រាជធានីភ្នំពេញ ៖ យ៉ាងហោចណាស់ក្មេងៗសិស្សសាលាចិន ទួន ហ្វា ប្រុសស្រីដែលមានអាយុចាប់ពី៦ដល់១០ឆ្នាំចំនួន៦នាក់រងរបួសធ្ងន់ និងស្រាល ខណៈដែលពួកគេជិះឡាំប្រឺតាឥណ្ឌាមួយគ្រឿងទៅរៀនហើយត្រូវបានរថយន្តស៊េរីទំនើបម៉ាក RANGE ROVER…
រាជធានីភ្នំពេញ ៖ យ៉ាងហោចណាស់ក្មេងៗសិស្សសាលាចិន ទួន ហ្វា ប្រុសស្រីដែលមានអាយុចាប់ពី៦ដល់១០ឆ្នាំចំនួន៦នាក់រងរបួសធ្ងន់ និងស្រាល ខណៈដែលពួកគេជិះឡាំប្រឺតាឥណ្ឌាមួយគ្រឿងទៅរៀនហើយត្រូវបានរថយន្តស៊េរីទំនើបម៉ាក RANGE ROVER មួយគ្រឿងដែលបើកបរដោយស្ត្រីជនជាតិចិនម្នាក់មកបុកក្រឡាប់នោះ ។ ករណីគ្រោះថ្នាក់ចរាចរណ៍នេះដែរបានកើតឡើងនៅវេលាម៉ោង១២និង៤៥នាទីថ្ងៃត្រង់ ថ្ងៃទី២៨ ខែកញ្ញា ឆ្នាំ២០១៨ នៅចំណុចមុខផ្ទះលេខ៥A ផ្លូវលេខ៣១៨ ក្នុងសង្កាត់ទួលស្វាយព្រៃ១ ខណ្ឌចំការមន ។
តាមប្រភពព័ត៌មានពីនគរបាលបានប្រាប់អោយដឹងថា មុនពេលកើតហេតុមានឡាំប្រឺតាឥណ្ឌា ពណ៌លឿង ពាក់ផ្លាកលេខ ភ្នំពេញ ២GL-០១៤២ ដែលបើកបរដោយបុរសម្នាក់ឈ្មោះ ប៊ិន ណារិទ្ធ អាយុ៣៣ឆ្នាំ បានបើកឡាំប្រឺតាឥណ្ឌារបស់គាត់ដើរដឹកក្មេងៗប្រុសស្រីដែលមានអាយុចាប់ពី៦ឆ្នាំដល់១០ឆ្នាំ ចំនួន៦នាក់ (ប្រុស៣ និងស្រី៣នាក់) តាមផ្ទះពីភូមិឬស្សី ដើម្បីមកកាន់សាលាចិន ទួន ហ្វា ដែលនៅក្បែរនោះ ។
តាមប្រភពដដែលបានប្រាប់បន្តទៀតថា ឡាំប្រឺតាឥណ្ឌាដឹកសិស្សខាងលើបើកមកដល់ចំណុចខាងលើក៏ស្រាប់តែមានរថយន្តស៊េរីទំនើបម៉ាក RANGE ROVER ពណ៌ស ពាក់ផ្លាកលេខភ្នំពេញ ២Q-២២២២ មួយគ្រឿង ដែលបើកបរដោយស្ត្រីជនជាតិចិនម្នាក់ឈ្មោះ ZHNANG YANZHE អាយុ៤១ឆ្នាំ ស្នាក់នៅផ្ទះលេខ១៨២ ផ្លូវលេខ២១៧ ក្នុងសង្កាត់ទំនប់ទឹក ខណ្ឌចំការមន ក្នុងទិសដៅបញ្ច្រាសទិសគ្នាមកបុកចំពីមុខបណ្តាលឡាំប្រឺតាក្រឡាប់ធ្លាក់ក្មេងៗទាំង៦នាក់រងរបួសធ្ងន់ និងស្រាលតែម្តង ។
ពាក់ព័ន្ធទៅនឹងករណីគ្រោះដ្នាក់ចរាចរណ៍នេះដែរបានកើតឡើងដោយភាគីខាងរថយន្តស៊េរីទំនើបម៉ាក RANGE ROVER ដែលបើកបរដោយស្ត្រីជនជាតិចិន និងឡាំប្រឺតាណ្ឌាដឹកសិស្សខាងលើបើកបរដោយខ្វះការអធ្យាស្រ័យអោយគ្នាទៅវិញទៅមក ខណៈដែលបើកបរមកដល់ចំណុចផ្លូវចង្អៀតដែលមានរថយន្តចតនៅសងខាងហើយខំប្រឹងបើករុលទៅមុខ និងបុកគ្នាបែបនេះ ។
ក្រោយពេលកើតហេតុក្រុមក្មេងៗសិស្សសាលារងគ្រោះត្រូវបានក្រុមគ្រួសារបញ្ជូនទៅកាន់មន្ទីរពេទ្យរៀងៗខ្លួន ហើយកម្លាំងមានសមត្ថកិច្ចមូលដ្ឋាន និងនគរបាលចរាចរណ៍ខណ្ឌចំការមនធ្វើការវាស់វែងរកខុសត្រូវ និងយករថយន្ត RANGE ROVER បង្ក និងឡាំប្រឺតាឥណ្ឌាដឹកសិស្សរងគ្រោះយកទៅរក្សាទុកនៅអធិការនគរបាលខណ្ឌចំការមនដើម្បីរង់ចាំធ្វើការដោះស្រាយគ្នាជាក្រោយបន្តទៅទៀត ៕
ចែករំលែកព័តមាននេះ