រាជធានីភ្នំពេញ ៖ ក្រសួងទេសចរណ៍បានបង្ហាញការព្យាករថា នៅដំណាច់ឆ្នាំ២០១៨នេះកម្ពុជានឹងទទួលបានភ្ញៀវអន្តរជាតិប្រមាណ៦,២លាននាក់ និងនៅឆ្នាំ២០២០ ប្រមាណជាង៧លាននាក់ ហើយនៅឆ្នាំ២០៣០ នឹងទទួលបានទេសចរអន្តរជាតិប្រមាណ១៥លាននាក់ ។ ចំណែកទេសចរជាតិ…
រាជធានីភ្នំពេញ ៖ ក្រសួងទេសចរណ៍បានបង្ហាញការព្យាករថា នៅដំណាច់ឆ្នាំ២០១៨នេះកម្ពុជានឹងទទួលបានភ្ញៀវអន្តរជាតិប្រមាណ៦,២លាននាក់ និងនៅឆ្នាំ២០២០ ប្រមាណជាង៧លាននាក់ ហើយនៅឆ្នាំ២០៣០ នឹងទទួលបានទេសចរអន្តរជាតិប្រមាណ១៥លាននាក់ ។
ចំណែកទេសចរជាតិ នឹងកើនឡើងប្រមាណ១៣លាននាក់ ។ ដើម្បីឆ្លើយតបនឹងកំណើនភ្ញៀវទេសចរនេះ កម្ពុជាត្រូវការសណ្ឋាគារប្រមាណជាង១០ម៉ឺនបន្ទប់ សម្រាប់ផ្គត់ផ្គង់ការស្នាក់នៅ ក្នុងនោះសណ្ឋាគារប្រណីតលំដាប់ផ្កាយ៤ និងផ្កាយ៥ប្រមាណ៦០% ស្មើប្រមាណ៦មុឺនបន្ទប់នៅទូទាំងប្រទេស ។ ដោយឡែកសម្រាប់ខេត្តព្រះសីហនុ នឹងត្រូវការបន្ទប់សណ្ឋាគារជាង៣ម៉ឺនបន្ទប់បន្ថែមទៀត ក្នុងនោះសណ្ឋាគារប្រណីតជាង២ម៉ឺនបន្ទប់ ដើម្បីឆ្លើយតបនឹងតម្រូវការកំណើនភ្ញៀវទេសចរអន្តរជាតិប្រមាណ២លាននាក់ និងទេសចរជាតិប្រមាណ៣លាននាក់នៅឆ្នាំ២០៣០ ។
រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន បានបង្ហាញការព្យាករដ៏គួរចាប់អារម្មណ៍នេះដល់វិនិយោគិនចិន និងអន្តរជាតិ កាលពីល្ងាចពីថ្ងៃទី១ ខែកញ្ញា កន្លងទៅនៅសណ្ឋាគារព្រីនស៍ថាម ខេត្តព្រះសីហនុ ។ ក្នុងឱកាសនោះ លោករដ្ឋមន្ត្រីក៏បានបង្ហាញការគាំទ្រចំពោះគម្រោងវិនិយោគលើវិស័យទេសចរណ៍ និងអំពាវនាវឲ្យមានការវិនិយោគបន្ថែមទៀតប្រកបដោយគំនិតច្នៃប្រឌិត និងទទួលខុសត្រូវខ្ពស់ គោរពតាមបទដ្ឋានបរិស្ថាន និងគោលការណ៍ការណែនាំរបស់រាជរដ្ឋាភិបាលក្នុងការគ្រប់គ្រងតំបន់ឆ្នេរសមុទ្រ ដើម្បីឆ្លើយតបនឹងកំណើនទេសចរណ៍ និងនិរន្តរភាពទេសចរណ៍នាពេលបច្ចុប្បន្ន និងពេលអនាគត ។
បច្ចុប្បន្ននេះ កម្ពុជាមានសណ្ឋាគារប្រមាណជាង៨០០កន្លែង ស្មើនឹង៤៦ពាន់បន្ទប់ ក្នុងនោះសណ្ឋាគារប្រណីតមានប្រមាណជាង២ម៉ឺនបន្ទប់ ។
ដោយឡែក្នុងខេត្តព្រះសីហនុ មានសណ្ឋាគារ ចំនួន៦៩កន្លែង ស្មើនឹងជាង៤ពាន់បន្ទប់ ក្នុងនោះសណ្ឋាគារប្រណីត ទើបតែមានប្រមាណជាង ១.០០០បន្ទប់ប៉ុណ្ណោះ ។ ដូច្នេះសក្ដានុពលក្នុងការវិនិយោគលើវិស័យនេះ ពិតជានៅមានឱកាសច្រើនសម្រាប់វិនិយោគិនជាតិ និងអន្តរជាតិ ។ វិនិយោគិនមកពីអឺរ៉ុបបានលើកឡើងកាលពីសប្ដាហ៍មុនថា ពួកគេកំពុងសម្លឹងរកឱកាសវិនិយោគលើវិស័យសណ្ឋាគារលំដាប់អន្តរជាតិនៅកម្ពុជា ដោយចាប់ដៃគូជាមួយវិនិយោគិនក្នុងស្រុក ។ ការសម្រេចមកវិនិយោគនេះ ដោយសារតែពួកគេមើលឃើញពីកំណើនសេដ្ឋកិច្ចរបស់ប្រទេសកម្ពុជាមានភាពរឹងមាំ មានស្ថិរភាពនយោបាយ និងសន្ដិភាពពេញលេញ ពិសេសគឺកំណើនភ្ញៀវទេសចរអន្តរជាតិមកទស្សនានៅកម្ពុជាកើនឡើងជាបន្ដបន្ទាប់ ។
លោក Mauro Gasparotti នាយកគ្រប់គ្រងក្រុមហ៊ុន Savills Hotels បានមានប្រសាសន៍ថា ៖« យើងបានឃើញភាពលូតលាស់យ៉ាងឆាប់រហ័សនៅក្នុងវិស័យបដិសណ្ឋារកិច្ចនៅកម្ពុជា ដែលនឹងជំរុញនូវការអភិវឌ្ឍផ្នែកសណ្ឋាគារនាថ្ងៃអនាគត ។ វាធ្វើឲ្យយើងរំជើបរំជួល ដោយសារវានាំមកនូវឱកាសថ្មីដ៏សំខាន់សម្រាប់អតិថិជន ជាអ្នកអភិវឌ្ឍន៍របស់យើងដែលមានលទ្ធភាពក្នុងការច្នៃប្រឌិត »។ លោកបន្តថា ៖« ឧស្សាហកម្មផ្នែកបដិសណ្ឋារកិច្ច ដើរតួជាផ្នែកមួយដ៏សំខាន់នៃសេដ្ឋកិច្ច ហើយសក្តានុពលនាពេលអនាគត គឺធំធេងណាស់ »។
ជាមួយគ្នានេះដែរ នាយកប្រចាំទ្វីបអាស៊ីនៃសណ្ឋាគារHilton លោក Christian Puchher បានថ្លែងថា ជាមួយនឹងប្រាក់ចំណូលកើនឡើង និងភាពងាយស្រួលនៃការធ្វើដំណើរតាមយន្តហោះទេសចរនិងអ្នកជំនួញជាច្រើនត្រូវបានទាក់ទាញមកកាន់ប្រទេសកម្ពុជា ដែលជាគោលដៅនៃប្រាសាទ និងប្រវត្តិសាស្ត្រដ៏អស្ចារ្យរបស់ខ្លួន, ឆ្នេរខ្សាច់ដ៏ស្រស់ស្អាត និងតំបន់ទេសចរណ៍ធម្មជាតិជាច្រើនទៀត ហើយជាការពិតណាស់ភ្ញៀវទេសចរទាំងនេះរំពឹងថានឹងមានបន្ទប់សណ្ឋាគារល្អៗ លើសពីអ្នកធ្វើទេសចរណ៍ធម្មតា។ លោកបន្តថា ៖« យើងគ្រោងនឹងចាប់ដៃគូជាមួយក្រុមហ៊ុនក្នុងស្រុក ដើម្បីវិនិយោគសណ្ឋាគារនាពេលខាងមុខឆាប់ៗនេះនៅប្រទេសដ៏អស្ចារ្យមួយនេះ »៕
ចែករំលែកព័តមាននេះ