រាជធានីភ្នំពេញ ៖ ក្នុងរយៈពេល៥ឆ្នាំចុងក្រោយនេះ រាជរដ្ឋាភិបាលសម្រេចបានតាមការគ្រោងទុកនូវកំណើនសេដ្ឋកិច្ចប្រចាំឆ្នាំក្នុងរង្វង់៧%ប្រកបដោយបរិយាប័ន្ន និងសមធម៌ ។ ទោះបីយ៉ាងនេះក្ដី កម្ពុជាក៏ប្រឈមហានិភ័យមួយចំនួនដែរ ហើយទៅថ្ងៃមុខ មិនដឹងថា កំណើននឹងនៅតែរឹងមាំក្នុងរង្វង់៧%ទៀត ឬយ៉ាងណា ?
បើតាមមន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បញ្ជាក់ជាសាធារណៈថា សេដ្ឋកិច្ចកម្ពុជានៅតែមានកំណើនល្អ និងរឹងមាំ ប៉ុន្ដែមិនត្រូវត្រេកត្រអាលទេ ។ ជាមួយគ្នានេះ កម្ពុជាត្រូវដោះស្រាយបញ្ហាច្រើនណាស់ និងត្រូវគ្រប់គ្រងរាល់ហានិភ័យដែលអាចកើតមានឡើងជាយថាហេតុ ។
ថ្លែងក្នុងវេទិកាសាធារណៈ ស្ដីពី សេដ្ឋកិច្ច កម្ពុជា សមិទ្ធកម្ម និងទស្សនវិស័យ កាលពីពេលថ្មីៗនេះ លោក វង្សី វិស្សុត រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ បានលើកឡើងថា េសដ្ឋកិច្ចរបស់កម្ពុជានឹងនៅតែបន្ដរឹងមាំ ប៉ុន្ដែកម្ពុជាត្រូវពង្រីក និងបង្កើតកម្លាំងចលករថ្មីៗបន្ថែមទៀត ពិសេសការធ្វើទំនើបកម្មនៃក្បាលម៉ាស៊ីនសេដ្ឋកិច្ចឲ្យកាន់តែមានតម្លៃបន្ថែមខ្ពស់ ដើម្បីឲ្យសេដ្ឋកិច្ចមានចលនារស់រវើក និងលូតលាស់ថែមទៀត ព្រោះថា នៅ៥ទៅ១០ឆ្នាំខាងមុខ មិនអាចថានៅតែរក្សាកំណើន៧%ទៀតឬយ៉ាងណា ?
លោកថ្លែងយ៉ាងដូច្នេះថា ៖« ទៅថ្ងៃខាងមុខ យើងមិនអាចថាមូលដ្ឋានរឹងមាំរបស់យើងហ្នឹង នៅតែអាចទ្រទ្រង់កំណើន៧%ទៅមុខទៀតទេ ក្នុងរយៈពេល៥ទៅ១០ឆ្នាំខាងមុខទៀត ។ ដូច្នេះ ខ្ញុំចង់បញ្ជាក់ថា កំណើនល្អ ហើយរឹងមាំ ប៉ុន្ដែយើងមិនត្រូវត្រេកត្រអាលទេ យើងឃើញបញ្ហា យើងស្គាល់ចំណុចខ្សោយរបស់យើង ហើយត្រូវដោះស្រាយបញ្ហាច្រើនណាស់ និងត្រូវគ្រប់គ្រងរាល់ហានិភ័យដែលអាចកើតមានឡើងជាយថាហេតុ ។ ដូច្នេះ ទីមួយ យើងត្រូវតែគិតពីការកែទម្រង់រចនាសម្ព័ន្ធ កសាងមូលដ្ឋានមួយដែលទ្រទ្រង់ និងត្រូវបង្កើតកម្លាំងចលករទាញកម្លាំងសេដ្ឋកិច្ចឲ្យបានច្រើន ដូចជា ធ្វើទំនើបកម្មនៃក្បាលម៉ាស៊ីនសេដ្ឋកិច្ចសព្វថ្ងៃនេះឲ្យកាន់តែមានតម្លៃបន្ថែមខ្ពស់ និងកាន់តែមានពិពិធកម្មកើនឡើង ។ ទីពីរ ក្ដាប់ឲ្យជាប់នូវឱកាសសេដ្ឋកិច្ចរបស់ខ្លួនដើម្បីពង្រីក និងបង្កើតកម្លាំងចលករថ្មីៗបន្ថែមទៀត ដែលដឹកមុខដោយវិស័យឯកជន និងទីបី ត្រូវដោះស្រាយបញ្ហា Market failure (បរិមាណផលិតផលដែលអ្នកប្រើប្រាស់ត្រូវការ មិនសមាមាត្រនឹងបរិមាណផ្គត់ផ្គង់) ដើម្បីបង្កើតកម្លាំងថ្មីបន្ថែមទៀត។ ដូច្នេះ រដ្ឋត្រូវតែលូកដៃដោះស្រាយបញ្ហានេះ ដើម្បីឲ្យសេដ្ឋកិច្ចរបស់យើងមានចលនារស់រវើក និងលូតលាស់ឡើង » ។
លោកថា ៖ « ទៅថ្ងៃអនាគត កម្ពុជាត្រូវដោះស្រាយបញ្ហាផលិតភាព ការបណ្ដុះបណ្ដាលធនធានមនុស្ស និងក្របខ័ណ្ឌបរិស្ថានច្បាប់ ដើម្បីជំរុញកំណើនសេដ្ឋកិច្ចជាតិបន្ថែមទៀត ក៏ដូចជាធានាប្រាក់ចំណូលសម្រាប់ទ្រទ្រង់ថវិកាជាតិ ពិសេសគឺការកសាងស្ថាប័នឲ្យបានរឹងមាំតាមរយៈការកែទម្រង់ស៊ីជម្រៅ » ។
យោងតាមឯកសារក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ សម្រាប់ការរៀបចំសេចក្ដីព្រាងច្បាប់ ស្ដីពី ហិរញ្ញវត្ថុសម្រាប់ការគ្រប់គ្រងឆ្នាំ២០១៩ បានបង្ហាញថា ការបន្តរឹតបន្តឹងគោលនយោបាយរូបិយវត្ថុនៃប្រទេសអភិវឌ្ឍន៍, ភាពមិនប្រាកដប្រជានៃផលប៉ះពាល់ពីការចាកចេញរបស់អង់គ្លេសពីសហភាពអឺរ៉ុប, ភាពមិនប្រាកដប្រជានៃគោលនយោបាយពាណិជ្ជកម្មរបស់អាមេរិក, កំណើនឆាប់រហ័សនៃឥណទានក្នុងប្រទេសចិន, ការបន្តនិន្នាការនៃគោលនយោបាយគាំពារនិយម និងបញ្ហាដែលពាក់ព័ន្ធនឹងភូមិសាស្ត្រនយោបាយ, ភេរវកម្ម និងសន្តិសុខជាសកល គឺជាហានិភ័យដែលរារាំងដល់ការជំរុញកំណើនសេដ្ឋកិច្ចរបស់កម្ពុជា ។
ជាមួយគ្នានេះ កម្ពុជាខ្លួនឯង ក៏ជួបនឹងបញ្ហាប្រឈម និងហានិភ័យក្នុងស្រុកមួយចំនួនដែរដូចជា ថ្លៃអគ្គិសនីនៅមានកម្រិតខ្ពស់ និងការផ្គត់ផ្គង់នៅមិនទាន់មានស្ថិរភាព, ភាពនៅទន់ខ្សោយនៃប្រព័ន្ធដឹកជញ្ជូន និងឡូជីស្ទិក, ផលិតភាពពលកម្មទាប និងកង្វះពលកម្មជំនាញ, នីតិវិធីស្មុគស្មាញ និងកម្រៃសេវាក្រៅផ្លូវការខ្ពស់សម្រាប់ការធ្វើធុរកិច្ច, កម្រិតខ្ពស់នៃថ្លៃម្ហូបអាហារនៅកម្ពុជា និងកំណើនឆាប់រហ័សនៃឥណទានធនាគារក្នុងវិស័យពាក់ព័ន្ធនឹងអចលនទ្រព្យ ជាដើម ។
ទោះបីយ៉ាងនេះក្ដី សម្រាប់រយៈពេល៥ឆ្នាំខាងមុខ កម្ពុជានឹងបោះជំហានទៅដំណាក់កាលថ្មីមួយទៀត ដែលវិស័យឧស្សាហកម្ម និងបច្ចេកវិទ្យាកាន់តែដើរតួនាទីសំខាន់ក្នុងយុទ្ធសាស្ត្រកំណើនថ្មីរបស់ជាតិ ក្នុងបរិការណ៍ដែលភាពប្រកួតប្រជែងក្នុងតំបន់ និងពិភពលោក កាន់តែស្រួចស្រាល់ ។ ដើម្បីបន្តសម្រេចបានកំណើនរឹងមាំក្នុងរង្វង់៧% ប្រកបដោយចីរភាព, បរិយាប័ន្ន និងធន់នឹងវិបត្តិ កម្ពុជាចាំបាច់ត្រូវបន្តអនុវត្តគោលនយោបាយ និងវិធានការគន្លឹះមុតស្រួចមួយចំនួនប្រកបដោយឆន្ទៈនយោបាយខ្ពស់ សំដៅដោះស្រាយបញ្ហាប្រឈម និងបញ្ចៀសនូវហានិភ័យទាំងឡាយជាយថាហេតុ និងបន្តកែទម្រង់តាមកម្មវិធីនយោបាយ និងយុទ្ធសាស្ត្រ ក្រោមគោលការណ៍ «បន្តរក្សាសមិទ្ធផលចាស់ បង្កើតសមិទ្ធផលថ្មី» ។
គួរបញ្ជាក់ថា កម្ពុជាបានឆ្លងផុតពីឋានៈប្រទេសមានចំណូលទាប ទៅជាប្រទេសមានចំណូលមធ្យមកម្រិតទាបជាផ្លូវការក្នុងឆ្នាំ២០១៥ ព្រមទាំងត្រូវបានធនាគារអភិវឌ្ឍន៍អាស៊ី ចាត់ទុកថាជា «ខ្លាសេដ្ឋកិច្ចថ្មីនៅអាស៊ី» ក្នុងឆ្នាំ២០១៦ ។ តាមរយៈតួលេខរបស់ធនាគារពិភពលោកបានបង្ហាញថា ភាពគ្មានការងារធ្វើនៅប្រទេសកម្ពុជាស្ថិតក្នុងអត្រា០,៣% និងភាពក្រីក្រតោកយ៉ាកត្រូវបានលុបបំបាត់ចោលទាំងស្រុងក្នុងឆ្នាំ២០១៧ ។ ទន្ទឹមនេះ ប្រាក់ចំណូលរបស់ប្រជាជន ក៏មានការកើនឡើងផងដែរ ដោយផ.ស.ស ក្នុងមនុស្សម្នាក់កើនពី១.០៤២ដុល្លារអាមេរិកក្នុងឆ្នាំ២០១៣ ដល់ប្រមាណ១.៤២៧ដុល្លារអាមេរិកក្នុងឆ្នាំ២០១៧ និង១.៥៦៣ដុល្លារអាមេរិកនៅក្នុងឆ្នាំ២០១៨ ៕
ចែករំលែកព័តមាននេះ