៀបជាប់ក្នុងកាប៊ីនមានឈ្មោះ យ៉ង ម៉ាច អាយុប្រហែល៣៥ឆ្នាំ ភេទប្រុស មុខរបរធ្វើការនៅកំពង់ផែ មានទីលំនៅឃុំបន្ទាយដែក ស្រុកកៀនស្វាយ ខេត្តកណ្ដាល ។ រីឯអ្នករួមដំណើរមានឈ្មោះ សួស គុណសារ៉ាក់ ភេទប្រុស អាយុ២៣ឆ្នាំ មានទីលំនៅភូមិខ្សុំ ឃុំបន្ទាយដែក ស្រុកកៀនស្វាយ ខេត្តកណ្តាល ។
ចំណែកអ្នកបើកបររថយន្តកុងតឺន័រមានឈ្មោះ កាន់ ប៊ុនលី ភេទប្រុស អាយុ២១ឆ្នាំ មានទីលំនៅភូមិបេង ឃុំភ្នាយ ស្រុកសំរោងទង ខេត្តកំពងុស្ពឺ សាក្សីដែលឃើញហេតុការណ៍បានប្រាប់អោយដឹងថា នៅមុនពេលកើតហេតុគេឃើញរថយន្តកាមរីឆ្លាមមួយគ្រឿង ពណ៌ស្ករ ពាក់ស្លាកលេខភ្នំពេញ 2K-7730 បើកបរក្នុងទិសដៅមកលិចមកកើតក្នុងល្បឿនយ៉ាងលឿន លុះដល់ចំណុចកើតហេតុមុខផ្សារគគីរ ដែលជាចំណុចផ្លូវកោង ស្រាប់តែមានរថយន្តកុងតឺន័រមួយគ្រឿង ក្បាលពណ៌ស សណ្ដោងកន្ទុយដឹកទូកុងតឺន័រ (មិនចាំស្លាកលេខ) បើកក្នុងទិសដៅបញ្ច្រាសទិសចរាចរណ៍គ្នាពីកើតមកលិចវិញ ស្រាប់តែរថយន្តកាមរីឆ្លាម បានបើកទៅបុកចំបញ្ឆិតពីមុខរថយន្តកុងតឺន័រ រួចខ្ទាតទៅបុកពាក់កណ្ដាលរថយន្តកុងតឺន័រទៀត បណ្ដាលឲ្យរថយន្តឆ្លាមរួញជាប់កាប៊ីនមុខខ្ទេចផ្នែកខាងមុខស្ទើរទាំងស្រុង និងបណ្ដាលឲ្យបុរស២នាក់ (ម្នាក់ជាអ្នកបើក និងម្នាក់ជាអ្នករួមដំណើរ) រងរបួសធ្ងន់បោកនឹងកញ្ចក់ឈាមហូរជោកខ្លួន ហើយកៀបជាប់ក្នុងកាប៊ីនរថយន្ត ។
ចំណែកឯរថយន្តកុងតឺន័របានផ្ទុះកង់ក្រោយខាងឆ្វេងចំនួន៣ និងដាច់កង់ចេញពីរថយន្តអស់១ ខ្ទាតនៅក្បែរកន្លែងកើតហេតុ រីឯទូកុងតឺន័រផ្ទុកខ្លាញ់ត្រី បានរលំធ្លាក់សង្កត់លើតូបលក់ទឹកអំពៅ ហូរហៀរខ្លាញ់ត្រីពេញផ្លូវរថយន្តកុងតឺន័រ មិនទាន់អស់ល្បឿនបានបើកទៅមុខបានបន្តទៅមុខប្រហែលជាង១០០ម៉ែត្រទៀត ទើបឈប់ ហើយក៏ត្រូវបានប្រជាពលរដ្ឋឃាត់ខ្លួនតៃកុងរថយន្តកុងតឺន័របានភ្លាមៗរួចទាក់ទងប្រគល់ឲ្យសមត្ថកិច្ចនៅកន្លែងនោះផងដែរ ។
ដោយឡែកបុរសពីរនាក់ដែលជាប់ក្នុងកាប៊ីនរថយន្តកាម៉ារីឆ្លាមនោះត្រូវបានកម្លាំងប្រជាពលរដ្ឋសហការជាមួយនឹងកម្លាំងសមត្ថកិច្ចនាំគ្នាជួយគាស់យកចេញមកខាងក្រៅបានម្នាក់ហើយក៏បានទាក់ទងទៅកាន់រថយន្តសង្គ្រោះមន្ទីរពេទ្យបង្អែកស្រុកកៀនស្វាយមកដឹកបញ្ជូនទៅសង្គ្រោះនៅមន្ទីរពេទ្យកាល់ម៉ែត្រ ។
អ្នកបើកបរម្នាក់ទៀតនៅជាប់ក្នុងកាប៊ីនរថយន្ត ត្រូវបានប្រជាពលរដ្ឋក៏ដូចជា សមត្ថកិច្ចនាំគ្នាជួយគាស់យកជាង២ម៉ោងនៅមិនទាន់យកចេញបាន រហូតមានក្រុមគ្រូពេទ្យបង្អែកស្រុកកៀនស្វាយ ចុះមកដល់កន្លែងកើតហេតុ ជួយដាក់សេរ៉ូមកម្លាំងឲ្យអ្នករបួស និងបន្តការជួយគាស់យកអ្នកកៀបជាប់ក្នុងកាប៊ីនដដែល ។ ឃើញស្ថានភាពកាន់តែលំបាកយកមនុស្សចេញមកក្រៅ ទើបក្រុមអ្នកយកព័ត៌មានយើងផ្ដល់ដំណឹងអោយវិទ្យុ ABC ទាក់ទងហៅក្រុមសង្គ្រោះ៧១១ នៃកងពលតូចលេខ៧០ ចេញរថយន្តកាត់ដែក និងរថយន្តសង្គ្រោះបន្ទាន់ មកជួយអន្តរាគមន៍ផង ព្រោះជាង២ម៉ោងហើយ នៅមិនទាន់យកមនុស្សចេញបានទេ ។
បន្ទាប់ពីទទួលដំណឹងភ្លាម មេបញ្ជាការរងកងពលតូចលេខ៧០ បានបញ្ជាឲ្យក្រុមសង្គ្រោះ៧១១ ចេញរថយន្តកាត់ដែកពីបន្ទាយកងពលតូចលេខ៧០ នៅតាមផ្លូវជាតិលេខ៣ ខណ្ឌពោធិ៍សែនជ័យ ឲ្យទៅចំណុចកើតហេតុមុខផ្សារគគីរ ស្រុកកៀនស្វាយ ដើម្បីជួយសង្គ្រោះកាត់ដែកយកមនុស្សចេញ តែខណៈពេលមកដល់ហួសវិទ្យាល័យព្រែកឯងជិតដល់កន្លែងកើតហេតុ ហើយស្រាប់តែជនរងគ្រោះត្រូវបានប្រជាពលរដ្ឋ និងសមត្ថកិច្ច ជួយទាញយកចេញមកក្រៅបានហើយ ទើបក្រុមសង្គ្រោះត្រឡប់ទៅបន្ទាយវិញ ។
បច្ចុប្បន្នក្រោយពេលកើតហេតុកម្លាំងសមត្ថកិច្ចវាស់វែងនៃស្រុកកៀនស្វាយបានចុះមកដល់កន្លែងកើតហេតុ ដើម្បីធ្វើការវាស់វែងយករថយន្តទាំងពីរគ្រឿង រួមទាំងទូកុងតឺន័រ ទៅរក្សាទុកដើម្បីរងចាំធ្វើការដោះស្រាយទៅតាមផ្លូវច្បាប់ ៕
ចែករំលែកព័តមាននេះ