រាជធានីភ្នំពេញ ៖ មុខរបរចិញ្ចឹមទា ថ្វីដ្បិតតែមានការលំបាក និងចំណាយទុនច្រើន ប៉ុន្តែជារបរមួយដែលអាចរកចំណូលបានជាប្រចាំ តាមរយៈការលក់ទាំងមេ និងពង ។ បើតាមស្ត្រីឈ្មោះ…
រាជធានីភ្នំពេញ ៖ មុខរបរចិញ្ចឹមទា ថ្វីដ្បិតតែមានការលំបាក និងចំណាយទុនច្រើន ប៉ុន្តែជារបរមួយដែលអាចរកចំណូលបានជាប្រចាំ តាមរយៈការលក់ទាំងមេ និងពង ។
បើតាមស្ត្រីឈ្មោះ ឆាន មករា អាយុជាង៣០ឆ្នាំ ជាអ្នករស់នៅឃុំស្រែននោង ស្រុកត្រាំកក់ ខេត្តតាកែវ ដែលបានមកស្នាក់នៅក្នុងភូមិក្រាំងដូនទៃ សង្កាត់ចោមចៅ២ ខណ្ឌពោធិ៍សែនជ័យ បានរៀបរាប់ថា នាង និងក្រុមគ្រួសារបានមកស្នាក់នៅជាមួយលោកជំទាវម្នាក់ ដោយគាត់មិនគិតថ្លៃឈ្នួលអ្វីទេ គ្រាន់តែឲ្យជួយមើលការខុសត្រូវដីប៉ុណ្ណោះ។ ដោយសារប្ដីរបស់នាងមានបទពិសោធន៍ចិញ្ចឹមទា ក៏បានចាប់មុខរបរនេះ ដោយចាប់ផ្ដើមទិញទាជំទង់មកចិញ្ចឹមតែម្ដង ។
នាងបន្ដថា ៖« ចាប់ផ្ដើមដំបូង នាងបានដើររកទិញទាជំទង់ ដោយទិញក្នុងតម្លៃ១៥.០០០ទៅ១៦.០០០រៀល ក្នុង១ក្បាល និងចិញ្ចឹមរយៈពេល៤ខែ ទាចាប់ផ្ដើមពង ហើយចេះតែបន្ដទិញចូល រហូតដល់ពេលនេះ មានចំនួនជាង៣ពាន់ក្បាលហើយ » ។ នាងថា ៖« ទាជាង៣ពាន់ក្បាលនេះ បានចំណាយដើមទុនច្រើនណាស់ ទម្រាំតែបានផលចំណេញពីវាវិញ » ។
នាងបន្តទៀតថា ចំពោះចំណីវិញ គឺទិញស្រូវឲ្យស៊ី ដោយក្នុង១ថ្ងៃៗអស់ចំនួន៣០០គីឡូក្រាម ដែលជាការចំណាយមួយដ៏ច្រើន ហើយទាក៏មិនពងទាំងអស់ដែរ គឺត្រឹមតែ៥០%ប៉ុណ្ណោះ បានន័យថា ក្នុង១ថ្ងៃ ទាពងបានតែ១.៥០០គ្រាប់ ហើយត្រូវឡើងរើសពីព្រលឹម រួចដឹកយកទៅបោះឲ្យម៉ូយខ្លះ និងអ្នកខ្លះទៀតមកទិញដល់កន្លែង ដោយក្នុង១គ្រាប់លក់ចេញតម្លៃពីជាង៤០០ទៅ៥០០រៀល ទៅតាមប្រភេទពងតូចឬធំ ។
អ្នកនាងបន្ដទៀតថា រយៈពេល២ឆ្នាំនេះ នាងបានប្ដូរមេទាចាស់ចេញម្ដង និងទិញទាថ្មីដាក់ឡើងវិញ រួចបំប៉នរយៈពេល៤ខែ ទើបបានពងលក់បន្តទៀត ។ នាងថា ៖« តាមពិត យើងអាចបណ្ដើរវាតាមស្រែឲ្យស៊ីចំណីបែបធម្មជាតិ ដូចជា កូនត្រី ខ្យង ខ្ចៅ ក្ដាម កណ្ដូប និងដង្កូវជាដើម ប៉ុន្តែត្រូវចំណាយពេល និងប្រើកម្លាំងច្រើន ។ ដោយសារពួកខ្ញុំពុំសូវមានពេលវេលា និងកម្លាំងគ្រប់គ្រាន់ ម្យ៉ាងទៀត នៅកន្លែងចិញ្ចឹមមានស្រះទឹកស្រាប់ ដែលអាចឲ្យទាលេងទឹកបាន ហើយក៏ងាយស្រួលក្នុងការគ្រប់គ្រងវាដែរ » ៕
ចែករំលែកព័តមាននេះ