រាជធានីភ្នំពេញ ៖ បណ្តាក្រុមហ៊ុនភ្នាក់ងារទេសចរណ៍ និងអ្នកនៅក្នុងវិស័យបម្រើសេវាបដិសណ្ឋារកិច្ច បានអះអាងស្រដៀងគ្នាថា លំហូរភ្ញៀវទេសចរនៅតែបន្តកើនឡើង ដោយមិនមានរងផលប៉ះពាល់ណាមួយទេ បើទោះជាជិតដល់ថ្ងៃបោះឆ្នោតក្តី ។ លោកស្រី…
រាជធានីភ្នំពេញ ៖ បណ្តាក្រុមហ៊ុនភ្នាក់ងារទេសចរណ៍ និងអ្នកនៅក្នុងវិស័យបម្រើសេវាបដិសណ្ឋារកិច្ច បានអះអាងស្រដៀងគ្នាថា លំហូរភ្ញៀវទេសចរនៅតែបន្តកើនឡើង ដោយមិនមានរងផលប៉ះពាល់ណាមួយទេ បើទោះជាជិតដល់ថ្ងៃបោះឆ្នោតក្តី ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឲ្យដឹងនៅព្រឹកថ្ងៃទី២៦ មិថុនា ថា វិស័យនេះមិនបានរងផលប៉ះពាល់ទេ ដោយសារយើងឃើញកំណើនភ្ញៀវអន្តរជាតិបន្តកើនឡើងនៅកម្ពុជា និងមិនមានការលុបកញ្ចប់ទស្សនកិច្ចណាមួយទេ ។លោកស្រីបន្តថា ការកើនឡើងនូវចំនួនភ្ញៀវទេសចរ គឺឆ្លុះបញ្ចាំងពីទំនុកចិត្ត ដោយសារកត្តាសុខសន្តិភាព និងស្ថិរភាពនយោបាយដែលកម្ពុជាសម្រេចបាន ។ លោកស្រីបន្តថា ៖« យើងនៅតែមានសុទិដ្ឋិនិយមចំពោះទីផ្សារនេះ ហើយយើងឃើញទីផ្សារកម្ពុជានៅតែមានភាពទាក់ទាញ » ។
ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានមានប្រសាសន៍ដែរថា លោកមិនឃើញមានសញ្ញាណាមួយគួរឲ្យបារម្ភទាក់ទងនឹងការបោះឆ្នោតទេ ហើយភ្ញៀវទេសចរពីបណ្តាប្រទេសក្នុងតំបន់នៅតែបន្តកើនឡើងល្អប្រសើរ បើទោះជាភ្ញៀវមកពីអាមេរិក និងអឺរ៉ុបមួយចំនួនមានសញ្ញាទ្រឹងក្តី ប៉ុន្តែបើគិតជារួម គឺលំហូរភ្ញៀវអន្តរជាតិនៅតែបន្តកើនឡើង ។ លោកបន្តថា ៖« អ្វីដែលកាន់តែគួរឲ្យចាប់អារម្មណ៍ គឺភ្ញៀវអន្តរជាតិហាក់មិនបានសួរនាំពីស្ថានភាពនៅកម្ពុជាច្រើន ដូចការបោះឆ្នោតអាណត្តិមុនៗទេ មានន័យថា ពួកគេជឿជាក់លើស្ថិរភាព និងសុខសន្តិភាពរបស់កម្ពុជា » ។ អ្នកនៅក្នុងផ្នែកសេវាបដិសណ្ឋារកិច្ច បានសម្តែងនូវសុទិដ្ឋិនិយមក្នុងវិស័យនេះ ទន្ទឹមនឹងកំណើននៃការកក់បន្ទប់ ដោយសារការមកដល់របស់ភ្ញៀវអន្តរជាតិ ។
កញ្ញា ម៉ឹង ប៊ុណ្ណារី ជំនួយការផ្នែកលក់នៅសណ្ឋាគារហ៊ីម៉ាវ៉ារី បានឲ្យដឹងថា ការបោះឆ្នោតនាពេលខាងមុខនៅកម្ពុជា ពុំបានជះឥទ្ធិពល មិនល្អដល់វិស័យទេសចរណ៍នៅកម្ពុជាឡើយ ។ ផ្ទុយទៅវិញ កំណើនភ្ញៀវទេសចរអន្តរជាតិមកកម្ពុជាបានកើនឡើងគួរឲ្យកត់សម្គាល់ ។ កញ្ញាបន្តថា ៖« ចំនួនភ្ញៀវទេសចរដែលបានកក់ និងទទួលសេវានៅសណ្ឋាគារហ៊ីម៉ាវ៉ារី មានការកើនឡើងគួរឲ្យកត់សម្គាល់ ដោយគ្មានអ្វីប៉ះពាល់ដោយសារការបោះឆ្នោតនាពេលខាងមុខទេ » ។ កញ្ញាថា ៖« ចំនួនភ្ញៀវទេសចរអន្តរជាតិបានកើនឡើងច្រើននៅឆ្នាំនេះ បើធៀបនឹងឆ្នាំ២០១៧កន្លងមក » ។
តាមរបាយការណ៍ក្រសួងទេសចរណ៍ នៅក្នុងត្រីមាសទី១ ឆ្នាំ២០១៨ ភ្ញៀវទេសចរអន្តរជាតិចូលមកទស្សនាកម្ពុជា មានចំនួន១,៧លាននាក់ កើនឡើង១៤% បើធៀបនឹងគ្រាដូចគ្នាឆ្នាំ២០១៧ ។ ក្នុងនោះទីផ្សារគោលដៅសំខាន់ៗមានដូចជា ចិន, វៀតណាម, កូរ៉េ, ឡាវ និងថៃ ហើយភ្ញៀវទេសចរទាំងនោះទៅទស្សនាច្រើននៅតំបន់ទេសចរណ៍ដូចជា ខេត្តសៀមរាប, រាជធានីភ្នំពេញ, ខេត្តព្រះសីហនុ និងតំបន់ភូមិភាគឦសានអេកូទេសចរណ៍ ៕
ចែករំលែកព័តមាននេះ