រាជធានីភ្នំពេញ ៖ ប្រធានធនាគារអភិវឌ្ឍន៍អាស៊ី(ADB)ថ្មី ប្រចាំកម្ពុជា បានអះអាងថា សេដ្ឋកិច្ចកម្ពុជានឹងបន្តសម្រេចកំណើនរយៈពេលវែងបន្ដទៀត ខណៈធនាគារនេះកំពុងគាំទ្រកម្ពុជាដើម្បីសម្រេចគោលដៅឆ្នាំ២០៥០ ក្លាយជាប្រទេសមានប្រាក់ចំណូលកម្រិតខ្ពស់ ។ ក្នុងជំនួបជាមួយលោកឧបនាយករដ្ឋមន្ត្រី…
រាជធានីភ្នំពេញ ៖ ប្រធានធនាគារអភិវឌ្ឍន៍អាស៊ី(ADB)ថ្មី ប្រចាំកម្ពុជា បានអះអាងថា សេដ្ឋកិច្ចកម្ពុជានឹងបន្តសម្រេចកំណើនរយៈពេលវែងបន្ដទៀត ខណៈធនាគារនេះកំពុងគាំទ្រកម្ពុជាដើម្បីសម្រេចគោលដៅឆ្នាំ២០៥០ ក្លាយជាប្រទេសមានប្រាក់ចំណូលកម្រិតខ្ពស់ ។
ក្នុងជំនួបជាមួយលោកឧបនាយករដ្ឋមន្ត្រី គាត ឈន់ ប្រធានកិត្តិយសឧត្តមក្រុមប្រឹក្សាសេដ្ឋកិច្ចជាតិ នាព្រឹកថ្ងៃទី២៧ វិច្ឆិកា ម្សិលមិញ លោកជំទាវ Sunniya Durrani-Jamal នាយិកាធនាគារអភិវឌ្ឍន៍អាស៊ីប្រចាំកម្ពុជា បានថ្លែងថា ធនាគារនេះបាននិងកំពុងធ្វើកិច្ចសហប្រតិបត្តិការ និងកំពុងចូលរួមជួយកម្ពុជា ដើម្បីធ្វើឲ្យសម្រេចចក្ខុវិស័យកម្ពុជាដើម្បីក្លាយជាប្រទេសមានប្រាក់ចំណូលកម្រិតខ្ពស់នៅឆ្នាំ២០៥០ ក្នុងទិសដៅជំរុញអភិវឌ្ឍន៍កម្ពុជាឲ្យទទួលបានការីកចម្រើនយ៉ាងឆាប់រហ័ស ។
លោកជំទាវបានបន្តថា ៖« សេដ្ឋកិច្ចកម្ពុជាត្រូវបានរំពឹងថា នឹងរក្សាកំណើនរយៈពេលវែងប្រកបដោយចីរភាពក្នុងរង្វង់៧ភាគរយក្នុងមួយឆ្នាំៗ និងបានកាត់បន្ថយភាពក្រីក្របានលើស១ភាគរយក្នុងមួយឆ្នាំផងដែរ »។
លោកឧបនាយករដ្ឋមន្ត្រី គាត ឈន់ បានអបអរសាទរចំពោះលោកជំទាវ Sunniya Durrani Jamal ដែលទទួលបានភារកិច្ចថ្មី ជានាយិកាស្ថានតំណាងធនាគារអភិវឌ្ឍន៍អាស៊ីប្រចាំកម្ពុជា និងបានជូនពរឱ្យលោកជំទាវទទួលបានជោគជ័យក្នុងបេសកកម្មរបស់លោកជំទាវនៅកម្ពុជា ហើយការជោគជ័យនេះគឺជាជោគជ័យរបស់យើងទាំងអស់គ្នា ជាពិសេសការចូលរួមអភិវឌ្ឍន៍ជាមួយប្រទេសកម្ពុជា ដែលបច្ចុប្បន្នជាប្រទេសមានចំណូលមធ្យមកម្រិតទាប និងមានចក្ខុវិស័យប្រែក្លាយខ្លួនទៅជាប្រទេសមានចំណូលខ្ពស់នៅឆ្នាំ២០៥០ ក្នុងនោះកម្ពុជាបានកំពុងដាក់ចេញនូវគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ផងដែរ ។
ក្នុងរយៈពេលប៉ុន្មានឆ្នាំមកនេះ ធនាគារADB បានផ្តល់ហិរញ្ញប្បទានសហប្រតិបត្តិការ សរុបចំនួនប្រមាណ២.៧៥០លានដុល្លារអាមេរិក សម្រាប់កម្មវិធី និងគម្រោងអភិវឌ្ឍន៍ ព្រមទាំងជំនួយបច្ចេកទេស សម្រាប់កសាងសមត្ថភាពស្ថាប័នរាជរដ្ឋាភិបាល ដែលក្នុងនោះឥណទានសម្បទាន មានទឹកប្រាក់សរុបចំនួនប្រមាណ២.២៩៩លានដុល្លារអាមេរិក សម្រាប់អនុវត្តកម្មវិធីគម្រោងចំនួន៩៨ និងហិរញ្ញប្បទានឥតសំណងមានទឹកប្រាក់សរុបចំនួនប្រមាណ៤៥៥លានដុល្លារអាមេរិក សម្រាប់អនុវត្តកម្មវិធីគម្រោងចំនួន៤៩ និងបានបង្ហាញពីការប្តេជ្ញា បន្តពង្រឹងភាពជាដៃគូដ៏រឹងមាំរបស់ADB ជាមួយរាជរដ្ឋាភិបាលកម្ពុជា ។
យោងតាមការវាយតម្លៃពីស្ថានភាពម៉ាក្រូសេដ្ឋកិច្ចរបស់កម្ពុជា ក្នុងឆ្នាំ២០១៨នេះ កម្ពុជានឹងសម្រេចបានកំណើនសេដ្ឋកិច្ចខ្ពស់លើសការគ្រោងទុក គឺក្នុងរង្វង់អត្រា៧,២% ក្នុងនោះចំណូលជាមធ្យមរបស់ប្រជាជនម្នាក់ៗ នឹងកើនឡើងស្ទើរតែស្មើដល់១.៥០០ដុល្លារអាមេរិក ជាមួយអត្រាអតិផរណាទាបប្រមាណ៣%ក្នុងមួយឆ្នាំ គឺស្របពេលដែលសមតុល្យពាណិជ្ជកម្មមានភាពរឹងមាំ និងស្ថានភាពហិរញ្ញវត្ថុល្អប្រសើរ។
ចំណែកការវិនិយោគផ្ទាល់ពីបរទេស ក៏សង្កេតឃើញបន្តកើនឡើង ស្របពេលដែលកម្ពុជារក្សាបាននូវស្ថានភាពបំណុលល្អប្រសើរ និងស្ថានភាពហិរញ្ញវត្ថុសាធារណៈរឹងមាំប្រកបដោយការប្រុងប្រយ័ត្នខ្ពស់ ដោយផ្តោតសំខាន់លើការអភិវឌ្ឍហេដ្ឋារចនាសម្ព័ន្ធរូបវ័ន្ត និងបង្កើនចំណាយលើសេវាសង្គមសំខាន់ៗដូចជា សុខាភិបាល និងអប់រំជាដើម ។
ទោះជាយ៉ាងនេះក្ដី សេដ្ឋកិច្ចកម្ពុជាក៏នឹងប្រឈមផងដែរទៅនឹងហានិភ័យនៃកត្តាខាងក្រៅមួយចំនួន ខណៈដែលបញ្ហាប្រឈមក្នុងស្រុកកំពុងបន្តដោះស្រាយ ដើម្បីជំរុញភាពប្រកួតប្រជែងរបស់កម្ពុជា និងជំរុញល្បឿននៃការធ្វើពិពិធកម្មសេដ្ឋកិច្ចឱ្យកាន់តែឆាប់រហ័ស ។
ទន្ទឹមនឹងបញ្ហាប្រឈមនេះ កម្ពុជាប្ដេជ្ញាបន្តរក្សាបាននូវកំណើនសេដ្ឋកិច្ចខ្ពស់ប្រកបដោយចីរភាព សំដៅសម្រេចឲ្យបាននូវគោលដៅក្នុងការប្រែក្លាយកម្ពុជាឱ្យទៅជាប្រទេសចំណូលមធ្យមកម្រិតខ្ពស់ក្នុងឆ្នាំ២០៣០ និងប្រទេសចំណូលខ្ពស់ក្នុងឆ្នាំ២០៥០ ។ ក្នុងនោះ រាជរដ្ឋាភិបាលកម្ពុជា នីតិកាលទី៦នៃរដ្ឋសភា បានរៀបចំ និងដាក់ចេញនូវឯកសារគោលនយោបាយយុទ្ធសាស្ត្រចតុកោណដំណាក់កាលទី៤ ដែលមិនត្រឹមតែសម្រាប់ដោះស្រាយនូវបញ្ហាប្រឈមខាងលើនោះទេ គឺថែមទាំងត្រៀមខ្លួនសម្រាប់បដិវត្តន៍ឧស្សាហកម្មជំនាន់ទី៤ និងសេដ្ឋកិច្ចឌីជីថល ដែលជានិន្នាការថ្មីនៃសេដ្ឋកិច្ចសកលលោកផងដែរ ៕
ចែករំលែកព័តមាននេះ