រាជធានីភ្នំពេញ ៖ លោកគឹម យ៉ុងជេ ឯកអគ្គរដ្ឋទូតសាធារណរដ្ឋកូរ៉េប្រចាំនៅសហគមន៍អាស៊ានបានថ្លែងនៅថ្ងៃទី0២ ខែមេសា ឆ្នាំ២០១៨ថា ប្រទេសកូរ៉េខាងត្បូងបានយល់ច្បាស់ពីការដឹកនាំរបស់រាជរដ្ឋាភិបាលកម្ពុជាដែលមានសម្តេចតេជោហ៊ុន សែន ជានាយករដ្ឋមន្ត្រីបានធ្វើឲ្យប្រទេសជាតិរីកចម្រើន និងមានការអភិវឌ្ឍដូចសព្វថ្ងៃ ។
ចំណែកបញ្ហានយោបាយវិញលោកថា ៖«កូរ៉េមិនជ្រៀតជ្រែកចំពោះកិច្ចការងារផ្ទៃក្នុងរបស់កម្ពុជាទេ និងគាំទ្រការដឹកនាំរបស់រាជរដ្ឋាភិបាលកម្ពុជា» ។ លោកឯកអគ្គរដ្ឋទូតកូរ៉េបានលើកឡើងនៅពេលលោកបានចូលជួបសំដែងការគួរសមជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៅទីស្តីការក្រសួងការបរទេសកម្ពុជាក្នុងទីក្រុងភ្នំពេញ ។
នេះបើយោងតាមលោក ជុំ សុន្ទរី អ្នកនាំពាក្យក្រសួងការបរទេសបានថ្លែងប្រាប់អ្នកសារព័ត៌មានក្រោយជំនួបជិត១ម៉ោង ។ លោកអគ្គរដ្ឋទូតបានបន្តថា ៖ បានសំដែងអំណរគុណចំពោះការគាំទ្ររបស់កម្ពុជាម្រាប់ការលើកស្ទួយទំនាក់ទំនងរវាងអាស៊ាន និងសាធារណរដ្ឋកូរ៉េក៏ដូចទំនាក់ទំនងរវាងប្រទេសទាំងពីរក្នុងក្របខណ្ឌនៃអាស៊ាន ។ លោកថា ៖ កូរ៉េអបអរសាទរចំពោះជ័យជំនះរបស់កម្ពុជាក្នុងការអភវិឌ្ឍសេដ្ឋកិច្ច ។ លោកទេសរដ្ឋមន្ត្រីប្រាក់ សុខុនបានថ្លែងក្នុងពេលជំនួបជាមួយលោក គីម យ៉ុងជេ ថា លោកសូមអបអរសាទរដែលលោកត្រូវបានតែងតាំងជាឯកអគ្គរដ្ឋទូតសាធារណរដ្ឋកូរ៉េប្រចាំនៅសហគមន៍អាស៊ាន និងដំណើរទស្សនកិច្ចមកកាន់ប្រទេសកម្ពុជា ។ លោកបានរំលឹកថា កាលពីពេលថ្មីៗលោកអនុរដ្ឋមន្ត្រីការបរទេសកូរ៉េក៏បានជួបពិភាក្សាគ្នាជាមួយលោកទេសរដ្ឋមន្ត្រីដែរ ហើយភាគីទាំងពីរបានលើកឡើងពីកិច្ចសហប្រតិបត្តិការបន្ថែមទៀត មិត្តភាព និងកិច្ចសហប្រតិបត្តិការដ៏ល្អលើគ្រប់វិស័យរវាងប្រទេសទាំងពីរ ។
កាលពីពេលកន្លងទៅលោកអនុរដ្ឋមន្ត្រីការបរទេសកូរ៉េបានលើឡើងពីការប្តេជ្ញាចិត្តរបស់កូរ៉េក្នុងការលើកកម្ពស់បន្ថែមទៀត លើកិច្ចសហប្រតិបត្តិការជាមួយកម្ពុជា ។ ក្នុងនាមប្រទេសសម្របសម្រួលទំនាក់ទំនងរវាងអាស៊ាន និងកូរ៉េក្នុងរយៈកាលកន្លងមកនេះ ។ ភាគីកូរ៉េបានវាយតម្លៃខ្ពស់របស់កម្ពុជាយ៉ាងសកម្មក្នុងសម្របសម្រួលទំនាក់ទំនងរវាងអាស៊ាន និងសាធារណរដ្ឋកូរ៉េ ៕
ចែករំលែកព័តមាននេះ