រាជធានីភ្នំពេញ ៖ ក្នុងបរិបទនៃបច្ចេកវិទ្យាកំពុងរីកចម្រើន អ្នកជំនាញផ្នែកបច្ចេកវិទ្យាកម្ពុជាមើលឃើញថា ការបង្កើតសមាគមអ្នកបច្ចេកវិទ្យាហិរញ្ញវត្ថុកម្ពុជា (Cambodia Fintech Association ) នៅពេលនេះ…
រាជធានីភ្នំពេញ ៖ ក្នុងបរិបទនៃបច្ចេកវិទ្យាកំពុងរីកចម្រើន អ្នកជំនាញផ្នែកបច្ចេកវិទ្យាកម្ពុជាមើលឃើញថា ការបង្កើតសមាគមអ្នកបច្ចេកវិទ្យាហិរញ្ញវត្ថុកម្ពុជា (Cambodia Fintech Association ) នៅពេលនេះ គឺជាពេលវេលាសមស្របមួយ ខណៈដែលប្រទេសកម្ពុជាកំពុងដើរឆ្ពោះទៅរកសេដ្ឋកិច្ចឌីជីថល ។
លោក ឃួន សុភ័ទ្ធ សហស្ថាបនិកក្រុមហ៊ុន Morakot ដែលជាក្រុមហ៊ុនអភិវឌ្ឍន៍ផ្នែកSoftware បានឲ្យដឹងកាលពីថ្ងៃទី១៥ សីហា ថា ស្ថិតក្នុងបរិបទប្រទេសសព្វថ្ងៃនេះ ការបង្កើតសមាគមអ្នកបច្ចេកវិទ្យាហិរញ្ញវត្ថុ គឺជាពេលវេលាដែលល្អ ហើយកម្ពុជាអាចចាប់ផ្តើមធ្វើបាន ព្រោះថាការបង្កើតសមាគម នឹងជួយឲ្យអ្នករកស៊ីក្នុងវិស័យបច្ចេកវិទ្យា មានសំឡេងតែមួយ ងាយស្រួលក្នុងការធ្វើការ ខណៈសព្វថ្ងៃនេះបច្ចេកវិទ្យាបានក្លាយជាផ្នែកមួយនៃជីវិតរស់នៅប្រចាំថ្ងៃរបស់ប្រជាជនខ្មែរទៅហើយ ។
លោក ឃួន សុភ័ទ្ធ និយាយថា ៖« សមាគមមានតួនាទីជាអ្នកសម្របសម្រួលរវាងក្រុមហ៊ុន ជាមួយវិនិយោគិន និងអាចជួយដោះដូរបច្ចេកទេស ឬបច្ចេកវិទ្យាមួយចំនួនដែលបង្កើតឡើងថ្មីៗ ហើយនៅក្នុងបរិបទសព្វថ្ងៃនេះ ខ្ញុំគិតថាការបង្កើតសមាគមនេះឡើង ជាពេលវេលាមួយល្អ ដែលយើងមិនអាចរង់ចាំទៀតទេ ព្រោះនៅស្រុកគេ គេបង្កើតមុន និងទៅលឿនជាងយើងទៅហើយ »។
លោកបន្តថា ៖« នេះជារឿងមួយល្អសម្រាប់ស្រុកខ្មែរ បើយើងចាប់ផ្តើម ខ្ញុំជឿថាវានឹងដើរលឿន ដោយសារយើងថ្មី យើងអត់មានប្រព័ន្ធចាស់ផ្សេងៗដែលត្រូវរុះរើទេ »។ សមាគមអ្នកបច្ចេកវិទ្យាហិរញ្ញវត្ថុកម្ពុជា (CFA)គឺជាស្ថាប័នចម្រុះ និងមិនរកប្រាក់ចំណេញមួយដែលបង្កើតឡើងក្នុងគោលបំណងជួយគាំទ្រការអភិវឌ្ឍវិស័យ FinTech ក្នុងប្រទេសកម្ពុជា និងដើម្បីជំរុញកិច្ចសហការរវាងអ្នកចូលរួម និងភាគីពាក់ព័ន្ធទាំង ឡាយក្នុងប្រព័ន្ធអេកូ FinTech ក្នុងប្រទេសកម្ពុជា ។សមាគមនេះ គឺជាស្ថាប័នមួយដែលសមាជិករបស់ខ្លួនជាតំណាងឱ្យភាគីពាក់ព័ន្ធគ្រប់រូបភាពក្នុងវិស័យFinTech ចាប់តាំងពីក្រុមហ៊ុនច្នៃប្រឌិតក្នុងដំណាក់កាលដំបូង រហូតដល់ក្រុមហ៊ុនធំៗដែលនាំមុខក្នុងផ្នែកហិរញ្ញវត្ថុ និងអ្នកផ្តល់សេវាកម្មនានា ។
អនុប្រធានសមាគមអ្នកបច្ចេកវិទ្យាហិរញ្ញវត្ថុកម្ពុជា លោក Eddie Lee បានមានប្រសាសន៍ថា សមាគមអ្នកបច្ចេកវិទ្យាហិរញ្ញវត្ថុកម្ពុជា ជាស្ថាប័នមួយដែលបង្កើតឡើងក្នុងគោលបំណងអភិវឌ្ឍន៍វិស័យ FinTech នៅកម្ពុជា ។ លោកថ្លែងថា ៖« បច្ចុប្បន្ន យើងបានចាប់ដៃគូជាមួយស្ថាប័ន និងសមាគមនានានៅក្នុងប្រទេសកម្ពុជា និងទូទាំងសកលលោក ដើម្បីសហការទៅលើគំនិតផ្តួចផ្តើមផ្សេងៗទាក់ទងនឹងវិស័យ FinTech ដើម្បីឲ្យឧស្សាហកម្មនេះទទួលបានភាពចាស់ទុំ និងមានការច្នៃប្រឌិតកាន់តែច្រើនឡើង »៕
ចែករំលែកព័តមាននេះ