រាជធានីភ្នំពេញ ៖ ក្រុងប៉ោយប៉ែតជាប៉ូលសេដ្ឋកិច្ចមួយដ៏សំខាន់មួយក្នុងចំណោមប៉ូលសេដ្ឋកិច្ចដែលស្ថិតក្នុងផែនការ និងគោលនយោបាយអភិវឌ្ឍន៍ឧស្សាហកម្មរបស់រាជរដ្ឋា
ភិបាល។
រយៈពេលចុងក្រោយនេះ ដោយសារកំណើនវិនិយោគិនបរទេស ពិសេសវិនិយោគិនចិន បានចូលមកបណ្ដាក់ទុនវិនិយោគកាន់តែកើនឡើង ធ្វើឲ្យក្រុងមួយនេះកំពុងខ្វះខាតទាំងអគារធ្វើការ និងកន្លែងស្នាក់ ព្រមទាំងធនធានមនុស្សដើម្បីបម្រើការ ដែលជាឱកាសមាសសម្រាប់អ្នកអភិវឌ្ឍន៍វិស័យសំណង់ ។
ស្ថាបនិកក្រុមហ៊ុន Star Plus Four លោក សួង សុខហ៊ាង បានឲ្យដឹងនាព្រឹកថ្ងៃទី២៨ ធ្នូ កន្លងមកថា បច្ចុប្បន្នក្រុងប៉ោយប៉ែត កំពុងជួបកង្វះខាតទាំងធនធានមនុស្ស ទាំងការិយាល័យធ្វើការ និងកន្លែងស្នាក់នៅ ដោយសារលំហូរចូលអ្នកវិនិយោគចិន ជប៉ុន និងជនជាតិដទៃទៀតកើនឡើងយ៉ាងគំហុក ហើយលោកសំណូមពរឲ្យអ្នកវិនិយោគនៅរាជធានីភ្នំពេញ ទៅវិនិយោគនៅក្រុងប៉ោយប៉ែតឲ្យបានច្រើន ដើម្បីបំពេញតម្រូវការសេវាកម្មការិយាល័យ សេវាកម្មស្នាក់នៅដែលកំពុងខ្វះខាតនេះ ។
លោកបន្តថា ៖« ការវិនិយោគនៅក្រុងប៉ោយប៉ែតនាពេលនេះ នឹងធ្វើឲ្យអ្នកវិនិយោគទទួលបានផលចំណេញច្រើន ដោយសារការផ្គត់ផ្គង់ មិនទាន់ឆ្លើយតបតម្រូវការនៅឡើយ »។ លោកបានបន្ថែមថា ៖« បច្ចុប្បន្នក្រុងប៉ោយប៉ែតមានប្រជាជនរស់នៅជាង២០ម៉ឺននាក់ ក្នុងនោះជាង៥ម៉ឺននាក់ជាជនបរទេស »។
អភិបាលក្រុងប៉ោយប៉ែត លោក សាន ស៊ាងហូរ បានមានប្រសាសន៍ថា ទីក្រុងប៉ោយប៉ែតមានការអភិវឌ្ឍលឿន ដោយសារកំណើននៃអ្នកវិនិយោគអន្តរជាតិ ហើយបច្ចុប្បន្នទីក្រុងនេះមានមនុស្សរស់នៅកាន់តែច្រើន និងមានកំណើនជាប្រចាំ ហេតុនេះហើយ ទើបទីក្រុងនេះកំពុងប្រឈមកង្វះការិយាល័យធ្វើការ ខ្វះបន្ទប់ស្នាក់នៅ ។ ដូច្នេះ ការវិនិយោគលើសេវាកម្មទាំងអស់នេះ ពិតមានសារសំខាន់ណាស់ ដើម្បីបំពេញតម្រូវការជាក់ស្តែងនៅមូលដ្ឋាន ហើយការជាឱកាសទទួលបានប្រាក់ចំណេញពីការវិនិយោគនេះផងដែរ ។
លោកបន្តថា ជាមួយនឹងល្បឿននៃការអភិវឌ្ឍនេះ បច្ចុប្បន្នក្រុងប៉ោយប៉ែតមានការផ្លាស់ប្តូរមុខមាត់យ៉ាងលឿន ដោយបច្ចុប្បន្នអគារកម្ពស់ចាប់ពី៥ជាន់ ដល់៣០ជាន់មានប្រមាណ៦០អគារហើយ ។ ចំណែកតម្លៃដីធ្លីនៅក្រុងនេះ ក៏បានកើនឡើងយ៉ាងគំហុកដែរ ដោយសារកត្តាសុខសន្តិភាព ស្ថិរភាពនយោបាយ កំណើនសេដ្ឋកិច្ច ដែលធ្វើឲ្យមានកំណើនវិនិយោគិនកាន់តែច្រើន ។
បច្ចុប្បន្ន ក្រុងប៉ោយប៉ែតមានប្រជាជនរស់នៅជាង២០ម៉ឺននាក់ ក្នុងនោះមានជនបរទេស ប្រមាណ៥ម៉ឺននាក់ ដែលភាគច្រើនជាវិនិយោគិនចិន ជប៉ុន និងម៉ាឡេស៊ី ដែលបានចូលទៅកាន់ទីក្រុងនេះច្រើន និងធ្វើឲ្យតម្លៃដីធ្លី និងអចលនទ្រព្យក្នុងទីក្រុងនេះ កើនឡើងយ៉ាងគំហុកក្នុងប៉ុន្មានឆ្នាំចុងក្រោយនេះ ។
លោក សួង សុខហ៊ាង បានបញ្ជាក់កន្លងមកថា នៅឆ្នាំនេះ តម្លៃជួលលំនៅឋាន និងអគារការិយាល័យបានកើនឡើងខ្ពស់ខុសពីឆ្នាំមុនៗ ដោយផ្ទះល្វែងកាលពីមុន អាចជួលបាន១៥០ដុល្លារ ប៉ុន្ដែបច្ចុប្បន្នតម្លៃជួលបានកើនឡើងដល់ចន្លោះពី៧០០ទៅ៨០០ដុល្លារក្នុង១ខែ សម្រាប់តំបន់សក្ដានុពល ។ ក្នុងនោះភាគច្រើនជួលដោយ វិនិយោគិនចិន ជប៉ុន កូរ៉េ និងម៉ាឡេស៊ី ជាដើម ។
ក្រុងប៉ោយប៉ែត ក៏ជាតំបន់សក្ដានុពលសេដ្ឋកិច្ចដ៏សំខាន់មួយរបស់កម្ពុជា ពិសេសច្រកទ្វារអន្តរជាតិប៉ោយប៉ែត ដែលជាច្រកនាំចេញនាំចូលទំនិញដ៏សំខាន់របស់កម្ពុជា ព្រមទាំងមានតំបន់សេដ្ឋកិច្ចពិសេសជាច្រើនទៀតដូចជា តំបន់សេដ្ឋកិច្ចពិសេស ប៉ោយប៉ែត-អូរនាង ( POSEZ – Poipet Oneang Special Economic Zone) , តំបន់សេដ្ឋកិច្ចពិសេស សានកូ (Sanco Poipet Special Economic Zone) និងតំបន់សេដ្ឋកិច្ចពិសេសមួយទៀតដែលជាបុត្រសម្ព័ន្ធរបស់ក្រុមហ៊ុនសេដ្ឋកិច្ចពិសេសភ្នំពេញ (PPSEZ) ។
បច្ចុប្បន្ន ក្រុងនេះត្រូវបានរាជរដ្ឋាភិបាលដាក់បញ្ចូលជាតំបន់ឧស្សាហកម្ម ក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ដែលគោលនយោបាយនេះបានប្រកាសដាក់ឲ្យប្រើប្រាស់កាលពីខែតុលា ឆ្នាំ២០១៥កន្លងមក ៕
ចែករំលែកព័តមាននេះ