រាជធានីភ្នំពេញ ៖ រថយន្តដឹកទឹកកកមួយគ្រឿងបានបើកបរក្នុងល្បឿនលឿន ដោយខ្វះការប្រុងប្រយ័ត្នបត់ជ្រុលខ្លាំងពេក បណ្ដាលឲ្យក្រឡាប់បះជើងបោកទៅលើសួនច្បារពុះទ្រូងផ្លូវ ប៉ុន្តែសំណាងល្អមិនបានបណ្ដាលឲ្យអ្នកបើកបរ ឬអ្នកធ្វើដំណើរតាមផ្លូវណាម្នាក់រងគ្រោះឡើយ ហើយក្នុងពេលក្រឡាប់នោះ រថយន្តខាងលើក៏មិនមានដឹកទឹកកកនៅក្នុងនោះដែរ។ ហេតុការណ៍នេះបានកើតឡើងកាលពីវេលាម៉ោង៦ព្រឹកថ្ងៃទី៧…
រាជធានីភ្នំពេញ ៖ រថយន្តដឹកទឹកកកមួយគ្រឿងបានបើកបរក្នុងល្បឿនលឿន ដោយខ្វះការប្រុងប្រយ័ត្នបត់ជ្រុលខ្លាំងពេក បណ្ដាលឲ្យក្រឡាប់បះជើងបោកទៅលើសួនច្បារពុះទ្រូងផ្លូវ ប៉ុន្តែសំណាងល្អមិនបានបណ្ដាលឲ្យអ្នកបើកបរ ឬអ្នកធ្វើដំណើរតាមផ្លូវណាម្នាក់រងគ្រោះឡើយ ហើយក្នុងពេលក្រឡាប់នោះ រថយន្តខាងលើក៏មិនមានដឹកទឹកកកនៅក្នុងនោះដែរ។ ហេតុការណ៍នេះបានកើតឡើងកាលពីវេលាម៉ោង៦ព្រឹកថ្ងៃទី៧ ខែសីហា ឆ្នាំ២០១៨ នៅលើកំណាត់ផ្លូវទំនប់កប់ស្រូវ កែងផ្លូវបេតុងចូលផ្សារសាមគ្គី ស្ថិតនៅក្នុងភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា រថយន្តមួយគ្រឿងខាងលើ ពណ៌ស ពាក់ស្លាកលេខ ភ្នំពេញ ២AG-៣៤៧៩ បើកបរដោយបុរសម្នាក់មិនស្គាល់ឈ្មោះ ។ នៅមុនពេលកើតហេតុ រថយន្តខាងលើបានដឹកទឹកកកដាក់ឲ្យម៉ូយនៅផ្សារសាមគ្គី លុះពេលដាក់ទឹកកកអស់ហើយបានបើកត្រឡប់ក្រោយវិញ ដោយធ្វើដំណើរក្នុងល្បឿនយ៉ាងលឿន និងក្នុងទិសដៅពីលិចទៅកើតតាមផ្លូវបេតុងឡើងទៅលើផ្លូវអូរដឹមកប់ស្រូវ។
ប្រភពដដែលបានបន្តទៀតថា លុះឡើងទៅដល់លើកំណាត់ផ្លូវអូរដឹមកប់ស្រូវបានបត់ឆ្វេងជ្រុលឆ្ពោះទៅទិសខាងជើង ទើបបណ្ដាលឲ្យក្រឡាប់បោកទៅលើសួនច្បារពុះចែកទ្រូងផ្លូវ បណ្តាលឲ្យរថយន្តខាងលើរងការខូចខាតយ៉ាងដំណំ ប៉ុន្តែសំណាងល្អមិនបណ្ដាលឲ្យអ្នកបើកបរ រួមជាមួយនឹងអ្នកដំណើរតាមផ្លូវមានគ្រោះថ្នាក់នោះឡើយ ។ បន្ទាប់មក នគរបាលប៉ុស្ដិ៍ត្រពាំងក្រសាំងបានចុះទៅកាន់កន្លែងកើតហេតុ និងបានឲ្យម្ចាស់ស្ទូចយករថយន្តទៅធ្វើការជួសជុលឡើងវិញដោយខ្លួនឯង៕
ចែករំលែកព័តមាននេះ