ព្រឹត្តិការណ៍បាល់ទាត់ World Cup ឆ្នាំ២០១៨ បានបញ្ចប់ទៅថ្មីៗ ដោយបន្សល់នូវអារម្មណ៍រំភើបរីករាយយ៉ាងខ្លាំងចំពោះក្រុមដែលឈ្នះពានរង្វាន់ ខណៈទំនួញឈឺចាប់នៃការខកចិត្តរបស់ក្រុមជម្រើសជាតិដទៃទៀតនៅតែដិតដាមក្នុងអារម្មណ៍ពួកគេ មិនថាគ្រូបង្វឹក កីឡាករ ឬអ្នកគាំទ្រនោះទេ…
ព្រឹត្តិការណ៍បាល់ទាត់ World Cup ឆ្នាំ២០១៨ បានបញ្ចប់ទៅថ្មីៗ ដោយបន្សល់នូវអារម្មណ៍រំភើបរីករាយយ៉ាងខ្លាំងចំពោះក្រុមដែលឈ្នះពានរង្វាន់ ខណៈទំនួញឈឺចាប់នៃការខកចិត្តរបស់ក្រុមជម្រើសជាតិដទៃទៀតនៅតែដិតដាមក្នុងអារម្មណ៍ពួកគេ មិនថាគ្រូបង្វឹក កីឡាករ ឬអ្នកគាំទ្រនោះទេ ។
ដោយសារតែគិតថា ខ្លួនគ្មានសមត្ថភាព ឬដល់ពេលដែលត្រូវទុកកៅអីឱ្យអ្នកជំនាន់ក្រោយធ្វើការបន្ត ទាំងគ្រូបង្វឹក និងកីឡាករមួយចំនួនក៏សុខចិត្តចុះចេញពីតំណែង និងប្រកាសចូលនិវត្តន៍ពីជម្រើសជាតិភ្លាមៗ ខណៈអ្នកចាត់ការខ្លះទៀតត្រូវបានសហព័ន្ធដកសិទ្ធិក៏មាន ព្រោះតែមិនអាចជួយក្រុមឈ្នះពានរង្វាន់ ។ ខាងក្រោមនេះ គឺជាគ្រូបង្វឹក និងកីឡាករ១០រូបដែលបាត់បង់ការងារ និងចូលនិវត្តន៍ក្រោយក្រុមពួកគេធ្លាក់ពី World Cup ៖
១-គ្រូបង្វឹក Adam Nawalka (ប៉ូឡូញ)
ប្រធានសហព័ន្ធកីឡាបាល់ទាត់ប៉ូឡូញ លោក Zbigniew Boniek បានប្រកាសថា គ្រូបង្វឹកក្រុមជម្រើសជាតិលោក Adam Nawalka មិនត្រូវបានអនុញ្ញាតឱ្យបន្តកុងត្រានោះទេ បន្ទាប់
ពីដឹកនាំប៉ូឡូញធ្លាក់ចេញពីព្រឹត្តិការណ៍ World Cup ត្រឹមវគ្គចែកពូល ។
លោក Zbigniew Boniek បានឱ្យដឹងទៀតថា តួនាទីរបស់គ្រូបង្វឹករូបនេះ នឹងត្រូវបញ្ចប់ត្រឹមថ្ងៃទី៣០ កក្កដា២០១៨ ខាងមុខ ។ សូមបញ្ជាក់ថា លោក Adam Nawalka បានចូលមកដឹកនាំប៉ូឡូញតាំងពីខែវិចិ្ឆកា ឆ្នាំ២០១៣មកម៉្លេះ ហើយដឹកនាំប្រទេសនេះធ្លាក់ពី World Cup ២០១៨ ត្រឹមវគ្គចែកពូល៣២ក្រុម ដោយឈ្នះតែ១ប្រកួតប៉ុណ្ណោះ និងចាញ់២ប្រកួត ។
២-គ្រូបង្វឹក Jorge Sampaoli (អាហ្សង់ទីន)
ស្ថានភាពវឹកវររបស់ក្រុមបាល់ទាត់អាហ្សង់ទីននៅមិនទាន់ស្ងប់ស្ងាត់នៅឡើយ ខណៈប្រធានសហព័ន្ធពួកគេបានបើកកិច្ចប្រជុំមួយដើម្បីពិភាក្សាអនាគតលោកគ្រូបង្វឹក Sampaoli ពាក់ព័ន្ធទៅនឹងតំណែងរបស់គាត់ ។ ក្រោយមកលោក Sampaoli ត្រូវបានទម្លាក់ឱ្យមកដឹកនាំក្រុមយុវជន U20 វិញក្រោយបរាជ័យដឹកនាំក្រុមជម្រើសជាតិឈុតធំ ។
គួរបញ្ជាក់ថា ប្រសិនបើលោក Sampaoli ត្រូវបញ្ឈប់បន្ទាប់ពីការធ្លាក់ World Cup ២០១៨ ភ្លាមៗនោះ រូបលោកនឹងទទួលបានសំណងជាង១០លានដុល្លារ ព្រោះតែកុងត្រាមិនទាន់ផុត ។
៣-គ្រូបង្វឹក Fernando Hierro (អេស្ប៉ាញ)
លោក Fernando Hierro បានសម្រេចចុះចេញពីតំណែងគ្រូបង្វឹកក្រុមជម្រើសជាតិអេស្ប៉ាញភ្លាមៗ បន្ទាប់ពីដឹកនាំក្រុមដែលមានរហស្សនាម “គោជល់” ធ្លាក់ត្រឹមវគ្គ១៦ក្រុម ។
គ្រូបង្វឹកវ័យ៥០ឆ្នាំរូបនេះ ទើបតែបានចូលកាន់តំណែងគ្រូបង្វឹកបណ្ដោះអាសន្ន២ថ្ងៃមុនការប្រកួត World Cup បើកឆាកប៉ុណ្ណោះ បន្ទាប់ពីសហព័ន្ធកីឡាអេស្ប៉ាញដកលោក Julen Lopetegui ភ្លាមៗក្រោយបែកធ្លាយរឿងទាក់ទងទៅដឹកនាំក្លិប Real Madrid ។ យោងតាមសហព័ន្ធបាល់ទាត់អេស្ប៉ាញបានឱ្យដឹងថា លោក Hierro សម្រេចចុះចេញពីតំណែងគឺដោយសារតែលោកឈឺចាប់ និងខឹងខ្លួនឯងដែលធ្វើមិនបានល្អនៅ World Cup ។
៤-គ្រូបង្វឹក Akira Nishino (ជប៉ុន)
បន្ទាប់ពីដឹកនាំជប៉ុនធ្លាក់ World Cup ត្រឹមវគ្គចែកពូលរួចមក គ្រូបង្វឹក Nishino មិនត្រូវបានចុះកុងត្រាបន្តទៀតនោះទេ ។ នេះបើយោងតាមការចេញផ្សាយរបស់សហព័ន្ធបាល់ទាត់ជប៉ុន ។ លោក Nishino បានត្រៀមចិត្តរួចមកហើយចំពោះការសម្រេចលាលែងពីតំណែងនេះ ដោយ
លោកលើកឡើងថា ៖ “កុងត្រារបស់ខ្ញុំបានចប់ទៅហើយ ខ្ញុំក៏មិនបន្តទៀតដែរ ព្រោះវាមានសុពលភាពត្រឹមចប់ World Cup ប៉ុណ្ណោះ ។”
សូមបញ្ជាក់ថា លោក Nishino ត្រូវបានចាត់តាំងជាគ្រូបង្គោលក្រុមសាមូរ៉ៃភ្លាមៗ មុនព្រឹត្តិការណ៍ World Cup ចាប់ផ្តើមប្រកួតតែប៉ុន្មានសប្តាហ៍ប៉ុណ្ណោះ ទើបធ្វើឱ្យលោកពុំមានពេលវេលាគ្រប់គ្រាន់សម្រាប់បង្វឹកកូនក្រុម ។
៥-កីឡាករ Makoto Hasebe (ជប៉ុន)
ប្រធានក្រុមសាមូរ៉ៃកីឡាករ Makoto Hasebe បានប្រកាសចូលនិវត្តន៍ពីក្រុមជម្រើសជាតិភ្លាមៗ បន្ទាប់ពីដឹកនាំកូនក្រុមពុំបានល្អ ធ្វើឱ្យជប៉ុនធ្លាក់ចេញពី World Cup ទាំងមិនអស់ចិត្តក្រោមថ្វីជើងបែលហ្ស៊ិកនៅវគ្គ១៦ក្រុម ។
គួររំលឹកថា ខ្សែបម្រើ Makoto Hasebe ដែលបច្ចុប្បន្នលេងនៅក្លិបអាល្លឺម៉ង់ Eintracht Frankfurt ត្រូវបានចាត់តាំងជាប្រធានក្រុមសាមូរ៉ៃនៅព្រឹត្តិការណ៍ World Cup ៣ដងមកហើយចាប់តាំងពីរដូវកាល២០១០, ២០១៤ និង២០១៨នេះ ខណៈជប៉ុនមិនដែលឆ្លងផុតវគ្គ១៦ក្រុមទាំង៣លើក ។ អ្វីដែលនឹកស្មានមិនដល់នោះ គឺកីឡាករស្នូលខាងលើបានចូលលេងឱ្យក្រុមជម្រើសជាតិតាំងពីឆ្នាំ២០០៦មកម៉្លេះ ដោយបង្ហាញខ្លួនបានចំនួន១០៨ប្រកួត ប៉ុន្តែរកគ្រាប់បាល់បានតែ២គ្រាប់ប៉ុណ្ណោះ ហើយមិនមែនជាការស៊ុតនៅ World Cup នោះទេ ។
៦-កីឡាករ Iniesta (អេស្ប៉ាញ)
បរាជ័យសឹងមិនគួរឱ្យជឿរបស់អេស្ប៉ាញបានធ្វើឱ្យប៉ះពាល់ដល់ទឹកចិត្តកីឡាករ និងអ្នកគាំទ្រជាពន់ពេក រហូតមានអ្នកខ្លះទ្រហោយំយ៉ាងខ្លាំង សម្តែងនូវភាពឈឺចាប់សឹងតែមិនអាចទទួលយកបាន ។ ទន្ទឹមនឹងនេះ វីរបុរសអេស្ប៉ាញ វ័យ៣៤ឆ្នាំ កីឡាករ Andres Iniesta ក៏បានសម្រេចដើរចេញពីក្រុមជម្រើសជាតិទាំងអារម្មណ៍ក្តុកក្តួលក្រៃលែងផងដែរ ក្រោយមិនអាចស្រោចស្រង់អេស្ប៉ាញឱ្យយកឈ្នះគូប្រកួតបាន ដោយធ្លាក់ត្រឹមវគ្គ១៦ក្រុមចុងក្រោយ ។
គួររំលឹកថា តារាឆ្នើមរូបនេះហើយ គឺជាកីឡាករស៊ុត១គ្រាប់ជ័យជម្នះក្នុងវគ្គផ្តាច់ព្រ័ត្រ ពេលអេស្ប៉ាញប៉ះជាមួយជើងខ្លាំងហូឡង់ ជួយឱ្យក្រុមដែលមានរហស្សនាម“គោជល់” ស្គាល់រសជាតិគ្រងពាន World Cup ម្តងក្នុងប្រវត្តិសាស្ត្រនារដូវកាល២០១០ ។
កីឡាករជើងចាស់ខាងលើបានចូលរួមលេងឱ្យអេស្ប៉ាញនៅឆ្នាំ២០០៦ និងបង្ហាញខ្លួនចំនួន១៣១ប្រកួត ដោយស៊ុតបាន១៣គ្រាប់ ។ យ៉ាងណាមិញ Iniesta នៅតែបន្តអាជីពរបស់ខ្លួនដដែល ដោយលេងឱ្យក្លិបជប៉ុន Vissel Kobe ។
៧-កីឡាករ Javier Mascherano (អាហ្សង់ទីន)
វាជារឿងដ៏ឈឺចាប់បំផុតមួយសម្រាប់ក្រុមជម្រើសជាតិអាហ្សង់ទីន ក្នុងប្រវត្តិសាស្ត្រ World Cup ដែលពួកគេមិនអាចឆ្លងផុតវគ្គ១៦ក្រុមចុងក្រោយ បន្ទាប់ពីចាញ់ក្រុមបារាំងទាំងមិនអស់ចិត្តក្នុងលទ្ធផល៣ទល់នឹង៤ ។ ជាមួយនឹងការខំប្រឹងប្រែងតស៊ូតាំងពីវគ្គជម្រុះបឋមមក ក្រុមដែលមានរហស្សនាម“ពពកស” មួយនេះ ធ្វើបានសម្រេចទាំងត្រដាបត្រដួសសឹងមិនគួរឱ្យជឿ ប៉ុន្តែពួកគេមិនបោះបង់ឡើយ រហូតឡើងមកដល់វគ្គ១៦ក្រុម ។
បរាជ័យ និងភាពឈឺចាប់ដែលមិនអាចទទួលយកបាននេះ បានធ្វើឱ្យតារាឆ្នើម Javier Mascherano សម្រេចលាឈប់ពីក្រុមជម្រើសជាតិភ្លាមៗក្នុងវ័យ៣៤ឆ្នាំ ។ យ៉ាងណាមិញ វាមិនមែនជារឿងចម្លែកនោះទេសម្រាប់កីឡាករ Mascherano ព្រោះថារូបលោកក៏ធ្លាប់បានលើកឡើងផងដែរថា World Cup ២០១៨នេះ គឺជាឱកាសចុងក្រោយក្នុងអាជីពរបស់លោក ។
៨-កីឡាករ Lucas Biglia (អាហ្សង់ទីន)
ចំពោះកីឡាករអាហ្សង់ទីនមួយរូបនេះវិញ ក៏សម្រេចចូលនិវត្តន៍ពីក្រុមជម្រើសជាតិផងដែរ ព្រោះតែក្តីស្រមៃឈ្នះពានរង្វាន់ត្រូវរលាយហ្មត់គ្មានសល់ ។ កីឡាករ Lucas Biglia ដែលកំពុងជ្រកក្រោមដំបូលក្លិប AC Milan បាននិយាយទាំងទឹកភ្នែកថា៖ “នេះហើយជាបាល់ទាត់ គឺតែងមានចាញ់ មានឈ្នះ ។ យើងចាកចេញទាំងឈឺចាប់បំផុត ព្រោះវិថីដែលពួកយើងដើរ វាបានមកដល់ទីបញ្ចប់ហើយ ។” Biglia បន្តថា៖“វាជាពេលដ៏ចុកចាប់បំផុត ដែលខ្ញុំសម្រេចដើរចេញពីក្រុមជម្រើសជាតិ ។ ខ្ញុំសង្ឃឹមថា គ្រាប់ពូជថ្មីៗជំនាន់ក្រោយ នឹងអាចជួយប្រទេសដ៏កម្សត់មួយនេះ ឱ្យសម្រេចបាននូវមហិច្ឆតានាពេលអនាគត ។”
៩-កីឡាករ Sardar Azmoun (អុីរ៉ង់)
បន្ទាប់ពីអុីរ៉ង់ធ្លាក់ចេញពីព្រឹត្តិការណ៍ World Cup ត្រឹមវគ្គចែកពូលរួចមក អ្នកគាំទ្រក្រុមមួយនេះ បានបន្តទម្លាក់កំហុស និងប្រមាថខ្លាំងៗដល់កីឡាករផ្សេងៗ ជាពិសេសកីឡាករខ្សែប្រយុទ្ធ ដោយពួកគេលើកឡើងថា ទម្រង់លេងអន់ខ្លាំង និងរកគ្រាប់បាល់មិនបានជាដើម ។ ដោយ
សារតែការរិះគន់នេះហើយ បានធ្វើឱ្យខ្សែប្រយុទ្ធ Sardar Azmoun ដែលមានរហស្សនាមថា “Messi អុីរ៉ង់” ឈឺចាប់រហូតសម្រេចចិត្តលាឈប់ពីក្រុមជម្រើសជាតិត្រឹមវ័យ២៣ឆ្នាំ ។
សូមបញ្ជាក់ថា កីឡាករ Azmoun ជាខ្សែប្រយុទ្ធខ្លាំងមួយរូបលេងនៅក្លិប Rubin Kazan និងជាតារាឆ្នើមរបស់ក្រុមជម្រើសជាតិអុីរ៉ង់ ដែលបានចូលរួមជាមួយឈុតធំតាំងពីឆ្នាំ២០១៤មកម៉្លេះ ហើយរកបាន២៣គ្រាប់ក្នុងការបង្ហាញខ្លួន៣៦លើក ។
១០-កីឡាករ Sergei Ignashevich (រុស្ស៊ី)
ខ្សែការពារដ៏រឹងមាំរបស់រុស្ស៊ី កីឡាករ Ignashevich បានដើរចេញពីក្រុមជម្រើសជាតិ បន្ទាប់ពីខកចិត្តពេលរុស្ស៊ីចាញ់ក្រូអាស៊ី និងធ្លាក់ត្រឹមវគ្គ៨ក្រុម ។ កីឡាករវ័យ៣៩ឆ្នាំរូបនេះ ចូលលេងជាមួយក្រុមជម្រើសជាតិតាំងពីឆ្នាំ២០០២មក ដោយបង្ហាញខ្លួនបានចំនួន១២៧ប្រកួត ថែមទាំងរកគ្រាប់បាល់បាន៨គ្រាប់ទៀតផង បើទោះជារូបលោកជាខ្សែការពារក៏ដោយ ។
អ្វីដែលពិសេសនោះ Ignashevich បានក្លាយជាកីឡាករចំណាស់ជាងគេនៅរុស្ស៊ី ហើយក៏ជាកីឡាករមានវត្តមានលេងច្រើនជាងគេផងដែរ នៅក្នុងក្រុមជម្រើសជាតិ ៕
ចែករំលែកព័តមាននេះ