រាជធានីភ្នំពេញ ៖ អតីតមន្ត្រីជាន់ខ្ពស់សង្គ្រោះជាតិលោក គង់ គាំ បានស្នើទៅលោក សម រង្ស៊ី អតីតប្រធានគណបក្សសង្គ្រោះជាតិបញ្ឈប់ការមូលបង្កាច់បង្ខូច និងបំផ្លាញអ្នកនយោបាយ១១៨នាក់ ដែលកំពុងស្ថិតក្រោមបម្រាមមិនឲ្យធ្វើនយោបាយ ។
លោកគង់ គាំ អតីតឧត្តមប្រឹក្សាគណបក្សសង្គ្រោះជាតិបានលើកបណ្តាញសង្គមយ៉ាងដូច្នេះថា សម រង្ស៊ី លាលែងពីតំណែងប្រធាន CNRP ដោយអានុភាពច្បាប់ ។ CNRP ឈប់ប្រើរូបសញ្ញា សម រង្ស៊ី- កឹម សុខា ឈរចាប់ដៃគ្នាក៏ដោយអានុភាពច្បាប់ ។ លោកបញ្ជាក់ថា «បុគ្គលសម រង្ស៊ី ធ្លាប់ទទួលការលើកលែងទោសពីព្រះមហាក្សត្រតាមសំណើរបស់នាយករដ្ឋមន្ត្រី (ដោយមិនបានលក់ខ្លួន) យ៉ាងណាសូមកុំបង្កាច់បង្ខូចបំផ្លិចបំផ្លាញអ្នកដទៃថា ជាតិក្បត់អ្នក ឬអ្នកក្បត់ជាតិ» ។
លោកបន្ថែមថា ៖«យើងគោរពអ្នកដេកចាំ CNRP យើងគោរពអ្នកបានចូលរួមជាមួយ CPP និងយើងគោរពអ្នកទទួលឱកាសថ្មីជម្រើសថ្មីកសាងប៉ូលថ្មី» ។ អតីតមន្ត្រីបក្សប្រឆាំងក៏បានលើកឡើងថា ដំណោះស្រាយនយោបាយ គឺលទ្ធផលនៃការចរចាដោះស្រាយគ្នា ។ ការវិសោធនកម្មច្បាប់គណបក្សនយោបាយមាត្រា៤៥ថ្មី (ស្ទួន) ជាមាត្រា៤៥ (ស្ទួនមួយ) គឺអ្នកនយោបាយជាប់បម្រាមអាចទទួលនីតិសម្បទាឡើងវិញមុនកាលកំណត់របស់តុលាការដោយព្រះមហាក្សត្រតាមសំណើរបស់នាយករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រីក្រសួងមហាផ្ទៃ ។
លោក គង់ គាំ អតីតប្រធានគណបក្សសម រង្ស៉ី និងជាមនុស្សជំនិតរបស់លោក សម រង្ស៊ី នៅថ្ងៃទី១៣ ខែធ្នូ ឆ្នាំ២០១៨នេះថា លោកបានត្រៀមខ្លួនរួចហើយ ដើម្បីស្នើសុំសិទ្ធិធ្វើ នយោបាយឡើងវិញ បន្ទាប់ពីសេចក្តីស្នើវិសោធនកម្មច្បាប់ស្តីពីគណបក្សនយោបាយចូលជាធរមាន ។ ការប្រកាសរបស់លោក គង់ គាំ បានធ្វើឡើងបន្ទាប់ពីរដ្ឋសភាបានអនុម័តទាំងស្រុង ដោយឥតកែប្រែទៅលើសេចក្តីស្នើច្បាប់ស្តីពីវិសោធនកម្មច្បាប់គណបក្សនយោបាយដែលអាចបើកផ្លូវឱ្យអតីតថ្នាក់ដឹកនាំគណបក្សសង្គ្រោះជាតិមានសិទ្ធិពេញលេញក្នុងការធ្វើនយោ បាយឡើងវិញ ។
លោកគូសបញ្ជាក់ថា «ខ្ញុំបានទន្ទឹង គឺតាំងពីចាប់ផ្តើមមានវិសោធនកម្មមកខ្ញុំបានត្រៀមខ្លួនរួចជាស្រេចហើយ ដើម្បីនឹងស្នើសុំទៅសម្តេចក្រឡាហោម ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីធ្វើសេចក្តីស្នើដើម្បីឱ្យខ្ញុំមាននីតិសម្បទាធ្វើនយោបាយឡើងវិញ» ។ ទោះបីជាកំពុងស្ថិតក្នុងអ្នកទាំង១១៨នាក់ ដែលត្រូវបានតុលាការកំពូលដកបម្រាមក្នុងការធ្វើនយោបាយរយៈពេល៥ឆ្នាំក្តី លោកគង់ គាំ បានអះអាងថា ចាប់តាំងពីចុងឆ្នាំ២០១៧មក លោកបានអនុវត្តបានត្រឹមត្រូវតាមសាលដីការបស់តុលាការកំពូលដោយមិនបានធ្វើសកម្មភាពនយោបាយ និងមិនបានចូលរួមជាមួយគណបក្សនយោបាយណាមួយទេ ហើយក៏មិនបានឈរឈ្មោះអ្វីទាំងអស់ ដូច្នេះលោកជឿជាក់ថា លោកនឹងទទួលបានសិទ្ធិធ្វើនយោ បាយឡើងវិញ បន្ទាប់ពីធ្វើការស្នើសុំនេះ ។
ចំណែកលោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាថា ក្រោយពី បានលាលែងពីសមជិកបក្សពីប្រធានបក្សសង្គ្រោះជាតិ តាំងពីឆ្នាំ២០១៧រួចមក ទណ្ឌិត សម រង្ស លែងជាតំណាងអ្នកណាទាំងអស់ ។ លោកបញ្ជាក់ថា«ដូច្នេះ ការដែលទណ្ឌិត សម រង្ស៊ីនៅតែនិយាយថាខ្លួនតំណាងមន្ត្រីជាប់បម្រាមនយោបាយទាំង១១៨រូបនោះ គឺជាការនិយាយភូតកុហក់ និងបោកប្រាស់ចាកពីការពិតសុទ្ធសាធ» ។
សូមជម្រាបថា ការលើកឡើងលើខាងលោក សម រង្ស៊ី អតីតប្រធានបក្សប្រឆាំងបានអំពាវនាវឲ្យអ្នកនយោបាយទាំង១១៨នាក់របស់បក្សប្រឆាំងដែលកំពុងជាប់បម្រាមរបស់តុលាការកំពូលនោះកុំទទួលយកការផ្តល់នីតិសម្បទា ឬការផ្តល់សិទ្ធិក្នុងការឲ្យមានសេរីភាពធ្វើនយោបាយឡើងវិញ ៕
ចែករំលែកព័តមាននេះ