រាជធានីភ្នំពេញ ៖ កាលពីយប់មិញទណ្ឌិត១៤រូប បានប្តូរឯកសណ្ឌានពន្ធនាគារ ដោយជំនួសមកវិញ ក្នុងសំលៀកបំពាក់ចម្រុះពណ៌ផ្សេងៗគ្នា នៅវេលាកណ្តាលអធ្រាត្រប្រហែលម៉ោង១២យប់ ថ្ងៃទី២៧ សីហា ត្រូវបានដោះលែង…
រាជធានីភ្នំពេញ ៖ កាលពីយប់មិញទណ្ឌិត១៤រូប បានប្តូរឯកសណ្ឌានពន្ធនាគារ ដោយជំនួសមកវិញ ក្នុងសំលៀកបំពាក់ចម្រុះពណ៌ផ្សេងៗគ្នា នៅវេលាកណ្តាលអធ្រាត្រប្រហែលម៉ោង១២យប់ ថ្ងៃទី២៧ សីហា ត្រូវបានដោះលែង និងដឹកចេញពីគុកព្រៃស តាមការគ្រោងទុកមែន ដោយរថន្តធុនធំមួយគ្រឿងបើកយ៉ាងលឿន ។
នោះ គឺជារថយន្តរបស់ពន្ធនាគារមានជញ្ជាំងបាំងជិត ដោយសំណាញ់ដែក ពណ៌ខៀវ បាននាំចេញទណ្ឌិតសរុប១៤រូប ដោយមានសមត្ថកិច្ចអមដំណើរឆ្ពោះទៅកាន់លំនៅដ្ឋានរបស់ពួកគាត់ទាំងកណ្តាលរាត្រីងងឹតសូន្យសុង ខណៈពេលដែលមនុស្សទាំងឡាយកំពុងចូលគេងលក់ស្កប់ស្កល់ វេលាពាក់កណ្តាលអធ្រាត្រ ។
ចុងក្រោយគេបានឃើញបុរសទាំង១៤នាក់ ត្រូវបានគេដាក់នៅក្នុងផ្ទះសំណាក់ដីមាសក្នុងភូមិកាកាប សង្កាត់កាកាប១ ខណ្ឌធិ៍សែនជ័យ ។ មុនពេលចាកចេញពីផ្ទះសំណាក់ប្រភេទផ្ទះល្វែង ស្ថិតក្នុងភូមិកាកាប ខណ្ឌពោធិ៍សែនជ័យ ។ បាច់ផ្កាត្រូវបានគេហុចទៅឲ្យលោក មាជ សុវណ្ណារ៉ា តំណាងឲ្យអតីតអ្នកទោសទាំងនោះ មុនពេលចាកចេញ និងផ្តល់បទសម្ភាសន៍ដល់ក្រុមអ្នកសារព័ត៌មានដែលបានតាមយកព័ត៌មានពេញមួយថ្ងៃ ដោយក្តីនឿយហាត់ ទីបំផុតពិតជាមានការដោះលែងមែន ។
ក្រោយពេលចេញពីពន្ធនាគារបានបន្តិចនៅឯកន្លែងប្រមូលផ្តុំខាងមាត់ច្រកនៃផ្ទះសំណាក់ លោក មាជ សុវណ្ណារ៉ា តំណាងឲ្យអ្នកទោស១៤នាក់ បានចេញមកនិយាយប្រាប់អ្នកសារព័ត៌មានប្រមាណ៤០នាទីថា«ពួកយើងខ្ញុំសូមអរគុណដល់លោកនាយករដ្ឋមន្ត្រីហ៊ុនសែនដែលបានអន្តរាគមន៍ដោះលែងរូបយើងខ្ញុំ ។ អរគុណដល់អង្គការអន្តរជាតិនានាដែលបានផ្តល់ជំនួយ» ។ ដោយចូលផ្ទះសំណាក់ដីមាស(ល្វែង)មុនពេលបែកគ្នាទៅកាន់ផ្ទះរៀងៗខ្លួន ។
លោក មាជ សុវណ្ណាបានថ្លែងទៀងថា៖«ដោយសារវិបត្តិនយោបាយធ្វើឲ្យខ្មែរបែកបាក់គ្នា បរទេសគេមើលវាយតម្លៃស្ថានភាពនយោបាយថា កំពុងដើរទៅក្រោយ ។ តែខ្ញុំគិតថាអ្នកដឹកនាំខ្មែរលោកនាយករដ្ឋមន្ត្រីហ៊ុន សែន មិនឆ្កួតទេ គឺឆ្លាតដើម្បីប្រយោជន៍ជាតិ» ។ លោកថា សម្តេចតេ ជោ មានផ្លូវហើយ អ្នកនយបាយជាន់ខ្ពស់គេមិនដែលបិទផ្លូវនយោបាយទេ ។ គេបិទម្ខាងទុកម្ខាង ដើម្បីឯកភាពជាតិខ្មែរ ។ លោកថា« ខ្ញុំតែមានជំនឿខ្មែរស្បែកដូចគ្នា ។ លោកនាយករដ្ឋមន្ត្រីហ៊ុនសែនស្បែកខ្មៅកូនអ្នកស្រែ ខ្ញុំក៏ស្បែកខ្មៅក៏ជាកូនអ្នកស្រែដែរ» ។
លោក មាជ សុវណ្ណារ៉ា បានលើកឡើងថា យើងត្រូវបើកចំហជើងមេឃ ។ យើងមិនបង្កើតសត្រូវទេ តែយើងបង្កើតមិត្ត គ្មានសត្រូវតែមានមិត្ត ។ ធ្វើនយោបាយចិនក៏ធ្វើអាមេរិកក៏ធ្វើ សហគមន៍ក៏ធ្វើ និងអ្នកជិតខាងក៏ធ្វើខ្មែរឆ្លាត» ។ ខ្មែរមានខួរក្បាលមិនអន់ទេ ចេះសាងអង្គរវត្តមិនមានគ្រឹះអាចធ្វើបាន ។ ពេលនេះលោកជឿថា សម្តេចតេជោហ៊ុនសែនមិនបិទផ្លូវនយោបាយទេ ។ អ្នកដឹកនាំគេចេះណាស់ តែលោកចង់ឲ្យក្មេងជំនាន់ក្រោយរៀនធ្វើនយោបាយដោយប្រើប្រាជ្ញា កុំលាបពណ៌ កុំកាប់សម្លាប់គ្នា ហើយលោកនឹងធ្វើនយោបាយបន្តទៀត ។
ក្រុមអ្នកទោសអតីតសកម្មជនរបស់គណបក្សសង្គ្រោះជាតិចំនួន១១នាក់ ក្នុងចំណោម១៤នាក់ កាលពីថ្ងៃទី២៤ ខែសីហា ២០១៨នេះ បានសរសេរលិខិតរួមគ្នាមួយជាមួយនឹងស្នាមមេដៃរបស់ខ្លួន ដាក់ជូនប្រមុខរាជរដ្ឋាភិបាលសម្តេចតេជោហ៊ុនសែន នាយករដ្ឋមន្ត្រី ដើម្បីសូមឲ្យមានការដោះលែងតាមសំណើរថ្វាយព្រះមហាក្សត្រស្នើសុំព្រះរាជទានលើកលែងទោសដល់ពួកគាត់ ។
ទណ្ឌិតទាំង១១នាក់ ត្រូវបានតុលាការផ្តន្ទាទោសដាក់ពន្ធនាគារពី៧ដល់២០ឆ្នាំពីបទដឹកនាំកុបកម្ម និងចូលរួមកុបកម្មនៅទីលានប្រជាធិបតេយ្យចាស់ក្បែរវត្តភ្នំ បណ្តាលឲ្យសន្តិសុខជាង៣០នាក់របួស ៕
ចែករំលែកព័តមាននេះ